Mingəçevir Sənaye Parkı “Made in Azerbaijan” markası ilə beynəlxalq bazara çıxır

Nazirlər Kabinetinin 2018-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunan iclasında Prezident İlham Əliyev qazanılmış nailiyyətləri daha da möhkəmləndirmək üçün iqtisadi resurslardan, mütərəqqi texnologiyalardan, əmək ehtiyatlarından səmərəli istifadə etmək zərurətini vurğulamış, qeyri-neft sektorunun uğurlu nəticələrindən söz açanda Mingəçevir Sənaye Parkı barədə demişdir: "Bu parkda 2 böyük iplik fabriki işləyir. Orada 750 insan işlə təmin olunub. Orada işləyənlər əsasən qadınlardır. Bu iplik fabriklərinə 80 milyon dollar sərmayə qoyulub. Bu, bizim ixrac imkanlarımızı genişləndirir və biz mahlıcı orada ipə çevirərək artıq daha da valyutatutumlu məhsul ixrac edirik. Bu prosesin davamı olmalıdır ki, biz artıq hazır məhsula da nail ola bilək”.

Mingəçevir Sənaye Parkı ilk addımlarını çox inamla atır. 2018-ci ilin fevral ayında fəaliyyətə başlayan Mingəçevir Tekstil MMC-nin hələlik 2 iplik fabriki işə düşüb. Fabriklərin ümumi dəyəri 144 milyon manatdır. İplik fabriklərinin qurulmasında İqtisadiyyat Nazirliyinin Sahibkarlığa Kömək Milli Fondunun güzəştli kredit imkanlarından da istifadə edilmişdir. Müasir tələblərə cavab verən ən son texnologiyalar əsasında yaradılmış bu fabriklər Almaniya, İsverçə, Türkiyə, İspaniya və Yaponiyanın aparıcı şirkətlərindən gətirilən avadanlıqlarla təchiz olunmuşdur. Fabriklərdə 10 min ton "Rinq”, 10 min ton isə "Open End” üsulu ilə müxtəlif cür iplik istehsalı nəzərdə tutulub.

Sənaye parkının direktoru, gənc mütəxəssis Mehman Hüseynov söhbət zamanı dedi:

- Prezident İlham Əliyevin ölkədə qeyri-neft sektorunu inkişaf etdirmək məqsədilə imzaladığı sənədlər, verdiyi tapşırıq və tövsiyələr, sahibkarlara böyük və davamlı dövlət qayğısı qazanılan uğurların əsas şərtidir. Regionların sosial-iqtisadi inkişafına dair Dövlət Proqramının üçüncüsünün də icrası başa çatmaq üzrədir. "Mingəçevir Tekstil”də istehsal edilən yüksəkkeyfiyyətli pambıq ipliyi "Made in Azerbaijan” markası ilə artıq beynəlxalq bazara çıxarılır. Türkiyə, Rusiya şirkətləri ilə uğurlu ticarət əlaqələri qurmuşuq. Çin sənayeçiləri ilə işgüzar danışıqlar aparırıq. Əminik ki, yaxın günlərdə Çinə ilk iplik karvanı yola salacağıq.

Mingəçevir Sənaye Parkı ilk addımlarını atır. Qarşıda görüləsi işlər daha çoxdur. Sənaye parkında yüngül sənaye məhsulları, o cümlədən iplik, boyama, toxuma, tikiş, corab, ayaqqabı və tibbi kosmetika istehsalı üzrə 9 fabrik fəaliyyət göstərəcəkdir. Bu məqsədlə 150-200 milyon ABŞ dolları həcmində investisiya qoyulacağı, 5.500-dən çox yeni iş yerinin açılacağı nəzərdə tutulub.

İnsan resursları departamentinin direktoru Habil Salmanovla birlikdə parkın ayrı-ayrı sahələrini gəzib fabriklərdə iş prosesi ilə tanış olduq. Hər yerdə səliqə-sahman, işlərin səmərəli təşkili diqqət çəkirdi. Texniki təhlükəsizlik qaydalarına ciddi əməl olunur.

Nofəl Salmanov fabrikin qayğılarından söz düşəndə dedi:

- Əsas qayğımız kadr ehtiyatı yaratmaqla bağlıdır. Xüsusi hazırlıq keçmədən fabrikdəki yeni nəsil avadanlıqları idarə etmək qeyri-mümkündür. Hansı xarici şirkətlərdən avadanlıqlar almışıqsa, onlarla əvvəlcədən razılaşmamız olub. Həmin şirkətlər öz mütəxəssislərini göndərir, onlar da burada işə götürülənlərə yeni dəzgahlarda işləməyi öyrədirlər. Bacarıqlı kadrlar hazırlamaq üçün Gəncə Texnologiya Universiteti ilə də müqavilə bağlamışıq. Orada bizim istəyimizlə yeni kafedra yaradılmışdır. Tələbələrin istehsalat təcrübəsini bizim fabrikdə keçəcəkləri nəzərdə tutulub.

Fabrikdə Türkiyədən gələn təcrübəli mütəxəssislər də çalışır. Onlardan birinin - İbrahim Kalaylının Türkiyə iplik sənayesində 30 ildən çox təcrübəsi var. Mingəçevir Sənaye Parkının bünövrəsi qoyulandan buradadır. Azərbaycanlı qızla ailə qurub. Ayişənur Səlvər adlı bir qızları var.

Fabrik müdiri İbrahim Kalaylı təcrübəsi, bilik və bacarığı, başlıcası hər kəsdə xoş ovqat yaradan səmimiyyəti ilə kollektivin hörmətini qazanmışdır. Öz təcrübəsini də gənclərə həvəslə öyrədir.

Üç növbə işləyən fabrikdə çalışanlar qayğı ilə əhatə olunublar. Hər növbədə işçilərə bir dəfə fabrikin hesabına yemək verilir. Burada həkim məntəqəsi də var.

Bir sözlə, "Mingəçevir tekstil” hələ ilk addımlarını atır. Həftələr, aylar ötdükcə bu addım daha möhkəm olur.

Lazım QULİYEV

Azərbaycan.- 2018.- 26 oktyabr. - S.10.