Ölkəmiz dünya turizm həvəskarlarının xidmətindədir

Yəqin ki, çoxlarınız müşahidə etmisiniz. Digər fəsillərə nisbətən yay aylarında ölkəmizə gələn turistlərin say artımında ciddi fərq olur. Bu da təbiidir. Axı hansı peşənin sahibi olmasından asılı olmayaraq ilin on bir ayını istehsalatda və ya hər hansı işdə çalışan insanlar dincəlmək, səyahət etmək, səhhəti ilə bağlı az-çox müalicə almaq, habelə digər işlər üçün yay aylarına üstünlük verirlər.

Bunun digər səbəbi də ölkəmizdəki sabitlik, əmin-amanlıq, mötəbər tədbirlərə evsahibliyi etməsi, habelə turizm həvəskarları üçün yerlərdə dünya standartlarına uyğun şəraitin yaradılmasıdır. Bunların sırasına ölkəmizin qədim şəhərlərindən tutmuş bölgələrdəki ucqar kəndlərədək uzanan rahat yolları, səliqəli hotellərı, çeşidli təamları, milli adət-ənənələrin gözoxşarlığını, yerli əhalinin tolerantlığı və mehribanlığını, gəzməli və görməli yerlərin unudulmazlığını əlavə edəndə, əlbəttə ki, Azərbaycana bir gələn bir də gəlmək istəyər. Adi bir misal. Ölkəmizin şimal qapısı olan Qusarın dəniz səviyyəsindən 1300 metr yüksəklikdə yerləşən Ləzə kəndinə son illər 70 mindən çox turist səfər edib. Ekspertlərin söyləmələrinə görə, bu kənd ən çox xarici qonağın gəldiyi turizm məkanıdır.

Turistləri bu kəndə cəlb edən həm də həmin kəndin qeyri-adi gözəlliyindən olan 10-dan çox dağ şəlaləsinin axar-baxarlığıdır. Qafqaz sıra dağlarının şimal-şərqində, dəniz səviyyəsindən 4.242 metr hündürlükdə, Şahdağ yüksəkliyinin ətəyində yerləşən kənddə cəmi 170 nəfərə yaxın əhali yaşayır. Burada nə az, nə çox - cəmi 28 ev var. Sakinlər əkinçilik və maldarlıqla yanaşı, ev turizmi ilə də məşğuldur. Yerli və xarici qonaqlar müəyyən məbləğ ödəyərək kənddə gecələyir, milli mətbəx təamlarından dadırlar. Ləzəyə gəlmək istəyən turistlər üçün kənd sakinləri bələdçilər təklif edir. Dağlıq ərazilərdə çadır quraraq istirahət etmək istəyənlər Ləzədə bu arzularını reallaşdıra bilirlər.

Ölkəmizin tamamilə başqa bir səmtinə, Naxçıvan Muxtar Respublikasına cari ilin birinci rübündə 100 minə yaxın turist gəlib. Bu da 2018-ci ilin müvafiq dövründəki göstəricidən çoxdur.

Əgər bura Şəki-Qax-Zaqatala, Lənkəran-Astara-Lerik, Gəncə-Hacıkənd-Gədəbəy və digər turizm yerlərinə gedənlərin, habelə Xəzər dənizinin Şıxov çimərliyindən tutmuş Yalama-Nabran ərazilərinədək olan yerlərdə istirahətdə və müalicədə olanları da əlavə etsək, nə qədər artım olduğunu görərik. Turistlərin təhlükəsizliyinin yüksək səviyyədə təmin olunması, istirahətinin və səyahətinin səmərəli keçməsi üçün Azərbaycan dövləti, habelə yerli icra orqanları səmərəli tədbirlər görürlər. Belə ki, cari ildən ölkəmizə gələn turistlərin və yerli vətəndaşların məlumatlandırılması məqsədilə ölkənin 9 məntəqəsində - Naxçıvan Muxtar Respublikası və paytaxt Bakı ilə yanaşı, Xaçmaz, Quba, Şamaxı, Zaqatala rayonlarında, Gəncə, Şəki və Lənkəran şəhərlərində Turizm İnformasiya Mərkəzi (TİM) fəaliyyətə başlayıb.

Xüsusi saytlar vasitəsilə dünyanın ucqar guşəsindən insanlar bölgənin istənilən yerində özlərinə əvvəlcədən yer və müvafiq turizm xidmətləri sifariş verə bilərlər. Bu məqsədlə Mədəniyyət və Turizm Nazirliyinin dəstəyi ilə turizm informasiya mərkəzlərinin saytları yenidən hazırlanmış və müxtəlif dillərdə turistlərin xidmətinə verilmişdir. Bir ay bundan öncə daha dörd mərkəzin saytı www.baku.azerbaijan.travel, www.ganja.travel, www.lankaran.travel və www.shamakhi.travel istifadəyə verilib. Portallarda yerli turistlərin məlumatlandırılmaları üçün hər cür informasiya yer alıb. Yaxın vaxtlarda portalların ingilis və rus dili versiyası da tam istifadədə olacaq. Bundan başqa, Bakıya səyahət edənlər üçün rəsmi şəhər kartı olan "Bakı Kart” ("BakuCard”) hazırlanıb.

"BakuCard” yeni və innovativ məhsul olaraq kart sahiblərinə Bakı şəhərində ictimai nəqliyyatdan və hava limanından şəhərə və ya əksinə transfer xidmətini həyata keçirən "Baku City Aero Express” avtobuslarından ödənişsiz istifadə imkanı verir. Turistlər kartı əldə etməklə Bakı şəhəri üzrə turistik yerlərə gəzintilər həyata keçirən "Baku City Tour” avtobuslarına biletləri 50 faiz endirimlə əldə edə biləcəklər.

Kart vasitəsilə 20-dən çox muzey və istirahət mərkəzlərinə pulsuz və ya endirimli giriş, 200-dən çox pərakəndə satış mağazasında və ticarət mərkəzində, müxtəlif restoran və kafelərdə endirimlər və ödənişsiz məhsullardan faydalanmaq mümkündür. Etibarlılıq müddətinə görə 24 saatlıq, 72 saatlıq və 1 həftəlik olmaqla 3 növü olan kartların qiymətləri müvafiq olaraq 24, 45 və 70 manat təşkil edir. Kartların satışı Heydər Əliyev adına Beynəlxalq Hava Limanı, turizm informasiya mərkəzləri, müxtəlif hotellər, turizm agentlikləri və köşklərlə yanaşı, onlayn olaraq www.bakucard.az saytı vasitəsilə həyata keçirilir.

Bütün bunlar turizmin Azərbaycanda sürətli inkişafına təkan verməklə yanaşı ölkənin iqtisadi inkişafında böyük perspektivlər açmasına da real zəmin yaradır. Bu məsələyə kompleks şəkildə yanaşan Prezident İlham Əliyevin fərman və sərəncamlarına əsasən, ölkəmizdə turizm sənayesi həm daxili, həm də xarici qonaqları qəbul etmək üçün ildən-ilə inkişaf edir. Azərbaycanın gözəl iqlimi, yay aylarında Xəzərsahili istirahət və müalicə ocaqları, sanatoriya və kurortları, bir-birindən maraqlı yerli tarixi abidələri nəinki Bakıda, bütün bölgələrdə dünya turizm həvəskarlarının xidmətindədir.

Rəhman SALMANLI,

Azərbaycan.- 2019.- 8 iyun.- S.6.