Polo dünyasının qrantlarına qarşı mübarizlik savaşımız davam edir: məkan - Florida, növbəti rəqib - ABŞ

Azərbaycanın qədim atçılıq tarixinin və mədəniyyətinin bütün dünyaya tanıdılmasında mühüm rol oynayan polo üzrə milli yığmamız dünya atçılıq arenalarındakı möhtəşəm və tamaşaçılara gərgin yarış həyəcanı yaşadan çıxışlarını davam etdirir.

Azərbaycan Respublikasının Prezidenti İlham Əliyevin ölkəmizdə idmanın, o cümlədən də atçılığın inkişafına xüsusi önəm və dəstək verməsi sayəsində polo üzrə milli komandamız bir neçə il öncə ən xoş xəyallarda belə təsəvvür edilməyən nailiyyətlər əldə etmişdir.

Ümumiyyətlə, 2018-ci il polo üzrə milli yığmamız üçün xüsusilə məhsuldar olmuş, idmançılarımız dünya atçılıq idmanı mütəxəssislərini və fanatlarını təəccübləndirərək idman mövsümünün ən gözlənilməz uğurlarına imza atmışlar. Yanvar ayında İsveçrənin Sankt-Moritz şəhərində keçirilən Qar Polosu üzrə Dünya Kubokunda komandamızın qar üzərində ilk dəfə polo oynamasına baxmayaraq 3-cü nəticə göstərməsi əksər mütəxəssislər tərəfindən bir təsadüf kimi qarşılanmışdısa, iyun ayında Bakıda təşkil olunmuş Arena Polo üzrə Dünya Kuboku turnirində və sentyabr ayında İtaliyanın Siyene şəhərində Avropa çempionatında gümüş medallara sahib çıxmağımız niyyətlərimizin ciddiliyini və Azərbaycan komandası ilə istənilən rəqibin hesablaşmalı olmasını bütün dünyaya sübut etdi.

Beləliklə də, atçılıq dünyasının ən mötəbər yarış meydanlarını fəth etmək uğrunda polo üzrə milli yığmamızın mübarizlik savaşının növbəti meydanı Amerika Birləşmiş Ştatlarının Florida ştatı olmuşdur. Burada "Grand Champions Polo Club”da təşkil olunmuş Polo üzrə Beynəlxalq Kubok turnirinin finalında Azərbaycan milli yığması turnirin evsahibi - son 6 il ərzində ardıcıl olaraq İngiltərə, Çili, Meksika, Cənubi Afrika, Uruqvay və Braziliya komandalarını məğlub edərək turnirdə qələbə qazanmış ABŞ yığması ilə qarşılaşmışdır.

İtaliyadakı çempionat zamanı Azərbaycan millisinin oyunlarını diqqətlə izləyən ABŞ idman mətbuatı və sosial mediası bu ölkənin HBO telekanalının istehsal etdiyi, Amerikada son dərəcə populyar olmaqla ölkəmizdə də böyük fanat kütləsinə malik olan "Taxtların oyunu” teleserialı, həmçinin məşhur Amerika yazıçısı Corc Martin tərəfindən yazılmış və bu teleserialın əsasını təşkil edən "Buz və Alovun nəğməsi” əsəri ilə paralellər apararaq milli komandamızın "Odlar və buzlar diyarı” olan Azərbaycanı təmsil etməklə ABŞ yığması üçün ciddi rəqib olacağını əvvəlcədən proqnozlaşdırmışdılar.

24 noyabr tarixində baş tutmuş final oyunu xüsusilə həyəcanverici hisslər və ehtiras coşqusu ilə yadda qaldı. "PAŞA Sığorta” ASC-nin sponsorluq etdiyi milli yığmamızın baş məşqçisi Namiq Orucovun qərarı ilə komandanın start heyətinə Elçin Camallı, Amil Namazov, Andres (LaLA) Laplacette, Adrian Laplacette və Rəşad Həsənov daxil edilmişdilər. Oyun prosesində ABŞ komandası qarşısında komandamız yüksək əzmkarlıq və mübarizlik nümayiş etdirdi. Lakin son dəqiqələrdə Elçin Camallı və Amil Namazovun vurduğu möhtəşəm qollara baxmayaraq ABŞ 9:7 hesabı ilə qalib gələrək yenidən kubokun sahibi oldu. Milli yığmamız isə 2-ci yerdə qərarlaşdı.

Final oyunundan sonra adətən rəqibin çıxışını müsbət dəyərləndirməyə meyilli olmayan ABŞ idman mediası və təşkilatçılar tərəfindən idmançılarımızın oyununa yüksək qiymət verilməsi də kifayət qədər önəmli olmuşdur. Belə ki, məsələn, ABŞ-nın Polo Assosiasiyasının "Facebook” sosial şəbəkəsində yerləşdirdiyi yazıda deyilir: "Bu möhtəşəm bir qarşılaşma idi və Azərbaycan komandası olduqca yaxşı oynadı!” Eyni zamanda Amerika polosunun canlı əfsanələrindən və turnirin təşkilatçılarından olan Melissa Qanzi (Melissa Ganzi) öz "Twitter” səhifəsində Azər-baycan idmançılarına mübariz oyuna görə minnətdarlığını ifadə etmiş və bu görüşün böyük şərəf olmasını bildirmişdir.

Azərbaycan.- 2018.-27 noyabr.- S.5.