Minskdə ticari-iqtisadi əməkdaşlıq üzrə Belarus-Azərbaycan hökumətlərarası komissiyasının iclası keçirilib

Minskdə ticari-iqtisadi əməkdaşlıq üzrə Belarus-Azərbaycan hökumətlərarası komissiyasının 11-ci iclası keçirilib.

AZƏRTAC xəbər verir ki, iclasda Azərbaycan nümayəndə heyətinə Baş nazirin birinci müavini Yaqub Eyyubov rəhbərlik edib.

Belarusun Baş nazirinin müavini Mixail Rusıy iclasda deyib ki, Minsk azərbaycanlı tərəfdaşlarla bütün səviyyələrdə, o cümlədən ikitərəfli hökumətlərarası komissiya formatında fəal qarşılıqlı fəaliyyəti davam etdirmək niyyətindədir. Azərbaycanla ticari-iqtisadi əməkdaşlığın dinamikasından məmnunluğunu ifadə edən M.Rusıy diqqətə çatdırıb ki, car ilin yanvar-sentyabr aylarında iki ölkə arasında əmtəə dövriyyəsi ötən ilin analoji dövrü ilə müqayisədə 3,3 faiz artaraq 331,5 milyon dollar təşkil edib. "İndi qarşılıqlı əmtəə dövriyyəsinin artımının dayanıqlı və uzunmüddətli hal alması üçün yeni birgə layihələr üzərində fəal iş aparmaq lazımdır. Biz sənaye və kənd təsərrüfatı sahəsində əməkdaşlığın genişlənməsinə, Gəncə avtomobil zavodunda traktorların, taxılyığan kombaynlarının, MAZ texnikasının və digər sənaye məhsullarının buraxılmasına böyük əhəmiyyət veririk. Artıq biz birlikdə kənd təsərrüfatı maşınqayırması sahəsini yaratmışıq”, - deyə Baş nazirin müavini qeyd edib.

Onun sözlərinə görə, Belarus-Azərbaycan traktorlarının Türkiyədə yığılması üzrə istehsal iki ölkənin əməkdaşlığını yeni səviyyəyə yüksəldəcək. "Bu, üç ölkənin yeni perspektivli layihəsidir. Onun uğurla həyata keçirilməsi gələcəkdə regiondakı bazara birgə çıxışın təmin edilməsi sahəsində yeni təşəbbüslərimiz üçün yol açacaq”, - deyə M.Rusıy əlavə edib.

Belarusun Baş nazirinin müavini nəqliyyat və logistika, neft-kimya, farmasevtika sahələrində əməkdaşlığın da perspektivli olduğunu söyləyib. Belarus hökuməti, həmçinin qarşılıqlı ərzaq tədarükünü də fəal şəkildə dəstəkləmək niyyətindədir. "Belarusun ət və süd məhsulları, qənnadı məmulatları artıq Azərbaycan istehlakçısına yaxşı məlumdur. Biz ötən il Minskdə Azərbaycan Ticarət Evinin açılmasını və dostlarımızın digər analoji təşəbbüslərini alqışlayırıq, hökumətimiz tərəfindən onlara maksimal dərəcədə dəstək göstərəcəyik”, - deyə Mixail Rusıy vurğulayıb.

Azərbaycanın Baş nazirinin birinci müavini Yaqub Eyyubov ötən dövrdə ölkələrimiz arasında münasibətlərin daha da inkişaf edərək strateji tərəfdaşlıq səviyyəsinə çatdığını qeyd edib. Vurğulayıb ki, Azərbaycan və Belarus prezidentlərinin şəxsi dostluq münasibətləri sayəsində iki ölkə arasında əlaqələr gündən-günə genişlənir. Ölkələrimiz arasında iqtisadi əməkdaşlığın daha da möhkəmlənməsinin zəruriliyini qeyd edən Y.Eyyubov deyib ki, əmtəə dövriyyəsinin hazırkı səviyyəsi mövcud potensialımıza uyğun deyil. "Aramızda olan səmimi dostluq münasibətləri mühümdür. Bunun çox böyük dəyəri var”, - deyə Baş nazirin birinci müavini diqqətə çatdırıb.

Hökumətlərarası komissiyanın iclasının yekunlarına dair yeddi sənəd imzalanıb. Onlardan üçü Gəncə avtomobil zavodu ilə bağlıdır.

Sənədlərdən birində Belarus-Azərbaycan traktorlarının Türkiyədə yığılması nəzərdə tutulur. "Gəncə Avtomobil Zavodu” İstehsalat Birliyinin Müşahidə Şurasının sədri Xanlar Fətiyevin sözlərinə görə, müəssisənin 2019-cu ilin I rübündə işə başlaması planlaşdırılır. Türkiyədəki zavodun konveyerindən 5 minə qədər traktorun buraxılması nəzərdə tutulur. İlkin mərhələdə layihənin istehsal gücü 2,5 min ədəd miqdarında yerinə yetiriləcək.

Hökumətlərarası komissiyanın iclası çərçivəsində, həmçinin "Belarus dəmir yolu” Dövlət Birliyi (DB) və "Azərbaycan Dəmir Yolları” Qapalı Səhmdar Cəmiyyəti (QSC) arasında qarşılıqlı-faydalı əməkdaşlığa dair saziş imzalanıb. Sənədi "Azərbaycan Dəmir Yolları” QSC-nin sədri Cavid Qurbanov və "Belarus dəmir yolu” DB-nin rəisi Vladimir Morozov imzalayıblar.

Vladimir Morozovun sözlərinə görə, Belarusla Azərbaycan arasında daha rahat, dayanıqlı nəqliyyat əlaqəsinin yaradılması nəzərdə tutulur. "Şimal-Cənub” dəhlizinin inkişafı, bu marşrutla Hindistan, İran, Azərbaycan, Rusiya və Belarusdan yüklərin daşınması üçün şərait yaradılması xüsusi əhəmiyyət kəsb edir. Sənəddə tarif və texnologiya istiqamətləri üzrə işçi qruplarının yaradılması da nəzərdə tutulur.

Azərbaycan.- 2018.- 20 noyabr.- S.4.