Yeni Azərbaycan Partiyası islahatlara layiqli töhfə verir

Cəmiyyətlərin, dövlətlərin həyatında baş verən köklü dəyişikliklər hər zaman bunları gerçəkləşdirən liderlərin adı ilə bağlıdır. Azərbaycanda da belədir. Əsası Ümummilli Lider Heydər Əliyev tərəfindən qoyulmuş və İlham Əliyev tərəfindən davam etdirilən sabitlik və inkişaf strategiyasının nəticəsi olaraq respublikamız tarixinin məsuliyyətli, lakin çox şərəfli, böyük irəliləyişlər, inkişaf və yüksəliş dövrünü yaşamaqdadır. Hər il yeni nailiyyətlərin qazanılması ölkəmizin mühüm reallıqlarından biridir. Fərəhli haldır ki, əldə olunan uğurlar kampaniya şəklində deyil, davamlı və ardıcıldır.

Hədəf daha güclü və qüdrətli dövlət qurmaqdır

Bu siyasətin mahiyyətinə uyğun olaraq Azərbaycan həm də müasirləşmə, yeniləşmə və çoxsahəli islahatlar yolu ilə inamla irəliləyir. Bunun nəticəsidir ki, respublikamız çağdaş dövrün çağırışlarına cavab verən, zamanın reallıqlarına uyğun inkişaf yolundadır. Xüsusən ötən ilin aprelində keçirilən prezident seçkilərində növbəti dəfə xalqın etimadını qazanan İlham Əliyev islahatların davam etdiriləcəyini bəyan etdi. Seçkilərdən ötən dövrün reallıqları göstərir ki, cənab İlham Əliyev islahatların yalnız iqtisadi sfera ilə məhdudlaşmayaraq digər sahələrdə həyata keçirilməsini məqsədəuyğun sayır. Bir müddət əvvəl Prezident İlham Əliyev islahatların alternativinin olmadığını və digər sahələrdə də bu işləri həyata keçirmək üçün sənədlər paketinin hazırlandığını bildirərək demişdi: "İslahatlar dərinləşəcək. İslahatlara alternativ yoxdur. Siyasi islahatlar, iqtisadi islahatlar, sosial sahədə islahatlar, məhkəmə-hüquq sistemində islahatlar, - artıq müvafiq göstərişlər verilib və sənədlər paketi hazırlanır, - təhsil, səhiyyə sahələrində, hər bir sahədə, Azərbaycan yeni dövrə qədəm qoyub. Azərbaycan yeniləşir, Azərbaycan güclənir və müasirləşir. Biz dərin milli-mənəvi köklər üzərində güclü dövlət qurmuşuq. Azərbaycan tarixdə heç vaxt indiki qədər güclü olmamışdır. Ancaq bu o demək deyil ki, əldə edilmiş bu nailiyyətlərlə kifayətlənməliyik. Əldə edilmiş nailiyyətlər bizi gələcəyə daha da nikbinliklə baxmağa həvəsləndirir, buna sövq edir”.

Qeyd edək ki, cənab Prezidentin təşəbbüsləri və imzaladığı sərəncamlarla bu ilin yanvar ayından başlanan struktur islahatlarının əsas məqsədi idarəetmədə çevikliyi və səmərəliliyi artırmaq, cəmiyyətdə formalaşan yeni çağırışlara və iqtisadiyyatda baş verən struktur dəyişikliklərinə adekvat uyğunlaşmanı təmin etməkdir. Yeni islahatlar həm də dövlət idarəetməsini iqtisadi inkişafın yeni mərhələsinə uyğunlaşdıracaq. Fevral və iyun aylarında müvafiq fərman və sərəncamlarla iki sosial paketin həyata keçirilməsi isə göstərdi ki, ölkə rəhbərliyinin fəaliyyətinin əsas qayəsini insan amilinin uca tutulması təşkil edir. Ən əsası, bütün bunlar onun təsdiqidir ki, Prezident İlham Əliyev vətəndaş maraqlarının əsl müdafiəçisidir. Təbii ki, respublikamızın davamlı tərəqqisinin təmin edilməsi üçün bütün sahələrdə həyata keçirilən islahatlar məhkəmə-hüquq sisteminin inkişafında yeni mərhələnin başlanmasını və bu sahədə islahatların dərinləşdirilməsini zəruri edirdi. Cənab Prezidentin aprel ayında imzaladığı müvafiq sərəncamla məhkəmə-hüquq islahatlarında yeni keyfiyyət mərhələsi başlayıb. Bu sahədə həyata keçirilən innovativ tədbirlər nəticə etibarilə ölkənin demokratik inkişafına, modernləşməsinə və vətəndaş məmnunluğuna xidmət edən mühüm addımlardır.

