Azərbaycan naminə

Təsadüfi deyil ki, bu gün ölkədə bir çox insanlar artıq gənclik yaşlarından nailiyyətlərə imza atmaq, uğurlu gələcəyin yollarını müəyyənləşdirmək imkanı əldə edirlər. Özünün ictimai, sosial məsuliyyətli fəaliyyəti ilə tanınan, daim sağlam həyat tərzini təbliğ edən, uğurlu iş adamı kimi innovativ biznes layihələrinin müəllifi olan Tamerlan Vahabovun həyat yolu bu baxımdan diqqəti cəlb edir.

Fəaliyyəti konkret bir sahəni və ya bir coğrafi məkanı əhatə etməyib. Özünün dediyi kimi, ömür yolunu macəra dolu həyat da adlandırmaq olar. Onu həm də tez-tez hərbçilər arasında, cəbhə xəttində görmək olar. Çünki vətənpərvərlik ideyalarının təbliği, dövlətçiliyə və milli maraqlara sədaqət ictimai fəaliyyətinin əsas qayəsidir. İdman isə həyatının ayrılmaz hissəsidir. Nəhayət, paraşütlə tullanmaq ən sevimli hobbisidir.

Tamerlanın həyat hekayəsi, təcrübəsi, qarşıya qoyulan məqsədlərə çatmaq üçün mübarizəsi, hər addımda vətənpərvər olmağı aşılayan ictimai və sosial fəaliyyəti gənclər üçün nümunədir. Bu həyat hekayəsini onun öz dilindən eşidək:

- Müasir dövrdə gənclərlə iş sahəsində qazanılan uğurlar dövlətlərin inkişaf səviyyəsini müəyyənləşdirən əsas meyarlardan sayılır. Bu reallığı düzgün dəyərləndirən Prezident İlham Əliyev gənclərə hər zaman malik olduqları qabiliyyət və intellektual imkanların reallaşmasına geniş meydan verilməsini vacib sayır. Dövlət başçısının bu sahədə həyata keçirdiyi çoxşaxəli tədbirlər ümummilli lider Heydər Əliyev tərəfindən əsası qoyulmuş gənclər siyasətinin məntiqi davamı kimi təqdirəlayiqdir.

Polis Akademiyası mənə dövləti sevməyi öyrətdi

Tamerlan Vahabov deyir ki, hələ uşaqlıq yaşlarından onda gələcəkdə zabit olmaq həvəsi olub...

-Çünki babam da, atam da hərbçi kimi zabit olublar. Bu mənada onların keçdiyi həyat yolu məni də gələcəkdə zabit olmağa həvəsləndirirdi. Buna görə hələ məktəb illərindən dərslərimə diqqətlə yanaşır, idmana xüsusi diqqət yetirirdim. Tale elə gətirdi ki, zabit kimi daxili işlər orqanlarında fəaliyyət göstərməli oldum. Orta məktəbi bitirdikdən sonra sənədlərimi Daxili İşlər Nazirliyinin Polis Akademiyasına verdim və imtahanda uğurlu nəticə göstərərək bu təhsil ocağına qəbul olundum.O zaman Polis Akademiyasına daxil olmaqla həyatımda ən böyük arzuma çatdım. Həm də orta məktəbi bitirən bir gənc üçün ali məktəbə qəbul olunmaqdan başqa nə arzu ola bilərdi?! Bu, mənim bir gənc olaraq, həyatımda müstəqil olaraq əldə etdiyim ilk böyük uğurum idi. Polis Akademiyasına daxil olmaqla həm də əmin oldum ki, əzm və iradə olan yerdə insan qarşısına qoyduğu məqsədlərə çata bilər və ilk uğurum həyatımın sonrakı illərinə daim işıq saldı. Polis Akademiyasındakı illər mənə ölkəmizi, müstəqilliyimizi necə qorumağı, dövlətin və dövlətçiliyin nə olduğunu öyrətdi.

2002-ci ildə Polis Akademiyasını leytenant rütbəsində hüquqşünas ixtisası ilə bitirdim. Bir müddət daxili işlər orqanlarında narkotiklərlə mübarizə sahəsində fəaliyyət göstərdim. Daha sonra Fransanın Lion şəhərində İnterpolun Baş Katibliyində işə qəbul olundum. Bu beynəlxalq təşkilatın Antiterror layihəsinin əlaqələndiricisi vəzifəsinə təyinat aldım. DİN rəhbərliyi tərəfindən diqqət və qayğı göstərilib mənə növbədənkənar polis kapitanı rütbəsi verildi və Fransaya yola salındım.Cəmi 23 yaşımda İnterpolda işə qəbul olunmaq mənim gələcək karyeramda olduqca mühüm addım idi. Çünki nüfuzlu bir beynəlxalq təşkilatda fəaliyyət göstərməyə başlamışdım.

