Türk Şurası Gənc Diplomatlar birgə təlim proqramının iştirakçıları Milli Məclisdə olublar

Mayın 15-də Türk Şurası Gənc Diplomatlar altıncı birgə təlim proqramının iştirakçıları Milli Məclisdə olublar.

AZƏRTAC xəbər verir ki, Milli Məclisin beynəlxalq münasibətlər və parlamentlərarası əlaqələr komitəsinin sədri Səməd Seyidov qonaqlara parlamentin fəaliyyəti, beynəlxalq əməkdaşlığı haqqında məlumat verib. O, həmçinin Azərbaycan deputatlarının AŞPA-dakı fəaliyyəti barədə danışıb.

Qonaqların diqqətinə çatdırılıb ki, Milli Məclis xarici ölkələrin parlamentləri ilə sıx əməkdaşlıq edir. Qanunverici orqanda parlamentlərarası əlaqələr üzrə 82 işçi qrupu fəaliyyət göstərir.

Beynəlxalq münasibətlər və parlamentlərarası əlaqələr komitəsinin üzvü Asim Mollazadə Azərbaycan parlamentinin yaranma tarixi barədə məlumat verib. O deyib ki, Azərbaycan parlamenti müsəlman Şərqində yaradılan ilk parlament olub. Deputat, həmçinin ölkəmizdəki multikultural mühit haqqında danışıb.

Sonra iştirakçıları maraqlandıran suallar cavablandırılıb.

Azərbaycan.- 2019.- 16 may.- S. 4.