İslahatların yeni mərhələsi başlayır

İlham Əliyev qarşıdakı hədəfləri və iqtisadiyyatın yeni inkişaf strategiyasının hazırlandığını bəyan etdi

"Hazırda iqtisadiyyatımızın yeni inkişaf strategiyası üzərində işləyirik, bu proses başlanmışdır. Bu prosesə qabaqcıl beynəlxalq mütəxəssislər, alimlər cəlb ediləcək ki, yeni inkişaf strategiyamız uğurlu olsun və gözəl nəticələrə gətirib çıxarsın. Bu günə qədər görülmüş işlər bunun üçün gözəl zəmin yaratdı. Biz əsas infrastruktur layihələrini icra etdik”.

Nazirlər Kabinetinin 2019-cu ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında Prezident İlham Əliyev həm ölkə iqtisadiyyatının uğurlu inkişaf istiqamətlərini, həm də islahatların hədəflərini açıqladı. Dövlət başçısı idarəetmə sahəsində də islahatların aparılmasına böyük ehtiyac olduğunu vurğulayaraq hər bir sahədə inkişaf üçün böyük meydanın olduğunu diqqətə çatdırdı.

Həqiqətən də bu ilin 3 ayında reallığa çevrilən islahatların uğurları onu deməyə əsas verir ki, müəyyən edilən hədəflərə doğru inamlı addımlar atılır. Son 3 ayda həm iqtisadi göstəricilərə, həm də uğurlu nailiyyətlərə nəzər yetirək.

- Ümumi daxili məhsul 3 faiz artıb;

- Valyuta ehtiyatları 46,7 milyard dollara qalxıb;

- Ölkə iqtisadiyyatına 2,8 milyard dollar sərmayə qoyulub;

- Büdcə daxilolmaları 200 milyon manatdan çox artıb;

- Büdcə xərcləri 25 milyard 200 milyon manata qədər artıb;

- Sənaye istehsalı 4,4 faiz çoxalıb;

- Qeyri-neft sektorunda sənaye istehsalı 15,6 faiz artıb;

- İnflyasiya aşağı səviyyədədir - 2,1 faiz;

- Kənd təsərrüfatı 3,6 faiz, əhalinin gəlirləri isə 5,5 faiz çoxalıb;

- Qeyri-neft sektoruna 2 milyard dollar sərmayə yatırılıb;

- Minimum əməkhaqqı və minimum pensiyalar təxminən 40 faiz artıb;,

- Sosial müavinətlər orta hesabla 2 dəfə çoxalıb;,

- Məcburi köçkünlərə verilən müavinət 50 faiz artıb;

- İki böyük zavod - karbamid və yüksək sıxlıqlı polietilen zavodları açılıb;

- Qazlaşdırmanın səviyyəsi 95 faizə çatıb;

- Bu il 10 milyonuncu vətəndaş dünyaya gəlib;

- 35 min insan ödənişli ictimai işlərlə təmin edilib;

- 602 min 347 nəfərə problemli kreditlərin ödənişlərinə başlanılıb;

- Regionların sosial-iqtisadi inkişafına dair IV dövlət proqramı qəbul edilib və s.

Görülən işlər onu deməyə əsas verir ki, həyata keçirilən bütün islahatlar uğurlu nəticələr verir. Dövlət başçısı isə bəyan etdi ki, iqtisadi, sosial sahələrdə və bütün başqa sahələrdə islahatlar bundan sonra da aparılacaq. Bütün bunlar isə xalqın rifah halının yaxşılaşdırılmasına və dövlətin qüdrətinin daha da güclənməsinə xidmət edir.

Ancaq Prezident hesab edir ki, daha böyük uğurlar, yəni hər bir sahadə irəli getmək üçün Azərbaycanda da yeniliklər, müsbət təcrübə, dünyada mövcud olan ən mütərəqqi yanaşma tətbiq edilməlidir. Əlbəttə ki, bütün bunların tətbiqi Azərbaycana hər sahədə böyük dividentlər qazandıracaq və Prezidentin dediyi kimi bundan sonrakı mərhələdə də Azərbaycan vətəndaşının rifa halının daha da yaxşılaşdırılmasının ən ön planda olduğuna şahidlik edəcəyik.

