Azərbaycan Xalça Muzeyində vətənə qaytarılan qədim xalçalar təqdim olunub

Sentyabrın 28-də Azərbaycan Xalça Muzeyində muzeyə hədiyyə olunmuş XVII əsrə aid “Naxçıvan” və XIX əsrə aid Qubanın “Hacıqayıb” xalçalarının təqdimatı keçirilib.

AZƏRTAC xəbər verir ki, təqdimat mərasimində Azərbaycan Xalça Muzeyinin direktoru, Əməkdar mədəniyyət işçisi Şirin Məlikova çıxış edərək bildirib ki, tədbir Heydər Əliyev Fondunun təşkilatçılığı ilə keçirilən Nəsimi – şeir, incəsənət və mənəviyyat Festivalı çərçivəsində təşkil olunub. Festival günləri çərçivəsində Şamaxıda və paytaxtımızın müxtəlif yerlərində - sərgi salonlarında, muzeylərdə, açıq səma altinda, konsert zallarında bir-birindən fərqli və maraqlı proqramlar təşkil olunur. Festivalda iştirak etmək üçün dünyanın müxtəlif ölkələrindən qonaqlar gəliblər. Azərbaycan Xalça Muzeyinin də bu festivalda yaxından iştirak etməsi məmnunluq hissi doğurur.

Xalça Muzeyinə hədiyyə olunan iki yeni eksponat barədə məlumat verən Ş.Məlikova bildirib ki, hər iki xalça Azərbaycan Xalça Muzeyinin “Nadir Azərbaycan xalça nümunələrinin tarixi Vətəninə qaytarılması” layihəsi çərçivəsində muzeyə hədiyyə olunub. XVII əsrə aid “Naxçıvan” xalçası Heydər Əliyev Fondunun təşəbbüsü ilə ölkəyə qaytarılaraq muzeyin kolleksiyasının incisinə çevrilib. Xalçanın ara sahəsi mücərrəd formalı “Çələbi” gölü və irihəcmli palmetta elementləri ilə bəzədilib. Naxışlarda ağ, qızılı, göy və digər rənglərin harmonik vəhdəti kompozisiyaya xüsusi gözəllik verir. Xalçanın iri ölçüsü, yüksək peşəkarlıqla yaradılmış kompozisiyası və rənglərin harmoniyası onun böyük karxanalarda xüsusi sifarişlə toxunduğunu sübut edir.

Qeyd olunub ki, bu sənət nümunəsi Heydər Əliyev Fondunun muzeyə hədiyyə etdiyi üçüncü eksponatdır. Fond bundan öncə muzeyə XVII əsrə aid Qarabağın “Xətai” xalçasını və XVIII əsrə aid tikmə hədiyyə edib.

Ş.Məlikova deyib ki, XIX əsrə aid Qubanın “Hacıqayıb” xalçasını isə Azərbaycan Xalça Muzeyinə italiyalı kolleksioner Mirko Kattai hədiyyə edib. Quba-Şirvan növlü xalçaların qədim nümunələrindən olan “Hacıqayıb” Qubanın eyni adlı kəndinin adı ilə bağlıdır. Xalçanın ara sahəsini “kilimgülü”, “kətəbə” və “burma” elementləri təşkil edir. “Şamdan” və “əjdaha” elementli haşiyə qurşağı xalçanın yalnız yuxarı tərəfini təşkil etdiyindən kompozisiyaya xüsusi özəllik verir. Xalçanın rəng çalarları ahəngdar və sabitdir.

Direktorunun verdiyi məlumata görə, muzeyin “Xovlu xalçalar” kolleksiyası 2018-ci il ərzində bu sənət nümunələri daxil olmaqla 6 nadir xalça ilə zənginləşib.

Mədəniyyət Nazirliyinin Aparat rəhbəri Fikrət Babayev bildirib ki, muzeyin milli-mədəni sərvətlərimizin ölkəmizə qaytarılması istiqamətində həyata keçirdiyi layihə təqdirəlayiqdir. Xalça Muzeyinin məqsədyönlü tədbirləri nəticəsində muzeyə bir neçə əsr bundan əvvələ aid unikal xalçalar gətirilib və burada nümayiş olunur. “Bu iş daha da genişləndirilməli, dünyanın müxtəlif kolleksiyalarında mövcud olan Azərbaycan xalçaları ölkəmizə gətirilərək sərgilənməlidir. Bu işdə əməyi keçən hər kəsə təşəkkürümü bildirirəm”, - deyə F.Babayev qeyd edib.

İtaliyalı kolleksioner Mirko Kattai Xalça Muzeyinə təqdim etdiyi xalçanın artıq etibarlı əllərdə olmasından məmnunluğunu bildirib, muzeyin əməkdaşlarına uğurlar arzulayıb.

Sonra tədbir iştirakçıları muzeyin yeni eksponatları ilə tanış olublar.

Tədbir “Muğam və Ruh” qrupu və Azərbaycan Milli Konservatoriyasının “Əsrlərin sədası” qədim musiqi alətləri ansamblının çıxışları ilə davam edib.

Azərbaycan.- 2018.- 29 sentyabr.- S.7.