Müstəqil, qürurlu dövlətin qətiyyətli lideri

2019-cu il Azərbaycan tarixində bir çox mühüm və əlamətdar hadisələrlə yadda qaldı. İslahatlar dalğası bir çox sahələri əhatə etdi, Azərbaycan yeni inkişaf mərhələsinə qədəm qoydu, dövlət müstəqilliyini möhkəmləndirdi, beynəlxalq aləmdə nüfuzunu daha da artırdı.

Azərbaycan Respublikasının Prezidenti cənab İlham Əliyev həm ölkə daxilində, həm də xaricində keçirilən tədbirlərdəki çıxışlarında ölkəmizin bugünü və gələcəyi ilə bağlı bir çox vacib məqamlara toxundu, cəmiyyətə mesajlar verdi.

Bu çıxışlar sırasında Prezident İlham Əliyevin 26 noyabr 2019-cu il tarixində Bakı Konqres Mərkəzində Bakı Dövlət Universitetinin (BDU) 100 illik yubiley mərasiminin keçirildiyi tədbirdəki tarixi nitqi xüsusi yer tutur. Prezident İlham Əliyev bu mərasimdəki çıxışında Azərbaycanın müasir dövrü, gələcəyi, milli-mənəvi dəyərlərimiz, elm və təhsil, xarici təhdidlərlə bağlı bir çox vacib məsələyə geniş toxundu, açıq fikirlərini bildirdi.

Sözügedən çıxış cəmiyyətdə böyük əks-səda doğurduğundan bugünədək onun ətrafında geniş müzakirələr aparılır və gələcəkdə də aparılacaq. Prezident İlham Əliyevin nitqində ölkəmizin tarixin müxtəlif mərhələlərində qarşılaşdığı çətinliklərdən və gənclərimizin müasir dövrdə üzləşdiyi təhdidlərdən geniş bəhs olundu, bunlardan çıxış yolları göstərildi, eləcə də dəyərli tövsiyələr verildi.

Prezident öz çıxışına Bakı Dövlət Universitetinin yaranma tarixindən, bu addımı atmaqla Azərbaycan Xalq Cümhuriyyətinin xalqımız qarşısında böyük xidmət göstərdiyindən bəhs etməklə başladı. Bu, ümumilikdə cənab İlham Əliyevin Azərbaycan Xalq Cümhuriyyətinin fəaliyyətinə, qısa müddətdə gördüyü böyük işlərə verdiyi yüksək dəyərin bariz göstəricisi idi.

Daha sonra savadsız cəmiyyətdə güclü dövlət qurmağın mümkün olmadığını bildirən cənab İlham Əliyev Bakı Dövlət Universitetinin yaranma tarixinə, üzləşdiyi çətinliklərə, eləcə də cəmiyyətə verdiyi faydalara faktlarla toxunaraq, 100 il ərzində universitetin 200 minə yaxın məzunu olduğunu, onların arasından görkəmli şəxslər, alimlər, ictimai-siyasi xadimlər, siyasətçilər, mütəxəssislər çıxdığını, bir çoxunun Azərbaycanın hərtərəfli inkişafına öz dəyərli töhfəsini verdiyini qeyd etdi.

Prezident həmçinin bildirdi ki, Azərbaycan xalqının fəxri olan Ümummilli Lider, müasir Azərbaycanın qurucusu Heydər Əliyev də məhz Bakı Dövlət Universitetinin məzunu olub. Heydər Əliyev həm sovet dövründə, həm müstəqillik ərəfəsində, həm də müstəqillik illərində xalq və dövlət qarşısında misilsiz xidmətlər göstərib. Məhz onun rəhbərliyi ilə sovet dövründə Azərbaycan müttəfiq respublikalar arasında ən geridəqalmış sıralardan qabaqcıl yerlərədək yüksəldi. Sovet dönəmində Ulu Öndər 13 il ərzində Azərbaycana hər il "Keçici Qırmızı bayraq” qazandırdı; onun rəhbərliyi ilə vətənimiz böyük uğurlu yol qət etdi, 15 müttəfiq respublika arasında iki donor respublikadan biri oldu.

