Humanitar Forum çərçivəsində Heydər Əliyev Mərkəzində innovativ məhsul və xidmətlər, startapçıların uğurlu tətbiqləri nümayiş olunur

Altıncı Bakı Beynəlxalq Humanitar Forumu çərçivəsində Heydər Əliyev Mərkəzində Nəqliyyat, Rabitə və Yüksək Texnologiyalar Nazirliyinin innovativ məhsul və xidmətlərin, startapçıların uğurlu tətbiqlərinin nümayiş olunduğu pavilyonu da fəaliyyət göstərir.

AZƏRTAC xəbər verir ki, oktyabrın 25-də Heydər Əliyev Fondunun vitse-prezidenti Leyla Əliyeva pavilyonla tanış olub.

İnnovativ məhsul və xidmətlərin, startapçıların uğurlu tətbiqlərinin nümayiş olunduğu pavilyon “Robopark”, “I2B İdeyadan Biznesə”, “Startaplar” və “Kommersiyalaşdırılmış layihələr” zonalarından ibarətdir.

Nəqliyyat, rabitə və yüksək texnologiyalar naziri Ramin Quluzadə pavilyonla tanış olan Heydər Əliyev Fondunun vitse-prezidenti Leyla Əliyevaya məlumat verdi ki, ümumilikdə pavilyonda robotiks kursları, dronlar, küləklə işləyən cihazlar, xilasedici, rəngləri tanıyıb müvafiq qaydada ayıra bilən, müxtəlif əşyaların yerini təyin edən robotlar nümayiş olunur. Pavilyonun kommersiyalaşdırılmış layihələr bölməsində Azərbaycanın rəqəmsal mədəni irsinin də təbliğ olunduğu “Google Art & Culture” beynəlxalq rəqəmli incəsənət və mədəniyyət platforması fəaliyyət göstərir. Belə ki, yüzlərlə təşkilat, müxtəlif tədbirlər, obyektlər, eləcə də bir neçə Azərbaycan muzeyinin rəqəmli kontentləri bu platformada cəmləşib. Bölmədə ziyarətçilərin diqqətini çəkəcək “Virtual cərrahiyyə” də təqdim olunur. Bu layihə rəqəmli texnologiyaların tətbiqi vasitəsilə bərpaedici cərrahiyyədə yüksək funksional və estetik nəticələr əldə etməyə imkan verir. Sözügedən layihələrin hər biri Nəqliyyat, Rabitə və Yüksək Texnologiyalar Nazirliyinin yanında İnformasiya Texnologiyalarının İnkişafı Dövlət Fondundan qrant alıb və Yüksək Texnologiyalar Parkının rezidenti olan startap layihələridir.

Bundan başqa, pavilyonda “İdeyadan Biznesə” layihəsi çərçivəsində həm respublikanın ayrı-ayrı regionlarında, həm də Bakı şəhərində yerləşən ali təhsil ocaqlarından seçilən 3 qalib startapçı öz layihələrini təqdim edir. Bunlar “Xilaskar qolbaq”, “Ağıllı ev” və “Virtual tur” layihələridir. “Xilaskar qolbaq” insan təzyiqində qeydə alınan problemlərlə bağlı yaxınlıqdakı tibb məntəqələrinə və ya sahə həkimlərinə məlumatların ötürülməsini təmin edir. “Ağıllı ev” məişət cihazlarının məsafədən idarə olunmasına hesablanıb. “Virtual tur” isə onlayn rejimdə turizm obyektlərinin müəyyən edilməsi, bronlaşdırılması üzrə tətbiqdir. Xaricdə təhsil alan startapçılar da nazirliyin pavilyonunda öz məhsullarını təqdim etmək şansı qazanıblar.

Diqqətə çatdırılıb ki, xaricdə təhsil alan startapçılar da nazirliyin pavilyonunda öz məhsullarını təqdim etmək şansı qazanıblar. Belə ki, Estoniyada magistr təhsili alan startapçıların “ZoomX” şirkəti görmə qabiliyyətinin balanslaşdırılmasına xidmət edən eynəklərini nümayiş etdirir.

Layihə nəticəsində mobil tətbiqetmə vasitəsilə idarə olunan və istifadəçiyə eynəyin nömrəsini (-6; +3 aralığında) öz görmə qabiliyyətinə uyğun tənzimləməyə imkan verən “ZoomX” dəyişən fokuslu dinamik eynək prototipidir. Həmçinin monitor vasitəsilə məkanları müşahidə edə bilən virtual reallıq (VR) eynəkləri də təqdim edilir.

Pavilyonun digər eksponatı - avtomobil sürücüləri üçün nəzərdə tutulan “Wake me Up” tətbiqi logistika, sərnişindaşıma və uzaq məsafə qət edən sürücülər üçün faydalıdır. Proqram təminatı ilə işləyən rahat və innovativ qurğu insanların planlaşdırılmamış yuxulamasının qarşısını alır. Belə ki, göz qapağının hərəkətinə əsaslanan qurğu insanın yatmış və yaxud oyaq olmasını müəyyən edir. Əgər göz qapağı üç saniyədən artıq qapalı olarsa, bu, o deməkdir ki, insan yatıb. Bunu müəyyən edən sensor dərhal xüsusi alqoritmlə işləyən emal qurğusuna məlumatı göndərir.

Sərgidə təqdim edilən “Camtouch” tətbiqi isə kompüterin “mouse”u vasitəsilə istənilən statik şəkili hərəkətə gətirir.

Sosial əhəmiyyətli “Braille teach” cihazı görmə qabiliyyəti məhdud şəxslərin barmaq toxunuşu ilə əlifbanı öyrənməsini asanlaşdırır.

Pavilyon “InnoExpo” adı altında “İnnovasiyalar həftəsi” çərçivəsində Heydər Əliyev Mərkəzində keçiriləcək tədbirlər zamanı da öz işini davam etdirəcək. Bu zaman sərgidə “Qlobal İnfluenser Günü”nün təşkilatçıları olan “Keepface DMCC” və “FA International Trade Events” tərəfindən innovativ startap layihələri və xidmətlər nümayiş olunacaq.

Qeyd edək ki, oktyabrın 26-30-da Heydər Əliyev Mərkəzində “Bilik İqtisadiyyatı – “Azərbaycanın İnnovasiya Yol Xəritəsi Layihəsinin təqdimatı”, “İdeyadan Biznesə” startap turunun finalı, “Qlobal İnfluenserlər Günü”, “AzInTelecom”dan təhlükəsiz bulud infrastrukturu” konfransları, “Baku Open Cyber Cup” kiberidman turniri, “Əqli mülkiyyət hüquqları” ilə bağlı seminar və “İKT karyera trendləri” konfransı keçiriləcək.

Azərbaycan.- 2018.-26 oktyabr.- S.7.