“Həmrəyliyimiz: milli-dini birliyimiz” mövzusunda seminar keçirilib

Azərbaycan İlahiyyat İnstitutunda (Aİİ) Azərbaycan Milli Elmlər Akademiyasının (AMEA) müxbir üzvü, AMEA Qafqazşünaslıq İnstitutunun direktoru, Milli Məclisin deputatı Musa Qasımlının təqdimatında "Həmrəyliyimiz: milli-dini birliyimiz” mövzusunda seminar təşkil olunub.

Seminarda çıxış edən Aİİ rəhbəri Ceyhun Məmmədov mövzu barədə fikirlərini bölüşüb. Qeyd edib ki, ölkəmizdə müxtəlif etnik köklərə, dinlərə malik insanlar əsrlər boyu sülh, əmin-amanlıq şəraitində birgə yaşamışlar. Bu həyat tərzi xalqımızın tarixən qəbul etdiyi və mənəvi dəyərinə çevirdiyi xarakterik xüsusiyyətidir. C.Məmmədov vurğulayıb ki, belə tədbirlərin keçirilməsi gənclərimizin maarifləndirilməsi, onlarda Vətənə məhəbbət, torpağa bağlılıq, dövlətə sevgi hisslərinin gücləndirilməsi, milli-mənəvi ruhda yetişməsi baxımından xüsusi əhəmiyyət daşıyır.

Aİİ rektoru daha sonra bildirib ki, ölkəmizdə mövcud olan milli-dini birlik respublikamız müstəqillik qazandıqdan sonra, məhz Ulu Öndər Heydər Əliyevin həyata keçirdiyi dövlət-din siyasətinin məntiqi nəticəsidir. Hazırda bu siyasəti Prezident cənab İlham Əliyev uğurla davam etdirir.

Musa Qasımlı "Həmrəyliyimiz: milli-dini birliyimiz” mövzusunda məruzə edərək, ölkəmizdə milli birliyin əsasında multikultural dəyərlərin dayandığını vurğulayıb. O qeyd edib ki, Azərbaycan müstəqilliyini bərpa etdikdən sonra milli-dini həmrəyliyimizin qorunması dövlət siyasətində prioritet istiqamətə çevrilib. Ulu Öndər Heydər Əliyevin milli-dini birlik və Azərbaycançılıq ideyaları hazırda Azərbaycan Respublikasının Prezidenti cənab İlham Əliyevin rəhbərliyi ilə uğurla həyata keçirilir.

M.Qasımlı daha sonra bildirib ki, dövlət başçının dünya azərbaycanlılarının həmrəyliyinə verdiyi töhfə, ölkə hüdudlarından kənarda yaşayan soydaşlarımızda milli ruhun yüksəldilməsinə yönəlik siyasətin məqsədyönlü fəaliyyətinin tərkib hissəsidir.

Seminar mövzu ətrafında müzakirələrlə davam edib.

X.MURADLI

Azərbaycan.- 2019.-20 dekabr.- S.11.