Universitetin fəxri olan Ümummilli Liderin tarixi xidmətlərinin yalnız təhsillə bağlı fəaliyyətindən bəhs edərkən Prezident qürurla bildirdi ki, Heydər Əliyev bu sahəyə daim böyük diqqət göstərirdi. Azərbaycan gənclərinin keçmiş Sovet İttifaqının aparıcı ali təhsil məktəblərində oxumaları üçün böyük zəhmət çəkib. Sovet məkanında buna oxşar təcrübə yox idi. Hər il təqribən 800-ə yaxın gənc Bakıda imtahan verib keçmiş Sovetlər İttifaqının Moskva, Leninqrad (indiki Sankt-Peterburq - müəl.) və digər böyük şəhərlərindəki qabaqcıl ali məktəblərində təhsil almağa göndərilirdi.

Prezident həmçinin öz çıxışında qeyd etdi ki, Heydər Əliyevin qərarı ilə 1970-ci illərin əvvəllərində Cəmşid Naxçıvanski adına Hərbi Məktəb yaradıldı. O vaxt azərbaycanlılar Sovet Ordusunda az təmsil olunduqlarından Heydər Əliyev çox istəyirdi ki, yerli hərbçilər yetişsin. Sanki bilirdi ki, nə vaxtsa Azərbaycan müstəqillik qazanacaq və bu kadrlar bizə lazım olacaq.

Dövlət başçısı daha sonra vurğuladı ki, gənclərin və tələbələrin məlumatlı olmaları, mənfi, yad təsirlərə uymamaları üçün ölkəmizin müstəqilliyəqədərki dövründə də, müstəqillik illərində də Heydər Əliyev daim xalqın yanında olmuşdur.

20 Yanvar faciəsi baş verdikdən dərhal sonra Ulu Öndərin atdığı addımlardan və bir sıra tarixi xidmətlərindən bəhs edən cənab İlham Əliyev bildirdi ki, lider daim xalqın yanında olmalıdır - necə ki, Heydər Əliyev hər zaman Azərbaycan xalqının yanında idi. Prezident Ümummilli Lideri gənclərə və gələcək nəsillərə nümunə olaraq göstərdi.

Prezident İlham Əliyev "Burada əyləşən gənclər tariximizi düzgün bilməlidirlər” deyərək Xalq Cəbhəsi-Müsavat cütlüyünün xəyanətkar hakimiyyəti dövründə insanların saatlarla çörək növbəsində dayandıqlarını, əlisilahlı quldurların meydan suladıqlarını, şəhərlərimizdə insanların incidildiklərini, oğurlandıqlarını, işgəncələrə məruz qaldıqlarını, jurnalistlərin döyüldüklərini qeyd etdi. Özlərini "demokrat” adlandıran bu ünsürlərin qeyri-insani hərəkətlərindən, onların dövlətə və dövlətçiliyə vurduğu ziyanlardan bəhs edərək, ləl-cəvahirat fondunun talanmasından, ölkənin böhran vəziyyətinə salınmasından danışdı.

Xalqımızın faciələrlə dolu tarixindən söhbət açan Prezident İlham Əliyev əsrlər boyu müstəmləkə vəziyyətində yaşadığımızı xatırlatdı. Həmçinin müstəqilliyimizi istəməyən xarici hərbi missionerlərin o vaxt qəbul edilmiş birinci Dövlət bayrağımızı dəyişdirməsindən, indiki üçrəngli bayrağın təsis edilməsindən, bugünümüzdən və ölkənin inkişaf dinamikliyindən bəhs etdi.

"Gənclər əsas qüvvədir və Azərbaycan gəncləri vətənpərvərdir, Vətəni sevəndirlər, Vətənə bağlıdırlar” söyləyən cənab Prezident müəllimləri məsuliyyətli olmağa, tələbələrə biliklər öyrətməklə yanaşı onları tərbiyə etməyi də tövsiyə etdi. Bu sözlər Azərbaycan Prezidentinin gənclərə inam və etimadının növbəti göstəricisi idi. Bəli, Azərbaycan gəncləri vətənlərini sevirlər, ona bağlıdırlar. Eyni zamanda, onlar öz Prezidentlərinə sadiqdirlər, onun ətrafında sıx birləşiblər.

