Demoqrafik göstəricilərimiz müsbətdir

Doğulanların və Azərbaycanı daimi yaşayış yeri seçənlərin sayı artır

2019-cu il aprelin 6-da Azərbaycanın 10 milyonuncu vətəndaşının dünyaya göz açması bütün xalqın sevincinə səbəb oldu. Prezident İlham Əliyev və birinci xanım Mehriban Əliyeva bu münasibətlə körpənin valideynlərini və Azərbaycan xalqını təbrik etdilər.

Bu təbrikə 10 milyon nəfərlik Azərbaycan səs verdi. Hərə sevincini bir cür ifadə etdi. Bakıda və respublikanın bölgələrində ağacəkmə kampaniyaları keçirildi, torpağa qollu-budaqlı ağaclara çevriləcək pöhrələr basdırıldı. Çöhrəsinə təbəssüm qonan insanlar bir-birini təbrik etdi. İstirahət günü paytaxt sakinləri Dənizkənarı Milli Parka axışdı.

Bu qeyri-rəsmi bayram münasibətilə incəsənət ustalarının konsertini dinlədilər, atəşfəşanlığı seyr etdilər.

Körpənin valideynləri - keçmiş Ağdərə rayon sakinləri, hazırda Ağdam rayonunun Baş Güneytəpə kəndində qeydiyyatda olan məcburi köçkünlər Nigar Ocaqova və Rauf Həsənov ailənin ilki olan qıza Mehriban adını verdilər. Dövlət başçısı və birinci xanım Respublika Perinatal Mərkəzinə gələrək 10 milyonuncu vətəndaş Mehriban Həsənovanın valideynləri ilə görüşdülər.

Azərbaycanın 10 milyonuncu sakininin anadan olması sıradan bir hadisə deyildi. Dünyanın bir çox ölkəsində demoqrafik vəziyyətin gərgin olduğu, bəzi yerlərdə əhalinin sayının hətta azaldığı bir zamanda Azərbaycanda doğumun səviyyəsi yüksək olaraq qalır. Yeni doğulanların sayı dünyasını dəyişənlərin sayını iki dəfədən çox üstələyir. Bu da dövlətin həyata keçirdiyi ardıcıl və məqsədyönlü sosial siyasətin nəticəsində mümkün olub. Həmçinin dövlətin ailəyə, anaların və uşaqların sağlamlığına göstərdiyi hərtərəfli dəstəyin nəticəsidir. Son illərdə əhalinin artmasına müəyyən dərəcədə miqrasiya saldosunun müsbət olması - ölkəyə daimi yaşamağa gələnlərin buradan biryolluq köçənlərdən çox olması da təsir göstərir.

Deyilənləri statistik rəqəmlər də təsdiqləyir. Dövlət Statistika Komitəsinin məlumatına görə, 2019-cu il oktyabr ayının 1-i vəziyyətinə ölkə əhalisinin sayı 10 milyon 44 min 466 nəfərə çatıb. Yəni 9 ay ərzində əhalinin sayı 0,6 faiz, yaxud 63 min 9 nəfər artıb.

Dünyasını dəyişənlərin sayına gəldikdə, ölümün səviyyəsi əhalinin hər 1000 nəfərinə hesabı ilə 5,7 olub. 2018-ci ilin eyni vaxtında həmin rəqəm 5,9 idi. Başqa sözlə, müqayisə olunan dövrdə ölkədə ölənlərin sayı 1623 nəfər az olub.

Ölüm hallarının azalmasının səbəbi ölkədə insanların maddi-rifah halının daha da yaxşılaşması, əhalinin sağlamlığının dövlət səviyyəsində qorunmasıdır. Bununla yanaşı, Azərbaycan ailəsinin ənənələri də məsələyə müsbət təsir edir. Axı doğmaların bir-birinə yorulmadan qayğı göstərməsi, yaşlılara hörmət, sevgi, qohumların qarşılıqlı xoş münasibətləri ömrü uzadan şərtlərdir.

Doğumun səviyyəsi isə hər 1000 nəfərə 14,1 təşkil edir. 9 ay ərzində 104 min 702 uşaq dünyaya gəlib. O cümlədən 2454 ailə əkiz, 72-si üçəm, 4-ü isə dördəmlə sevinib.

Doğulanların 53,2 faizi oğlan, 46,8 faizi qız uşaqlarıdır.

9 ay ərzində Azərbaycana daimi yaşamaq üçün 1520 nəfər gələn, ölkədən 1196 nəfər gedən qeydə alınıb. Beləliklə, miqrasiyanın saldosu da müsbət olaraq qalır.

Bunun da səbəbi aydındır. Azərbaycandakı sosial-iqtisadi inkişaf insanların həyatında öz müsbət əksini tapır. Odur ki, buraya köçüb gələnlərin sayı ölkəni həmişəlik tərk edənlərin sayını xeyli üstələyir. Deməli, Azərbaycanda yaşamaq və işləmək xoşdur!

Azərbaycan dövlətinin siyasəti həm də əhalinin artımına hesablanır. Bu, yalnız yeni doğulanlara görə hər ailəyə verilən müavinətlərlə, çoxuşaqlı analara ödənilən aylıq vəsaitlə, uşaqların və qadınların sağlamlığına yönəldilən və digər bu kimi tədbirlərlə məhdudlaşmır. Getdikcə artan əhalinin hərtərəfli ehtiyacını qarşılamaq üçün genişmiqyaslı işlər həyata keçirilir. Bu, uşaq bağçaları və məktəblərin, müalicə ocaqlarının, idman komplekslərinin şəbəkəsinin genişləndirilməsi, ərzaq bolluğu yaradılması, iş yerlərinin açılmasına yönəldilən tədbirlərdir.

"Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının yekunlarına həsr olunan konfransda Prezident İlham Əliyev bu barədə demişdir: "Son 15 il ərzində 2 milyon yeni iş yeri yaradılmışdır. Əhalinin sayı isə 1,6 milyon artmışdır. Bu da çox gözəl göstəricidir. Əhali nə qədər çox olarsa, ölkəmiz də o qədər sürətlə inkişaf edər. Ancaq, əlbəttə, biz bundan sonra da işimizi elə görməliyik ki, iqtisadi inkişaf, iş yerlərinin yaradılması əhalinin artımından daha da sürətli getsin, artan əhali işlə təmin olunsun”.

Necə deyərlər, Azərbaycan dünyaya gələn vətəndaşlarını əliboş qarşılamır. Onların xoşbəxt sabahı üçün indidən geniş tədbirlər görür.

Flora SADIQLI

Azərbaycan.- 2019.- 30 dekabr.- S. 1; 9.