Bakıda London derbisi

Sabah paytaxtımız UEFA Avropa Liqasının final matçının şahidi olacaq

Avropa futbolunun böyük həyəcanla gözlədiyi gün gəlib çatdı. Sabah Bakı qitənin nüfuzlu klub turnirlərindən olan UEFA Avropa Liqasının finalına evsahibliyi edəcək.

Bakı Olimpiya Stadionunda keçiriləcək həlledici matçda İngiltərənin "Çelsi” və "Arsenal” komandaları üz-üzə gələcək. Yerli vaxtla saat 23:00-da başlayacaq London derbisi arenada toplaşacaq on minlərlə azarkeşə əsl futbol festivalı yaşadacaq. Həlledici qarşılaşmada qalib gələn komanda gələn mövsüm UEFA Çempionlar Liqasının qrup mərhələsinə vəsiqə qazanacaq.

Xatırladaq ki, Avroliqanın finalının 2019-cu ildə Bakıda keçirilməsi haqqında qərar UEFA İcraiyyə Komitəsinin 20 sentyabr 2017-ci il tarixli iclasında verilib. Azərbaycan Prezidenti İlham Əliyev 7 may 2018-ci ildə final matçının paytaxtımızda keçirilməsi ilə əlaqədar təşkilat komitəsinin yaradılması haqqında sərəncam imzalayıb. Final oyununu tələb olunan səviyyədə keçirmək üçün yerli təşkilat komitəsi nəzərdə tutulan bütün işləri vaxtlı-vaxtında icra edib, üzərinə götürdüyü öhdəlikləri yerinə yetirib.

Artıq bir neçə gündür Bakı qonaq-qaralıdır. Ölkəmizə gəlmiş azarkeşlər həlledici matçın ən müasir arenada keçirildiyini qeyd etməklə yanaşı, Azərbaycan xalqının səmimiliyinə və qonaqpərvərliyinə, Bakının və bütövlükdə ölkənin sürətli inkişafına heyran qaldıqlarını bildirirlər.

Final görüşü ilə əlaqədar reallaşdırılan silsilə tədbirlər çərçivəsində Dənizkənarı Milli Parkda azarkeş festivalı keçirilir. Avroliqanın kubokunun nümayiş olunduğu festivalda məşhur futbolçular - İngiltərə millisinin sabiq hücumçusu Maykl Ouen və İtaliya yığmasının keçmiş qapıçısı Françesko Toldo da iştirak edirlər.

Festivala böyük maraq göstərən şəhər ictimaiyyətinin nümayəndələri, futbol həvəskarları Avroliqanın kuboku və tanınmış futbolçularla xatirə şəkilləri çəkdirirlər. Azərbaycanın ən yaxşı DJ-ləri, musiqi qrupları və incəsənət ustaları rəngarəng çıxışları ilə festival iştirakçılarına xoş anlar yaşadırlar.

... Bəli, Avropanın futbolla bu və ya digər dərəcədə əlaqəli olan dairələri finaldan danışır, matçın paytaxtımızda baş tutmasından razılıq hissi keçirirlər. Təşkil olunacaq final oyunu barədə susanlar isə yalnız "Köhnə dünya”nın siyasi dairələrinin nümayəndələridir. Susqunluğun səbəbi də məlumdur: Avropa siyasəti bundan dörd il öncə "Bakı-2015” I Avropa Oyunlarının timsalında qitə idmanı ilə mübarizəyə girişmiş, amma məğlubiyyətə uğramışdır! Siyasət idmanı yerində oturtmağa çalışmış, ancaq idman siyasətə yerini göstərmişdir!

Doğrudur, siyasətin idmana qarışması yeni fakt deyil. İrimiqyaslı idman tədbirləri ərəfəsində xarici bədnam qüvvələr bəyənmədiyi ayrı-ayrı təşkilatçı ölkələrə insan hüquqlarını bəhanə gətirərək təzyiq göstərməyə cəhd edir. Son hadisələr qarayaxma kampaniyasının uğursuzluqla nəticələndiyini və bədxahların susmaqdan başqa çarəsi qalmadığını növbəti dəfə nümayiş etdirdi.

Avroliqanın final matçında start fitinin çalınmasına az qalır. Futbolçulara və azarkeşlərə uğurlar arzulayırıq. Oyunçu aparsın!

Elçin CƏFƏROV,

Azərbaycan.- 2019.- 28 may.- S.10.