Bütün bunlarla yanaşı, ölkədə müasir və şəffaf idarəetmə ilə bağlı uğurlu addımlar atılıb, o cümlədən təşəbbüskar və bilikli gənc kadrlar önə çəkilib. Beləliklə, 2018-ci ilin prezident seçkilərindən sonra başlanan islahatlar Azərbaycanda keyfiyyətcə yeni mərhələnin əsasını qoyub. Göründüyü kimi, yeni islahatların əsas hədəfi Azərbaycanı müasir, inkişaf edən və gələcəkdə inkişaf etmiş ölkəyə çevirmək, mövcud olan nöqsanları aradan qaldırmaq, vətəndaşları narahat edən problemləri tamamilə gündəlikdən çıxarmaq, insanların rifah halını yaxşılaşdırmaq, daha güclü, qüdrətli dövlət qurmaqdır.

YAP-ın təşəbbüsü partiyamıza göstərilən etimadın növbəti təsdiqi olacaq

Prezident İlham Əliyevin həyata keçirdiyi islahat konsepsiyası və onun uğurları cəmiyyətimizdə ciddi müzakirə olunur və insanlar bu islahatları dəstəkləyirlər. Təbii ki, Prezident İlham Əliyevin sədri olduğu Yeni Azərbaycan Partiyası bu islahatların həyata keçirilməsinə öz töhfəsini verir və bundan sonra da verəcək. Bu günlərdə YAP-ı təmsil edən deputatların təşəbbüsü ilə Milli Məclisin buraxılması və növbədənkənar parlament seçkilərinin keçirilməsi üçün Prezidentə müraciətin qəbul edilməsi də partiyamızın bu islahatlara verdiyi dəstəyin və töhfənin növbəti nümunəsidir. YAP üzvləri bu qənaətdədir ki, Prezident İlham Əliyevin rəhbərliyi ilə həyata keçirilən islahatlar qanunverici hakimiyyət sferasından kənarda qalmamalıdır.

Onu da qeyd edim ki, Ulu Öndər Heydər Əliyevin qurucusu olduğu Yeni Azərbaycan Partiyası hakim mövqedə olduğu 1993-cü ildən indiyədək Azərbaycanın inkişafında mühüm rol oynayan güclü siyasi qüvvədir. Partiyamız həmişə vacib məsələləri gündəmə gətirib və onların həllinə nail olub. Təsadüfi deyil ki, partiyamızın Siyasi Şurasının növbədənkənar parlament seçkilərinin keçirilməsi barədə təşəbbüsü də bir neçə gündür ki, ictimaiyyətin ən müxtəlif təbəqələri tərəfindən geniş müzakirə olunmaqda idi. Bu isə ondan xəbər verir ki, YAP-ın bu təşəbbüsü həm də geniş ictimai fikrə söykənir.

YAP üzvü olan deputatların təşəbbüsü ilə dekabrın 2-də parlament tərəfindən qəbul edilən "Azərbaycan Respublikasının Milli Məclisinə növbədənkənar seçkilərin təyin edilməsi haqqında Azərbaycan Respublikasının Prezidentinə müraciət edilməsi barədə” qərarda çox düzgün olaraq yazılır: "Azərbaycan Respublikasının Milli Məclisi ölkədə həyata keçirilən islahatların daha da genişlənməsi və dərinləşməsi prosesindən kənarda qalmamalı, islahatların qanunvericilik orqanını da əhatə etməsi məqsədilə dövlətçilik nümunəsi göstərməlidir. Bu baxımdan, Azərbaycan Respublikasının Milli Məclisində çoxluq təşkil edən Yeni Azərbaycan Partiyasının üzvləri Milli Məclisin Sədrinə müraciət edərək belə vəziyyətdə parlament fəaliyyətinin həyata keçirilməsinin mümkün olmayacağı qənaətinə gəldiklərini və növbədənkənar seçkilər keçirilməsinin zəruri olduğunu bildirmişlər”.

