İlham Əliyevdən beynəlxalq birliyə Qarabağ mesajı

Azərbaycan ərazi bütövlüyünü bərpa etmək üçün bütün imkanlarından istifadə edəcək, bunun sonu isə Ermənistan üçün çox pis olacaq

"Dağlıq Qarabağ heç vaxt Azərbaycanın suverenliyindən kənarda heç bir status almayacaq. Heç vaxt Azərbaycan xalqı və dövləti imkan verməyəcək ki, onun əzəli, tarixi, hüquqi torpağı ondan ayrılsın. Qoy Ermənistan bu xülyalarla yaşamasın. Qoy Ermənistan rəhbərliyi öz xalqını aldatmasın. Biz bütün imkanlardan istifadə edirik və edəcəyik ki, ərazi bütövlüyümüzü bərpa edək və bu istiqamətdə çox önəmli addımlar atılmışdır”.

Azərbaycan parlamentinin yaranmasının 100 illiyinə həsr edilmiş təntənəli iclasda ölkəmizin keçdiyi müstəqillik yolundan və qısa müddətdə qazanılan böyük uğurlardan söz açan Prezident İlham Əliyev bir daha həm işğalçı Ermənistana, həm də beynəlxalq birliyə Dağlıq Qarabağ münaqişəsi ilə bağlı ciddi mesajlar ünvanladı.

Azərbaycan öz prinsipial mövqeyindən geri dönməyəcək

İştirak etdiyi bütün beynəlxalq konfranslarda - BMT, NATO, Avropa Şurasının və digər qurumların təşkil etdikləri iclaslarda, sessiyalarda, forumlarda hər zaman Azərbaycan gerçəkliklərini dünyaya bəyan edən, haqq səsimizi beynəlxalq ictimaiyyətə çatdıran İlham Əliyev yubiley mərasimində öz prinsipial mövqeyini bir daha ortaya qoydu. Azərbaycana təşrif buyurmuş yüzlərlə parlamentari, hökumət rəsmiləri qarşısında qətiyyətli çıxışı ilə həm bəzi qüvvələrə xəbərdarlıq etdi, həm də xalqımızı bir daha əmin etdi ki, əzəli torpaqlarımız düşmən tapdağında çox qalmayacaq. Azərbaycan hansı yolla olur-olsun öz ərazi bütövlüyünü təmin edəcək.

Proqram xarakterli çıxışında şərəfli yolumuzun hansı çətinliklərdən keçdiyini diqqətə çatdıran dövlət başçısı Dağlıq Qarabağ münaqişəsinin həllinin Azərbaycan üçün hər zaman prioritet istiqamət olduğunu və ölkəmizin öz prinsipial mövqeyindən geri dönməyəcəyini qətiyyətlə söylədi.

Dağlıq Qarabağ münaqişəsi ən böyük ədalətsizlikdir

Bu gün dünya birliyi də qəbul edir ki, Dağlıq Qarabağ Azərbaycanın əzəli və tarixi torpağıdır. Əsrlər boyu Azərbaycan xalqı bu torpaqlarda yaşayıb, yaradıb. Bu torpaqların tarixi toponimləri, abidələri, milli irsimiz bunu bir daha təsdiqləyir. Lakin bu gün həmin torpaqlar işğal altındadır. Nəinki Dağlıq Qarabağ, onun ətrafında yerləşən yeddi rayon da Ermənistan tərəfindən işğal edilib.

İşğal altında olan şəhər və rayonlarımızdakı bütün infrastruktur dağıdılıb. Azərbaycan dövlətinə, xalqına məxsus bütün milli sərvətlər talan olunub, tarixi abidələrimiz, məscidlərimiz yerlə yeksan edilib. Əksər beynəlxalq təşkilatın hesabatlarında bu məlumatlar öz əksini tapsa da, bu günə qədər ermənilərə bir xəbərdarlıq belə edilməyib. Səbəb isə hər kəsə bəllidir.

Ona görə də dövlət başçısı Ermənistan-Azərbaycan, Dağlıq Qarabağ münaqişəsini ən böyük ədalətsizlik adlandırır: "Bütün beynəlxalq təşkilatlar münaqişə ilə bağlı qərar və qətnamələr qəbul etmişlər. Onların arasında əlbəttə ki, BMT Təhlükəsizlik Şurasının dörd qətnaməsini xüsusilə qeyd etmək istərdim. Bu qətnamələrdə açıq-aydın deyilir ki, erməni silahlı qüvvələri işğal edilmiş torpaqlardan dərhal və qeyd-şərtsiz çıxarılmalıdır. Ermənistan 20 ildən çoxdur ki, bu qətnamələrə əməl etmir, onlara məhəl qoymur və beləliklə, öz işğalçılıq siyasətini davam etdirir. Əfsuslar olsun ki, beynəlxalq təşkilatlar da Ermənistana qarşı heç bir sanksiya tətbiq etmir. Hesab edirəm, bunun vaxtı gəlib çatıb ki, işğalçıya qarşı çox ciddi tədbirlər görülsün və bu, ədalətli olardı”.