İlham Əliyev Azərbaycanda tərbiyə işinin yeni müstəviyə qalxmasının zəruriliyini xüsusi vurğuladı. İdeoloji işə yenidən baxılmasının vacibliyini diqqətə çəkən dövlət başçısı bu sahədə zəifliklər və boşluqlar olduğunu bildirdi. "Bizi istəməyən qüvvələr bu boşluqlardan istifadə edirlər” söyləyən cənab Prezident vurğuladı ki, hazırda azad internet şəbəkəsi mövcuddur. Azərbaycanda internet istifadəçilərinin faiz nisbəti 80-ni keçib. Prezident "Ölkəmizdə azad, demokratik cəmiyyət formalaşıb, azad media var. Ona görə istənilən yalanı ortalığa atmaq olar. Ondan sonra bu yalan ətrafında müzakirələr təşkil olunur, bu yalan artıq bir real fakt kimi təqdim edilir və gənclərin beyinlərini zəhərləmək istəyirlər. Biz buna imkan verə bilmərik” ismarıcını verdi. Bu, cənab

İlham Əliyevin müəllimlərə öz işlərinə, gənclərə gələcəkləri ilə bağlı növbəti dəyərli tövsiyəsi idi. Bəli, Cənab Prezidentin də qeyd etdiyi kimi, azad internet şəbəkəsinin olması, müsbət tərəfləri ilə yanaşı, bu gün gənclərin beyinlərini zəhərləmək üçün düşmənlərin əlində ən güclü silahlardan birinə çevrilib. Gəncləri bu təhdidlərdən qorumaq üçün tərbiyə işini gücləndirməli, onlarla daha sıx işləməliyik.

Prezident İlham Əliyev daha sonra bildirdi: "Azərbaycan inkişaf edir. Dünyada bizə rəğbət artır. Təsadüfi deyil ki, dünya birliyinin mütləq əksəriyyətini təşkil edən ölkələr bizə səs verirlər”. Ali Baş Komandan mərasim iştirakçılarının nəzərinə qürurla çatdırdı ki, 155 ölkənin səsi ilə Azərbaycan BMT Təhlükəsizlik Şurasına üzv seçilib: "Özü də necə, 8 il bundan əvvəlki kimi səs topladıq. İndi diplomatlar yaxşı bilirlər ki, adətən səsvermə bir gün ərzində keçirilir və tez bir zamanda yeni üzvlər seçilir. Bizdə isə bu, üç gün çəkdi”.

Prezident bugünün prioritet mövzusu olan Azərbaycanın Qoşulmama Hərəkatına sədrliyindən, Bakıda keçirilən Zirvə görüşündə 120 ölkənin ölkəmizə səs verməsindən, Rusiya Prezidenti Vladimir Putinin dəvəti ilə "Valday” Diskussiya Klubunda iştirakından da danışdı. Mərasim iştirakçılarına bütün dünyaya verdiyi "Qarabağ Azərbaycandır, nida işarəsi” mesajını xatırlatdı.

Daha sonra MDB Zirvə görüşündə iştirakından söhbət açan ölkə rəhbəri dedi ki, MDB məkanında faşistlərə abidə ucaldılmasına yol verə bilmərik. Ermənistanda faşist Qaregin Njdeyə 6 metrlik abidə ucaldılıb, bu, sökülməlidir, bu, qəbuledilməzdir.

Njdenin cinayətkar əməllərindən, casusluğundan, necə həbs olunduğundan və həbsxanada çürüməsindən tarixi faktlarla danışan dövlət başçısı belə bir caniyə heykəl qoyulmasının yolverilməzliyini vurğuladı.