Bütün bunlarla yanaşı Prezident İlham Əliyevin həyata keçirdiyi sosial-iqtisadi islahatlar Azərbaycan iqtisadiyyatının keyfiyyətcə yeni mərhələsini təmin etməklə yanaşı ölkəmizin bölgədə təhlükəsiz məkan kimi tanınmasını şərtləndirib.

Qarşıda duran hədəflərə gəlincə isə Prezident ilk növbədə regionların sosial-iqtisadi inkişafı ilə bağlı icra edilməyən layihələrin dördüncü dövlət proqramı çərçivəsində həll ediləcəyini vurğuladı. Bəlli oldu ki, strateji yol xəritələrində nəzərdə tutulan bütün layihələrin uğurla icrasından sonra 2021-2025-ci illəri əhatə edən yeni proqram işlənib hazırlanacaq: "Dördüncü dövlət proqramı çərçivəsində bu gün hələ də görə bilmədiyimiz bütün layihələri icra edəcəyik. Bu, möhkəm bir zəmindir. Biz bu zəmin üzərində yeni iqtisadi inkişaf modeli qurmalıyıq və qururuq. Bizdə həm təcrübə, həm də iradə var… Beləliklə, biz indiki yol xəritələrinin icrasını uğurla başa vurmalıyıq və 2021-2025-ci illəri əhatə edən yeni proqramı işləyib təqdim etməliyik”.

Prezident bu il reallaşacaq layihələr barədə də ətraflı məlumat verərək aidiyyatı qurumlara ciddi tapşırıqlar verdi. Beləliklə, bu il ölkədə aşağıdakı layihələrin gerçəkləşdirilməsi planlaşdırılır:

- Minimum 1000 kilometr avtomobil yolu çəkilməlidir;

- Şəhid ailələrinə dövlət tərəfindən ən azı 800 mənzil veriləcək;

- Təqribən 6 mindən çox məcburi köçkün ailəsi üçün mənzillər tikiləcək;

- Qarabağ müharibəsi əlillərinə ən azı 600 minik avtomobili veriləcək;

- 10-a yaxın yeni mərkəzi rayon xəstəxanası fəaliyyətə başlayacaq;

- İki olimpiya idman mərkəzi istifadəyə veriləcək;

- 6 milyon insan dövlət hesabına tibbi müayinədən keçəcək;

- Bakıya 300 ən müasir avtobus gətiriləcək;

- Zəlzələ bölgəsində (Şamaxı, Ağsu, İsmayıllı) minlərlə yeni ev tikiləcək;

- Sakibkarlara 170 milyon manat həcmində kredit veriləcək;

- 5 şəhərdə içməli su layihəsi başa çatdırılacaq;

- Sahibkarlar bu il təqribən 8 min ödənişli ictimai iş yeri yaradacaqlar;

- Bölgələrdə 5, Bakıda 2 "ASAN xidmət” mərkəzləri açılacaq və s.

Göründüyü kimi ilin sonunadək mühüm sosial-iqtisadi layihələrin reallaşdırılması nəzərdə tutulur. Bütün bunlar əlbəttə ki, dövlətin ölkə vətəndaşlarına göstərdiyi diqqətin bariz təcəssümüdür. Ancaq islahatların daha geniş vüsət alması və davamlı uğurlara nail olunması üçün dövlət başçısının söylədiyi kimi daim inkişaf və axtarış olmalıdır. Elə buna görə də dövlət başçısı əldə edilən uğurlarla, nailiyyətlərlə kifayətlənməməyi məsləhət görür: "Daim irəliyə baxmalıyıq. Əminəm ki, biz bu ili də uğurla başa vuracağıq, 2019-cu il də ölkəmiz üçün, xalqımız üçün uğurlu olacaq”.

Prezidentin söylədiyi kimi qarşıda yeni hədəflər var. İnkişafın dayanıqlı və uzunmüddətli olması üçün inamla çalışmalı və gələcəyə nikbinliklə baxılmalıdır və bu prosesə təkcə hökumətin və dövlət qurumlarının deyil, bütün cəmiyyətin dəstək göstərməsi vacib şərtlərdəndir.

Rəşad BAXŞƏLİYEV

Azərbaycan.- 2019.- 3 may.- S.1; 9.