Ölkə turizmi haqqında son statistika nədən xəbər verir

Dövlət Statistika Komitəsinin ölkə turizminə aid Dövlət Sərhəd Xidmətinə istinadən yaydığı məlumata görə, cari ilin yanvar-may aylarında Azərbaycana dünyanın 180 ölkəsindən 1 milyon 94,8 min və ya 2018-ci ilin yanvar-may ayları ilə müqayisədə 3,7 faiz çox əcnəbi və vətəndaşlığı olmayan şəxs gəlmişdir.

Gələnlərin 28,5 faizi Rusiya Federasiyası, 26 faizi Gürcüstan, 10,9 faizi Türkiyə, 7,7 faizi İran, 3 faizi Birləşmiş Ərəb Əmirlikləri, hər birindən 1,9 faiz olmaqla Ukrayna və Hindistan, 1,6 faiz olmaqla Böyük Britaniya və Türkmənistan, 1,2 faiz olmaqla Pakistan və İraq, 14,4 faizi digər ölkələrin vətəndaşları, 0,1 faizi isə vətəndaşlığı olmayan şəxslər olmuşdur.

Ölkəmizə yanvar-may aylarında gələnlərin sayında daha çox artım Türkmənistan (1,9 dəfə), Misir (1,8 dəfə), Çin (1,8 dəfə), Hindistan (1,7 dəfə), Səudiyyə Ərəbistanı (1,7 dəfə), Böyük Britaniya (42,3 faiz), Cənubi Koreya (31,4 faiz), Yaponiya (30,1 faiz), Almaniya (28,0 faiz), Kanada (27,7 faiz), Polşa (23,4 faiz) və Gürcüstan (22,7 faiz) vətəndaşları arasında qeydə alınmışdır.

2019-cu ilin yanvar-may aylarında Avropa İttifaqı ölkələrindən və MDB-dən gələnlərin sayı isə müvafiq olaraq 54,4 min (keçən ilin müvafiq dövründəkindən 27,8 faiz çox) və 380,8 min (3,8 faiz çox) nəfər olmuşdur.

5 ay ərzində xarici ölkələrə gedən Azərbaycan vətəndaşlarının sayına gəldikdə, bu göstərici də əvvəlki ilin müvafiq dövrü ilə müqayisədə 25,5 faiz artaraq 2 milyon 65,9 min nəfərə çatmışdır. Ölkə vətəndaşlarının 39,5 faizi İrana, 27 faizi Gürcüstana, 18,3 faizi Rusiya Federasiyasına, 9,8 faizi Türkiyəyə, 5,4 faizi digər ölkələrə getmişdir. Bu dövrdə İrana gedən Azərbaycan vətəndaşlarının sayı 73,6, Gürcüstana gedənlərin sayı 10,6 faiz, Rusiya Federasiyasına gedənlərin sayı 5,6, Türkiyəyə gedənlərin sayı 0,1 faiz artmışdır.

Azərbaycan.- 2019.-3 iyul.- S.6.