Prezident daha sonra qeyd etdi ki, Ermənistanda hakimiyyət dəyişsə də, ölkənin faşist mahiyyəti dəyişməyib. Bu faşist mahiyyəti bizə qarşı, Türkiyəyə qarşı, müsəlmanlara qarşı nifrətə gedib çıxır. Onlar uşaqlarını da bu ruhda tərbiyə edirlər.

Müsəlman ölkələrinin Ermənistan rəhbərləri ilə münasibətlərindən təəccübünü bildirən Prezident İlham Əliyev nitqini bu notlarla davam etdirdi:

- Mən müsəlman ölkələrinə dəfələrlə müraciət etmişəm. Açıq müraciət etmişəm ki, siz Ermənistanla necə qucaqlaşırsınız? Siz bunların liderlərini necə dəvət edirsiniz? Görmürsünüzmü ki, bunlar bizim məscidlərimizi yerlə bir etdilər? Görmürsünüz ki, bizim məscidləri təhqir etdilər? Gedin, baxın, o şəkillər var, onlar Ağdam məscidini, Şuşa məscidlərini, işğal edilmiş digər torpaqlardakı məscidləri nə günə qoydular? Bu, axı təkcə bizim məscidlərimiz deyil, bütün müsəlman aləminin məscidləridir. Buna necə göz yummaq olar? Necə belə riyakarlıq etmək olar?

Biz dəfələrlə islam həmrəyliyi ilə bağlı tədbirlər keçirmişik, sözümüzü demişik. Bunu davam etdirəcəyik və o faşist Njdeyə ucaldılan abidə də gündəlikdədir. O cinayətkar dövlətlə münasibətlər quran bəzi müsəlman ölkələri bunu edəndə və faşistlərə qucaq açanda heç olmasa o dağılmış məscidlərin təsvirlərini göz önünə gətirsinlər və özlərinə sual versinlər ki, mən kiminlə qucaqlaşıram?!

Bu, Cənab Prezidentin müsəlman ölkələrinin xalqlarına və rəhbərlərinə ermənilərin faşist mahiyyətini açan növbəti mesajı və çağırışı idi.

Prezident İlham Əliyev 2019-cu ildə ölkəmiz üçün əlamətdar olan digər bir tədbirdən də söhbət açdı. Azərbaycan artıq bir çox sahədə olduğu kimi, dinlər və mədəniyyətlərarası dialoqa da mühüm töhfələr verir. Bunu bir çox böyük dünya ölkələri də etiraf və qəbul edirlər. İlham Əliyev qeyd etdi ki, noyabr ayında paytaxtımızda Dünya dini liderlərinin II Bakı Sammiti keçirilmişdir, 70 ölkənin dini lideri Bakıya gəlmişdir. Dünyada buna bənzər ikinci yığıncaq yoxdur:

- Mən iclaslarda bir-birinin yanında oturanlara fikir verirdim, əgər onlar başqa yerdə görüşsəydilər bəlkə başqa cür danışardılar. Amma oturublar, bir-birini dinləyirlər, bir-birinə salam verirlər. Biz bunu istəyirik. Çünki dünya başqa istiqamətdə gedir. Deyirlər ki, multikulturalizm ölübdür, yoxdur. Müsəlman miqrantlarını qəfəsdə saxlayırlar, "Stop İslam” deyirlər demokratiya beşikləri. Deyirlər ki, biz miqrantları qəbul edə bilərik, - mən Avropa ölkələrini nəzərdə tuturam, - ancaq müsəlman miqrantları yox. Deyirlər ki, multikulturalizm iflasa uğrayıb. Amma biz göstəririk ki, yox, elə deyil. Bu, siyasi iradədən, baxışlardan asılıdır, sən nə istəyirsən, hansı siyasət yürüdürsən. Bax, biz bu siyasəti yürüdürük. Bu siyasət yeganə düzgün siyasətdir. Əks təqdirdə, gələcək müharibələr, o cümlədən ola bilsin dini müharibələr qaçılmazdır. Ona görə, bax, dini liderlərin Zirvə görüşünün keçirilməsi belə səviyyədə və belə təmsilçiliklə bir daha bizim hörmətimizi, rolumuzu göstərir. Biz nəinki ölkə daxilində, dünya miqyasında bu gün çox önəmli ölkəyə çevrilmişik.