Daxili işlər orqanlarından diplomatiyaya

İnterpoldakı fəaliyyəti başa çatdıqdan sonra Tamerlan Vahabov Azərbaycana qayıdır. Beynəlxalq təşkilatdakı iş təcrübəsi nəzərə alınaraq Xarici İşlər Nazirliyində yeni işə başlayır:

- Bununla da həyatımda tamamilə yeni mərhələ başladı. Çünki artıq dövlətə xidmətim diplomat kimi başlandı. Düzdür, mənim üçün bu karyera dəyişikliyi, bir sahədən tamamilə fərqli fəaliyyət növünə transformasiya elə də asan olmadı. Hətta deyərdim ağrılı oldu. Çünki mən bununla uşaqlıq arzumun üstündən xətt çəkməli oldum, polis zabiti kimi fəaliyyətimlə vidalaşdım. Amma gənclik illərində karyerada sonluq həm də yeniliyin başlanğıcı olur. Mənə təsəlli verən o idi ki, yenə də vətənə xidmət edirdim, amma diplomat kimi...

Beləliklə, 2007-ci ildən Xarici İşlər Nazirliyində ABŞ istiqaməti üzrə kurator vəzifəsinə təyin olundum. Əsas vəzifəm enerji təhlükəsizliyi və ABŞ Konqresi ilə əlaqələr sahəsində Xarici İşlər Nazirliyinin həyata keçirdiyi fəaliyyətə, xarici işlər naziri ilə ABŞ səfiri arasındakı danışıqlardan sonrakı məsələlərin işçi qrupu qaydasında müzakirəsinə rəhbərlik etmək idi. Hesab edirəm ki, bu vəzifə mənim yeni həyat təcrübəmin formalaşmasında mühüm rol oynadı. Polis Akademiyasının mənə nə öyrətdiyini əvvəldə qeyd etdim. Xarici İşlər Nazirliyindəki fəaliyyətim isə mənim üçün mükəmməl diplomatiya məktəbi oldu. Bu vəzifədə Azərbaycanın milli maraqlarını beynəlxalq səviyyədə necə müdafiə etməyi öyrəndim.

Lakin tədricən təhsilimi də davam etdirməyə ehtiyac duyurdum. Xarici İşlər Nazirliyində çalışaraq həm də ABŞ Hərbi Dəniz Qüvvələrinin ali məktəbinə qəbul olundum. Bu ali məktəbi bitirən ilk azərbaycanlı məzun oldum və müdafiə məsələlərinin planlanması üzrə magistr dərəcəsi aldım. Amma bununla da kifayətlənmək istəmədim. Daha yeni biliklərə yiyələnmək həvəsi sanki məni zorla ali təhsilimi davam etdirməyə sürükləyirdi. Və bu da nəticə etibarilə Xarici İşlər Nazirliyindəki işimə son qoymağımla nəticələndi. Çünki ABŞ-ın Corctaun Universitetinə daxil olmuşdum və buna görə bir müddət ABŞ-da yaşamalı oldum. Bu ali məktəbi də uğurla başa vuraraq iqtisadiyyat və beynəlxalq münasibətlər üzrə magistr dərəcəsinə yiyələndim.

Beləliklə, 2007-2011-ci illərdə ABŞ-da təhsil alaraq iki magistr dərəcəsi aldım. ABŞ-da yaşayarkən bir müddət Vaşinqtondakı Atlantik Şura Strateji Araşdırmalar Mərkəzində Qara dəniz və Xəzər dənizi hövzəsi üzrə, enerji təhlükəsizliyi və iqtisadi risklər üzrə layihə əlaqələndiricisi kimi fəaliyyət göstərdim. O zaman Qara dəniz və Xəzər dənizi hövzəsi üzrə enerji təhlükəsizliyi məsələləri, xüsusən Cənubi Qafqaz ixrac dəhlizi çox aktual idi. Bakı-Tbilisi-Ceyhan və Bakı-Tbilisi-Qars neft-qaz kəmərləri cəmi bir neçə il idi ki, istifadəyə verilmişdi. Regionda karbohidrogen ehtiyatların ixracı sahəsində yeni vəziyyət yaranmışdı. Biz əsasən ABŞ-ın da dəstək verdiyi bu məsələləri, bu hövzədə yerləşən ölkələrdə enerji təhlükəsizliyi ilə bağlı görülən işləri təhlil edirdik. Eyni zamanda müxtəlif tədbirlər keçirirdik. Bütün bu məsələlərə dair mənim "Washington Post”, "Washington Times”, "Jamestown”, "New Europe” kimi nüfuzlu mətbu orqanlarda məqalələrim dərc olunub.Təbii ki, bu zaman qarşımda duran ən ümdə vəzifə Azərbaycan dövlətinin enerji təhlükəsizliyinə verdiyi töhfələri təbliğ etmək idi. Hesab edirəm ki, qısa müddətdə olsa da, mən Azərbaycan həqiqətlərinin ABŞ ictimaiyyətinə çatdırılması işinə töhfə verə bildim.