Ümumiyyətlə, parlamentin buraxılması və növbədənkənar parlament seçkilərinin keçirilməsi müxtəlif demokratik ölkələrin timsalında beynəlxalq təcrübədə tez-tez rast gəlinən haldır. Bu kontekstdə bir sıra Avropa ölkələrinin son zamanlar müşahidə olunan təcrübəsinə nəzər yetirmək məqsədə müvafiqdir. Məsələn, bu il Böyük Britaniya, Ukrayna, Xorvatiya kimi ölkələrdə növbədənkənar seçkilər elan olunub. Hətta elə ölkələr var ki, il ərzində iki dəfə qanunverici orqana seçkilər keçirir. Azərbaycanın siyasi həyatında ilk dəfə olmasına baxmayaraq, bunu qeyri-adi formada qiymətləndirməyə ehtiyac yoxdur. Çünki bir sıra ölkələrdə növbədənkənar seçkilər hakimiyyət böhranından, siyasi kataklizmlərdən irəli gələrək keçirilir. Azərbaycanda isə söhbət hakimiyyətin bütün sferalarını əhatə edən yeniləşmədən, müasirləşmədən, islahatlar konsepsiyasının coğrafiyasının genişlənməsindən və bunun zəminində Azərbaycanın daha dinamik inkişafı üçün daha əlverişli, etibarlı imkanların əldə olunmasından gedir.

Lakin onu qeyd etmək yerinə düşər ki, Azərbaycan dövləti sosial-iqtisadi inkişafı hər zaman hüquqi-siyasi təkmilləşmə və demokratikləşmə ilə paralel aparıb. Bu iki istiqamət bir-birini tamamlayıb və quruculuğun inkişaf vəhdətini təşkil edib. İqtisadi yüksəlişi olmayan cəmiyyətdə demokratik meyarların intişar tapması mümkün olmadığı kimi, mükəmməl hüquqi-siyasi prinsiplərin prioritet olmadığı dövlətlərdə də əsaslı sosial-iqtisadi nailiyyətlər əldə edilə bilməz. Bu mənada son sosial-iqtisadi islahatların davamı artıq dövlət idarəetməsinin qanunvericilik hakimiyyəti istiqamətində də aparılacaq.

Azərbaycanda cənab Prezidentin həyata keçirdiyi bu islahatlar öz mahiyyətinə görə postsovet və Şərqi Avropa ölkələrini qabaqlayıb. Təsadüfi deyil ki, aparılan kompleks islahatlar ölkəmizə "dünyada ən islahatçı” ölkə imici qazandırıb. Qanunverici orqanın fəaliyyəti Prezident İlham Əliyevin apardığı məqsədyönlü siyasət sayəsində ölkəmizdə gedən sürətli inkişaf prosesinə adekvat olmalıdır. Bu mənada Azərbaycan parlamentinin də müasirləşməsi, yeniləşməsi, islahatlar sferasına cəlb olunması Prezident İlham Əliyevin islahatlar konsepsiyasının uğurla həyata keçirilməsinə mühüm töhfədir.

YAP-ın bu təşəbbüsü həm də xalqımızın partiyamıza göstərdiyi etimadın növbəti təsdiqi olacaq. Belə ki, Prezident İlham Əliyevin müsbət dəyərləndirəcəyi təqdirdə növbədənkənar parlament seçkiləri keçiriləcək. Bu mənada YAP növbəti seçkilərə getmək iddiasını ortaya qoymaqla özünə əminliyini nümayiş etdirir. Yeni parlament seçkilərində Yeni Azərbaycan Partiyası qazanacağı növbəti uğurunun əsas şərti kimi isə Prezident İlham Əliyevin rəhbərliyi ilə həyata keçirilən mükəmməl siyasi kursa, ölkəmizin yüksəlişinə güvənir.

Aytac ƏLİYEVA,

YAP Gənclər Birliyinin sədr müavini

Azərbaycan.- 2019.-4 dekabr.- S. 4.