Qafqaz Müsəlmanları İdarəsinin sədri Küveytdə beynəlxalq konfransda iştirak edib

Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə Küveyt Əmiri Şeyx Sabah Əl-Əhməd Əl-Cabir Əl Sabahın himayəsi ilə “Bəşəriyyət aclıq əleyhinə səfərbər olsun” mövzusunda Əl-Küveyt şəhərində keçirilən “Humanitar aksiyaların keyfiyyətinin artırılması naminə effektiv əməkdaşlıq və informasiya mübadiləsi” adlı 8-ci beynəlxalq konfransda iştirak edib.

Azərbaycanın Küveytdəki səfirliyindən bildiriblər ki, Şeyxülislam tədbirdə Küveyt Əmirinin humanitar məsələlər üzrə müşaviri, Beynəlxalq İslam Xeyriyyə Təşkilatının sədri və BMT baş katibinin humanitar məsələlər üzrə xüsusi nümayəndəsi Abdullah Əl-Mətuqun şəxsi dəvəti ilə iştirak edib. QMİ-nin sədri konfransda məruzə ilə çıxış edib.

Konfrans çərçivəsində şeyxülislam Allahşükür Paşazadə Küveyt Dövlətinin ədliyyə, vəqflər və islam işləri naziri Fəhd Əl-İfasi və Küveyt Əmirinin humanitar məsələlər üzrə müşaviri, Beynəlxalq İslam Xeyriyyə Təşkilatının sədri və BMT baş katibinin humanitar məsələlər üzrə xüsusi nümayəndəsi Abdullah Əl-Mətuq ilə görüşüb.

Görüşlərdə şeyxülislam Allahşükür Paşazadə Azərbaycan xalqının ümummilli lideri Heydər Əliyevin İslam dünyası ilə, o cümlədən Küveytlə sıx əməkdaşlığa xüsusi diqqət yetirdiyini qeyd edib, 2009-cu il fevralın 10-11-də Azərbaycan Prezidenti İlham Əliyevin Küveyt Dövlətinə rəsmi səfəri və səfər zamanı Əmir Şeyx Sabah Əl-Əhməd Əl-Cabir Əl-Sabah ilə keçirdiyi görüşün iki ölkə arasında münasibətlərin inkişafında yeni mərhələnin əsasını qoyduğunu, hər iki ölkənin rəhbərliyinin fəaliyyəti və səyləri nəticəsində Azərbaycan və Küveyt əlaqələrinin müxtəlif səviyyələrdə və sahələrdə yüksək templə inkişaf etməyə başladığını diqqətə çatdırıb. QMİ sədri Azərbaycanın Küveyt ilə müxtəlif istiqamətlərdə, o cümlədən siyasi, iqtisadi, mədəni, dini-mənəvi və digər sahələrdə ikitərəfli əlaqələri daha da inkişaf etdirməyə və aktivləşdirməyə səylər göstərdiyini bildirib.

Həmçinin Allahşükür Paşazadə Ermənistan-Azərbaycan Dağlıq Qarabağ münaqişəsinin həlli üzrə danışıqlar prosesi barədə ətraflı məlumat verərək, problemlə bağlı Azərbaycanın ədalətli mövqeyinin Küveyt tərəfindən dəstəkləndiyi üçün qarşı tərəfə təşəkkürünü bildirib. Azərbaycan və Küveytin beynəlxalq təşkilatlar çərçivəsində daim bir-birinin dəstəkləyən mövqedən çıxış etdiyini bildirən QMİ sədri Küveytin BMT Təhlükəsizlik Şurasının qeyri-daimi üzvü olaraq Dağlıq Qarabağ münaqişəsi ilə bağlı TŞ-də qaldırılacaq məsələlərdə bundan sonra da Azərbaycana köməkliyini əsirgəməyəcəyinə ümidvar olduğunu qeyd edib.

Bununla yanaşı, görüşdə ölkələrimiz arasında ikitərəfli əməkdaşlıq əlaqələrinin inkişaf perspektivləri barədə geniş fikir mübadiləsi aparılıb.

Qarşı tərəf Azərbaycan ilə Küveyti bir çox amillərin birləşdirdiyini, ölkələrimiz arasında dini birliyin əhəmiyyətli rol oynadığını bildirərək, bir çox sahələrdə əməkdaşlıq əlaqələrinin daha da inkişaf etdirilməsinin zəruriliyini diqqətə çatdırıb. Azərbaycanın sürətli inkişafına Küveyt xalqının səmimi qəlbdən sevindiyi qeyd edilib, Küveyt hökumətinin Azərbaycan ilə siyasi, mədəni, dini-mənəvi və s. sahələrdə əlaqələrin daha da dərinləşməsində maraqlı olduğu bildirilib. Görüşlərdə Azərbaycan və Küveytin hər zaman bir-birinin yanında olduğu, Küveytin bütün beynəlxalq təşkilatlarda Dağlıq Qarabağ münaqişəsi ilə bağlı Azərbaycanın haqlı mövqeyini dəstəklədiyi və bu problemin sülh yolu ilə həllinin tərəfdarı olduğu vurğulanıb, Azərbaycanın da beynəlxalq təşkilatlar çərçivəsində daim Küveytin hüquqlarını dəstəkləyən mövqedən çıxış etməsini və Küveytin BMT Təhlükəsizlik Şurasına üzvlüyünü dəstəklədiyini heç vaxt unutmayacaqlarını diqqətə çatdırıblar.

Eyni zamanda, tədbir çərçivəsində şeyxülislam A.Paşazadə qarşı tərəfin təşəbbüsü ilə BMT baş katibinin Yaxın Şərq və Mərkəzi Asiyada humanitar tərəfdaşlıq məsələləri üzrə köməkçisi Rəşid Xaliqov ilə görüşüb.

Görüşdə A.Paşazadə Azərbaycanın dünya ölkələri ilə humanitar sahədə əməkdaşlığın gücləndirilməsi, beynəlxalq miqyasda yardımların göstərilməsi və əlaqələndirilməsinə verdiyi töhfələr haqqında məlumat verib. Eyni zamanda, dünyada dini zəmində meydana gələn narahatlıqların çoxaldığı bir dönəmdə tarixən çoxmillətli və çoxkonfessiyalı ölkə, milli, dini tolerantlıq və multikultural ənənələr diyarı olan Azərbaycanda sülh məramı, qarşılıqlı ehtiram məfkurəsi, humanist dəyərlərin bəşəriyyətə bəyan edilməsi üçün dövlət tərəfindən hər cür şəraitin yaradıldığını qeyd edib və burada siyasi iradənin böyük önəm daşıdığını vurğulayıb.

Azərbaycan.- 2018.- 28 noyabr.- S.4.