BMT Təhlükəsizlik Şurasının qətnamələri nədən hələ də kağız üzərində qalır?

Azərbaycan Prezidenti bu məsələdə beynəlxalq təşkilatları da qınadı və bəyan etdi ki, özünü nüfuzlu təşkilat hesab edən bəzi qurumların qəbul etdikləri qətnamələrin, qərarların kağız üzərində qalması sadəcə təəssüf doğurur. Çünki bu təşkilatların başqa problemlə bağlı qəbul etdikləri qətnamələrə əsasən dərhal sərt sanksiyalar tətbiq edilir, cəza kəsilir. Lakin Azərbaycan dövlətinin xeyrinə qəbul edilmiş sənədlər icrasız qalır. Səbəb yenə bəllidir - ikili standartlar.

İlham Əliyev məsələ ilə bağlı beynəlxalq təşkilatların fəaliyyət mexanizmlərinə nəzər yetirilməsinin vacibliyini bildirdi: "Əgər dünyanın ən ali orqanı olan BMT Təhlükəsizlik Şurasının qətnamələri yerinə yetirilmirsə, onda əlbəttə ki, bu orqanın nüfuzu o qədər də yüksək səviyyədə ola bilməz. Münaqişənin həllinin bir yolu var. Ermənistan silahlı qüvvələri bizim torpaqlarımızdan çıxarılmalıdır, Azərbaycan öz ərazi bütövlüyünü bərpa etməlidir və ondan sonra bölgədə sülh yarana bilər. Azərbaycanın ərazi bütövlüyü isə bütün dünya tərəfindən tanınır. Bütün ölkələr Azərbaycanın ərazi bütövlüyünü dəstəkləyir və Dağlıq Qarabağ Azərbaycanın ayrılmaz hissəsidir”.

İlham Əliyev Ermənistanın yeni rəhbərliyinə çıxış yolu göstərdi

Prezident İlham Əliyev bu məsələdə işğalçı Ermənistanın yeni rəhbərliyinə də sərt mesajlarını ünvanladı və bir daha xatırlatdı ki, bu ölkəni hərbi-xunta kimi 20 il idarə edən rejimin çökməsi məhz erməni xalqının artıq bu münaqişədən bezdiyini, işğal olunmuş torpaqların geri qaytarılaraq sülh sazişinin imzalanmasının vacibliyini bir daha təsdiqlədi. Ona görə də ölkənin yeni rəhbərliyi siyasətində düzəlişlər etməlidir.

Təəssüf ki, bu gün Ermənistandan səslənən çox ziddiyyətli və bəzən cəfəng fikirlər münaqişənin həllinə yox, onun dərinləşməsinə xidmət göstərir. Azərbaycan öz prinsipial mövqeyindən geri dönməyəcək. Dağlıq Qarabağ əzəli və tarixi olduğu kimi həm də beynəlxalq hüquq baxımından da Azərbaycan torpağıdır. Lakin yeni hökumət tərəfindən atılan addımlar onu göstərir ki, bu adamların heç bir biliyi, hazırlığı yoxdur və bu, nəinki Ermənistan üçün, bölgə üçün böyük təhlükə mənbəyidir: "Yeni hökumət də eyni yolla getmək istəyir. Bu ağır, çətin vəziyyətdən xilas üçün Ermənistanın yeganə yolu var, o da bizim torpaqlarımızdan çıxmaqdır. Ondan sonra onların inkişafı üçün şərait yaradıla bilər. Əgər onlar işğalçılıq siyasətini davam etdirmək istəyirlərsə, bilməlidirlər ki, bunun axırı olmayacaq. Bunun axırı onlar üçün çox pis olacaq”.

Beynəlxalq təşkilatların əksəriyyəti Azərbaycanın mövqeyini dəstəkləyir

Qəbul edilən sənədlərdən söz açan Prezident bir daha xatırlatdı ki, əksər beynəlxalq qurumlar - BMT Təhlükəsizlik Şurası, BMT-nin Baş Assambleyası, ATƏT, AŞ PA, Qoşulmama Hərəkatı, İslam Əməkdaşlıq Təşkilatı, Avropa Parlamenti və digər təşkilatlar Azərbaycanın mövqeyini dəstəkləyirlər.