Bəli, bu gün hətta inkişaf etmiş bir sıra Avropa ölkələrində digər mədəniyyətlərə dözümsüzlük, ksenofobiya və islamofobiya hallarının artdığı bir dövrdə dünyanın ayrı-ayrı ölkələrindən müxtəlif dinlərin və mədəniyyətlərin nümayəndələrinin ölkəmizdə bir araya gəlməsi multikulturalizmin ölmədiyini, birgə əməkdaşlığın və qarşılıqlı anlaşmanın mümkün olduğunu, bu işdə Azərbaycanın böyük rol oynadığını və ölkəmizin öz töhfəsini verdiyini göstərir.

Azərbaycanda iqtisadiyyatın inkişafından, kadr islahatlarından, gender bərabərliyindən mərasim iştirakçılarına konkret faktlarla söhbət açan Prezident sanki xalqının ziyalı zümrəsinə ölkə haqqında hesabat verir, dünyada cərəyan edən mürəkkəb prosesləri təhlil etməklə yanaşı, bu problemlərdən xilas və çıxış yollarını da göstərirdi.

On minlərlə mütəxəssis yetişdirən müəllim peşəsindən qürurla danışan dövlət başçısı özünün də əmək fəaliyyətinə müəllim kimi başladığını, bu işin şərəfli və məsuliyyətli olduğunu vurğuladı. Xoş bir təbəssümlə "Mən də müəllim olmuşam, müəllim kimi sizi salamlayıram” söylədi. Bu, Prezident İlham Əliyevin müəllimlik peşəsinə, təhsilə və elmə verdiyi önəmin və dəyərin növbəti göstəricisi idi.

Respublika Prezidentinin çıxışında diqqətçəkən məqamlardan biri də tələbələrə səslənərək onlara bilikli olmağı, diplom üçün yox, savad, elm kəsb etmək üçün oxumağı tövsiyə etməsi oldu. Həmçinin biliyin, savadın tələbələrin təminatlı gələcəyini müəyyənləşdirən amil olduğunu xatırladaraq, gəncləri vətənpərvər olmağa, Vətəni sevməyə səslədi.

Ölkə rəhbəri tarixi nitqini məhz bu sözlərlə yekunlaşdırdı:

- Bax, belə gənclər ölkəmizi gələcəyə inamla aparacaq. Hesab edirəm ki, bugünkü gənclərin mütləq əksəriyyəti bu meyarlara cavab verir - bilikli, savadlı, Vətənə bağlı, vətənpərvər və dünyaya açıq. Elə olmalıdır ki, Azərbaycanın dövlət müstəqilliyi güclənsin. Bizim müstəqilliyimiz başlıca vəzifəmizdir. Azərbaycan müstəqil dövlətdir, qürurlu dövlətdir və gələcəyə çox nikbin baxan dövlətdir. Bir daha sizi təbrik edirəm, cansağlığı, uğurlar arzulayıram.

Prezident İlham Əliyevin tarixi çıxışı, irəli sürdüyü tezislər bu gün ali təhsil müəssisələri, o cümlədən Azərbaycan İlahiyyat İnstitutu qarşısında konkret vəzifə və tapşırıqlar müəyyənləşdirir. Hazırda Azərbaycan İlahiyyat İnstitutu bu vəzifələri uğurla yerinə yetirmək, vətənə və dövlətə bağlı, milli ruhda kadrlar yetişdirmək üçün bütün gücü ilə fəaliyyət göstərir.

İnanırıq ki, Prezident İlham Əliyevin möhkəm iradəsi, uzaqgörənliyi və həyata keçirdiyi uğurlu siyasət nəticəsində Azərbaycan daha da inkişaf edəcək və daha böyük uğurlara imza atacaqdır.

Ceyhun MƏMMƏDOV,

Azərbaycan İlahiyyat İnstitutunun rektoru

Azərbaycan.- 2019.- 25 dekabr.- S.7.