Azərbaycanın elmi jurnalı 254 beynəlxalq nəşr arasında 10-cu yerdə qərarlaşıb

Nəqliyyat, Rabitə və Yüksək Texnologiyalar Nazirliyi, Azərbaycan Milli Elmlər Akademiyası və Bakı Dövlət Universitetinin birgə təsis etdiyi “Applied and Computational Mathematics” (“Tətbiqi və Hesablama Riyaziyyatı”) beynəlxalq elmi jurnalı 254 beynəlxalq nəşr arasında 10-cu yerdə qərarlaşıb.

Dünyanın ən mötəbər elmi-analitik informasiya bazalarından olan “Clarivate Analytics” (əvvəllər “Thomson Reuters”) 2019-cu il üçün illik hesabatını açıqlayıb. Hesabat ötən dövr üçün sözügedən bazanın siyahısında olan yenilikləri, siyahıya daxil olan və xaric edilən elmi jurnallar, onların impakt faktorlarının (keyfiyyət dərəcəsi) dinamikası haqqında məlumatı əks etdirir. Agentliyin son hesabatına əsasən, Azərbaycanda dərc olunan “Applied and Computational Mathematics” beynəlxalq elmi jurnalının təsir əmsalı 2.365-dən qalxaraq 3.16-ya bərabər olub, yəni jurnal 19-cu yerdən 10-cu yerə yüksəlib.

Jurnalın həmbaş redaktoru akademik Fikrət Əliyev bildirib ki, Azərbaycan Respublikası Nəqliyyat, Rabitə və Yüksək Texnologiyalar Nazirliyinin dəstəyi ilə Bakı Dövlət Universitetinin Tətbiqi Riyaziyyat Elmi Tədqiqat İnstitutunda dərc olunan bu jurnal Azərbaycan elm tarixində ilk və yeganə elmi nəşr olaraq 2008-ci ildə “Clarivate Analytics”in genişləndirilmiş siyahısında yer alıb.

Qeyd edək ki, bu göstərici (10-cu yer) Avropa ölkələri arasında 4-cü, keçmiş sovetlər birliyində birinci yeri təmin edir. Jurnalın bu günədək 44 nömrəsi çapdan çıxıb ki, bu nömrələrdə dünyanın 50-dən çox ölkəsini təmsil edən müəlliflərin 500-dək məqaləsi dərc olunub.

Jurnalda tətbiqi və hesablama riyaziyyatının müxtəlif sahələrinə aid yüksək səviyyəli, əsaslı rəydən keçmiş elmi məqalələr çap edilir. Nəşr olunduğu 18 il ərzində jurnal 47 ölkədən 250-dən artıq elmi müəssisə ilə mübadilə həyata keçirib.

Azərbaycan.- 2019.- 22 iyun.- S.5.