Bu il isə Azərbaycan ilə Avropa İttifaqı arasında imzalanan Tərəfdaşlıq Prioritetləri adlı sənəddə Azərbaycanın suverenliyi, sərhədlərinin toxunulmazlığı, ərazi bütövlüyü məsələsinə də dəstək nümayiş olunub. Bundan başqa, İslam Əməkdaşlıq Təşkilatı dəfələrlə münaqişə ilə bağlı qətnamələr qəbul edib.

Dövlət başçısı bu istiqamətdə Milli Məclisin deputatlarının da fəaliyyətini təqdir edərək bildirdi ki, parlamentdə bir çox partiyaların nümayəndələri fəaliyyət göstərsə də milli maraqlarla bağlı məsələlərdə onlar bir nöqtəyə vurur və vətənpərvərlik göstərirlər. Azərbaycan deputatları beynəlxalq təşkilatlar çərçivəsində çox fəal iş aparırlar. Deputatların fəaliyyətinin əsas istiqaməti Ermənistan-Azərbaycan Dağlıq Qarabağ münaqişəsi ilə bağlı dünya birliyinə, öz həmkarlarına həqiqətlərin çatdırılmasıdır. Bu işdə çox böyük uğurlara nail olunub. Son illərdə bir neçə təşkilat, o cümlədən AŞ PA, Avropa Parlamenti Dağlıq Qarabağ münaqişəsi ilə bağlı ədalətli, beynəlxalq hüquqa söykənən, Azərbaycanın ərazi bütövlüyünü dəstəkləyən qətnamələr qəbul ediblər.

Müharibə başlasa, ən ağır zərbəni Ermənistan alacaq

Prezident Azərbaycan və Ermənistan arasında qısa müqayisə də apardı. Əlbəttə ki, hər kəs işğalçı ölkənin hansı durumda olduğunu çox yaxşı görür. Ermənistanla Azərbaycan arasında fərq yerlə-göy qədərdir. Bu gün Azərbaycan iqtisadi cəhətdən inkişafda olan, Ermənistan isə yoxsul, başqasının əlinə baxan, ianələrlə dolanan bir ölkədir. Bir sözlə, son 15 ildə Azərbaycanın əldə etdiyi uğurlar və bu müddətdə işğalçı ölkənin düşdüyü durum göz önündədir.

2003-cü ildə 1,8 milyard dollar valyuta ehtiyatı olan Azərbaycan bu gün həmin rəqəmi 44,3 milyard dollara yüksəldib. 15 ildə ölkə iqtisadiyyatına 250 milyard dollar sərmayə yatırılıb. Bunun yarısı xarici sərmayədir. Yəni iqtisadi inkişaf tempinə görə dünyada son 15 ildə Azərbaycan qədər inkişaf edən ikinci ölkə olmayıb.

Ermənistan isə uğursuz dövlətdir. Bu uğursuzluq, əslində, onların işğalçılıq siyasəti nəticəsində baş verib. Əgər işğalçılıq siyasəti olmasaydı, Azərbaycanın imkanlarından faydalana bilərdilər: "Azərbaycansız bölgədə heç bir təşəbbüs, heç bir layihə həyata keçirilə bilməz və getdikcə ölkəmizin gücü - siyasi çəkisi, iqtisadi potensialı, hərbi gücü artır, beynəlxalq mövqeləri möhkəmlənir. Lakin buna baxmayaraq Ermənistanın qeyri-adekvat addımları, hərəkətləri, yüksək kürsülərdən səslənən bəyanatları bu ölkəni daha da ağır vəziyyətə salacaq. Onunla bizim işimiz yoxdur. Amma bu, münaqişənin həlli üçün indi böyük problemə çevrilir”.

Qətiyyətli, prinsipial siyasətin davam etdiriləcəyini vurğulayan İlham Əliyev bəyan etdi ki, uğurla inkişaf edən Azərbaycan həm də öz ordusuna güvənir. Bu gün beynəlxalq reytinqlərə görə, Azərbaycan Ordusu dünya miqyasında 50 ən güclü ordu sırasındadır. Azərbaycan Silahlı Qüvvələri istənilən döyüş tapşırığını yerinə yetirməyə, işğal altında olan torpaqları tez bir zamanda düşməndən azad etməyə qadirdir. Əgər Ermənistanın bugünkü mövqeyi çox davam edərsə, Azərbaycan üçün müharibədən başqa çıxış yolu qalmayacaq və yenə də ən ağır zərbəni Ermənistan alacaq.

Rəşad BAXŞƏLİYEV

Azərbaycan.- 2018.- 29 sentyabr.- S.1; 3.