Sahibkarlıq məhsuluna çevrilən həyat təcrübəsi və təhsil

ABŞ-dan sonra Tamerlan Vahabov bir müddət Ukraynada dərc olunan "Kyiv weekly” qəzetinin kommersiya direktoru vəzifəsində çalışır, Kiyevdə özünün biznesini qurur. Amma əsas məqsədi sürətlə dəyişən və inkişaf edən indiki dövrdə həyat təcrübəsini və təhsildə qazandıqlarını biznes sferasında tətbiq etmək idi:

- Fikir verirsinizsə, fəaliyyət göstərdiyim sahələrin hamısı bir-biri ilə uzlaşır: təhlükəsizlik sahəsi, diplomatiya və beynəlxalq fəaliyyət. Sonrakı dövrdə topladığım həyat təcrübəsini sahibkarlıq məhsuluna çevirməyi qərara aldım. Bu mənada sahibkarlıq fəaliyyətim keçmiş təcrübəmə və təhsilimə uyğundur. Hazırda təsisçisi olduğum "Ivy Group” şirkəti Azərbaycanla yanaşı, Ukraynada və Çexiyada fəaliyyət göstərir. Şirkətin fəaliyyəti 3 istiqamətdə qurulub: informasiya texnologiyalarının tətbiqinə dəstək, islahatlara dəstək və təhsil layihələrinin həyata keçirilməsi. Hazırda "Ivy Group”ölkəmizdədövlət sektorunda biznes-texnologiya islahatlarında, o cümlədən hüquq mühafizə sahəsindəki islahat proseslərində iştirak edir, konsaltinq xidmətləri həyata keçirir. Eyni zamanda təhsil sahəsindəki fəaliyyətimiz və təklif etdiyimiz layihələr böyük maraqla qarşılanır. Bakıda və Kiyevdə "Washington School of Languages” dil məktəblərimiz fəaliyyət göstərir.

Onu da qeyd edim ki, sahibkarlıq fəaliyyətimdə sosial məsuliyyət prinsipini də vacib sayıram. "Ivy Group” şirkəti tərəfindən Bakı Beynəlxalq Dəniz Ticarət Limanının yük terminalında korporativ sosial məsuliyyət proqramı çərçivəsində yaradılan "Fitzona” idman meydançası sağlam həyat tərzinə yönəlmiş layihədir. Bütün dünyada uğur qazanmış və açıq hava şəraitində məşqləri nəzərdə tutan bu layihə Cənubi Qafqazda ilk dəfə Azərbaycanda reallaşdırılıb. Qeyri-kommersiya və sosial xarakter daşıyan layihənin əsas məqsədi gənclərin sağlam həyat tərzi, ictimai fəallıq, dövlətçilik və vətənpərvərlik ruhunda tərbiyəsidir.

Onu da qeyd edim ki, 2018-ci ilin sentyabr ayından Azərbaycan teleməkanında ilk dəfə olaraq sahibkarlıq məsələlərinə həsr edilən yeni layihəm başlayıb. Bu, mənim aparıcılığımla efirə çıxan "Biznes Azərbaycan” müəllif proqramıdır. Bu proqram islahatlara dəstək missiyamızın bir hissəsidir.Hesab edirəm ki, bu proqramla biz ölkəmizdə biznes və iqtisadiyyat sahəsində həyata keçirilən maarifləndirmə və məlumatlandırma işinə müəyyən töhfələr verə bilirik.

Göründüyü kimi, gənclik illəriniməhsuldar və səmərəli keçirən Tamerlan Vahabovun həyat yolu müvəffəqiyyətlərlə zəngindir. Polis orqanları, diplomatiya, beynəlxalq fəaliyyət, sahibkarlıq, telejurnalistika ayrı-ayrı fəaliyyət sahələri olsa da, Tamerlan Vahabovun həyatında onların hamısını birləşdirən bir cəhət var:dövlətə xidmət məramı! Bu mənada Tamerlan Vahabovun uğurlu həyat hekayəti gənclər üçün əsl örnəkdir...

Rəşad CƏFƏRLİ

Azərbaycan.- 2019.-1 fevral.- S.7.