Azərbaycan-Böyük Britaniya arasında müxtəlif sahələri əhatə edən tərəfdaşlıq əlaqələri inkişaf edir

Əmək və Əhalinin Sosial Müdafiəsi Nazirliyi və Böyük Britaniyanın müvafiq qurumları arasında əməkdaşlıq əlaqələrinin qurularaq inkişaf etdirilməsi, müsbət təcrübələrin qarşılıqlı mübadiləsinin həyata keçirilməsi üçün geniş potensial var və gələcəkdə bu istiqamətdə işlərin aparılması tərəflər üçün faydalı olardı.

Nazirliyin ictimaiyyətlə əlaqələr şöbəsindən AZƏRTAC-a bildiriblər ki, Böyük Britaniyanın Baş Nazirinin Azərbaycan üzrə ticarət elçisi Baronessa Nikolsonun başçılıq etdiyi nümayəndə heyəti ilə Əmək və Əhalinin Sosial Müdafiəsi Nazirliyinin tabeliyindəki DOST Agentliyində keçirilən görüşdə bununla bağlı yekdil fikir ifadə olunub.

Görüşdə Böyük Britaniya və Şimali İrlandiya Birləşmiş Krallığının fövqəladə və səlahiyyətli səfiri Ceyms Şarp, nümayəndə heyətinin üzvləri Böyük Britaniyanın Enerji və Ticarət məsələləri üzrə departamentin müdiri Stiven Smit və Beynəlxalq Ticarət Departamentinin İxrac Strategiyası Proqramı üzrə meneceri Raşel Pouvel, ticarət məsələləri üzrə əlaqələndirici şəxs Rəna Zeynalova da iştirak ediblər.

Nümayəndə heyəti agentliyin və "DOST” mərkəzinin fəaliyyəti, burada pensiya, sosial müavinət və təqaüdlər, sosial xidmətlər, əlillik, tibbi ekspertiza və reabilitasiya vasitələri ilə təminat, sosial sığorta, əmək münasibətləri, məşğulluq, sosial-hüquqi, övladlığagötürmə, sosial-məişət xidmətləri, sosial-pedaqoji və s. üzrə 132 növdə xidmətin göstərilməsi prosesi ilə tanış olublar. Onlar "DOST” layihəsi barədə müsbət təəssüratlarını bölüşüblər.

Görüşdə Əmək və Əhalinin Sosial Müdafiəsi naziri Sahil Babayev Prezident İlham Əliyevin sosial-iqtisadi siyasətinin nailiyyətləri barədə ətraflı məlumat verib. Nazir ölkəmizdə sosial sahədə aparılan genişmiqyaslı islahatları diqqətə çatdırıb. Nazir Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın təşəbbüsü olan "DOST” layihəsi əsasında ölkəmizdə dövlət sosial xidmətlərinin "bir pəncərə”dən, şəffaf və operativ, vətəndaş rahatlığı və məmnunluğu prinsipi əsasında təqdim olunması mərhələsinə keçildiyini qeyd edib.

Azərbaycan-Böyük Britaniya arasında müxtəlif sahələri əhatə edən tərəfdaşlıq əlaqələrinin inkişafından bəhs edən S.Babayev BP və British Council ilə birlikdə "Əlilliyi olan şəxslərin məşğulluq qabiliyyətlərinin artırılması proqramı”nın əhəmiyyətini diqqətə çatdırıb. O bildirib ki, əlilliyi olan şəxslərin əmək bazarına çıxışının dəstəklənməsinə xidmət edən proqram çərçivəsində əlilliyi olan şəxslər ingilis dili, veb və qrafik dizayn və applikasiyaların hazırlanması, sosial bacarıqların inkişaf etdirilməsi istiqamətində təlimlərə cəlb edilir. Onlara psixoloji dəstək və məşğulluq üzrə müvafiq məsləhətlər də verilir. Əhali sakinliyinin inkişafı və demoqrafiya sahəsində tədqiqatların aparılması və kadr potensialının formalaşdırılması sahəsində də BP ilə əməkdaşlıq nəzərdə tutulub.

B.Nikolson ölkələrimiz arasında dostluq və tərəfdaşlıq əlaqələrinin inkişafından məmnunluq ifadə edib. O, gələcəkdə bu əlaqələrin əmək, məşğulluq, sosial müdafiə, tibbi-sosial reabilitasiya sahələrində də davam etməsi üçün imkanların mövcud olduğunu qeyd edib.

Azərbaycan.- 2019.- 1 noyabr.- S.6.