Parlamentin komitələrində büdcə layihəsinin ikinci oxunuşda müzakirəsi yekunlaşdı

Noyabrın 20-də Milli Məclisin İnsan hüquqları, Hüquq siyasəti və dövlət quruculuğu, Regional məsələlər, Beynəlxalq münasibətlər və parlamentlərarası əlaqələr, Gənclər və idman komitələrinin birgə iclası keçirildi.

Milli Məclis sədrinin müavini, İnsan hüquqları komitəsinin sədri Bahar Muradova "Azərbaycan Respublikasının 2020-ci il dövlət büdcəsi haqqında” qanun layihəsinin ikinci oxunuşda müzakirəyə çıxarıldığını bildirdi.

Bahar Muradovanın sözlərinə görə, sosial-iqtisadi islahatlar, inkişafın bütün parametrləri üzrə qarşıya qoyulan vəzifələr, hökumətin vətəndaşlar qarşısındakı öhdəlikləri sahəsindəki hədəflərə çatmaq üçün gəlinən ümumi qənaət ondan ibarətdir ki, 2020-ci ilin büdcə paketinə daxil olan qanunlar və nəzərdə tutulan imkanlar bütün bu proseslərin həyata keçirilməsini təmin eləcək. Bir sözlə, gələn ilin inkişaf parametrlərinə tam uyğun şəkildə hazırlanan dövlət büdcəsi respublikamızın iqtisadi yüksəlişinə, əhalinin sosial rifahının daha da yüksəldilməsinə, mədəni və humanitar sahələrdə görülən işlərə, o cümlədən ölkəmizin müdafiə qabiliyyətinin və ordumuzun döyüş imkanlarının daha da artırılmasına xidmət edəcək.

Qeyd olundu ki, gələn ilin dövlət büdcəsinin icrasından gözləntilər həm də qeyri-neft-sektorundan daxilolmaların artması və bunun da nəticəsində büdcədə neft amilindən asılılığın azaldılmasıdır. Həyata keçirilən islahatlar və qarşıya qoyulan vəzifələr onu deməyə imkan verir ki, gələn il vergi daxilolmaları artacaq.

Xüsusilə vergi inzibatçılığının təkmilləşdirilməsi sahəsindəki proseslər nəzərdə tutulan hədəflərə çatmağı təmin edəcək. Bütün bunlar həm də biznesin, orta sahibkarlığın inkişafına dəstək verəcək.

Eyni zamanda büdcədən ayrılan xərclərin səmərəliliyinin artırılması, şəffaflığın və hesabatlılığın təkmilləşdirilməsi diqqət mərkəzində saxlanılacaq.

Bahar Muradova onu da qeyd etdi ki, regional inkişaf, bölgələrdə məşğulluğun təmin olunması, kənd təsərrüfatının inkişafı istiqamətindəki prioritetlərin yerinə yetirilməsi, Azərbaycanın beynəlxalq aləmdə mövqelərinin möhkəmlənməsinə xidmət edəcək siyasətin həyata keçirilməsi ilə bağlı məsələlərin yüksək səviyyədə maliyyələşməsi büdcə paketində nəzərə alınıb.

İclasda iştirak edən Maliyyə nazirinin birinci müavini İlqar Fətizadə bildirdi ki, 2020-ci ilin dövlət və icmal büdcələrinin layihələri Prezident İlham Əliyevin müəyyən etdiyi və Azərbaycan iqtisadiyyatının yeni makroiqtisadi reallıqlarını özündə əks etdirən strateji inkişaf prioritetləri və ölkənin sosial-iqtisadi hədəfləri nəzərə alınmaqla tərtib olunub. Qeyd edildi ki, gələn ilin dövlət büdcəsinin gəlirləri 24 milyard 134 milyon 500 min manat, xərcləri isə 26 milyard 913,7 milyon manat məbləğində proqnozlaşdırılır. 2020-ci ilin dövlət büdcəsinin xərclərinin strukturuna daxil olan cari xərclərə dövlət büdcəsi xərclərinin 64,2 faizi həcmində və ya 17 milyard 275,9 milyon manat, əsaslı xərclərə 29 faizi həcmində və ya 7 milyard 809,6 milyon manat, dövlət borcuna xidmətlə bağlı xərclərə 6,8 faizi həcmində və ya 1 milyard 828,2 milyon manat vəsait yönəldiləcək.

Nazir müavini bildirdi ki, növbəti ildə sosialyönümlü xərclərin məbləği 10 milyard 642 milyon manat təşkil edəcək. Bu da cari illə müqayisədə 2 milyard 874 milyon manat və ya 37 faiz çoxdur. O da diqqətə çatdırıldı ki, plenar iclasda və komitələrdə deputatların qaldırdığı məsələlər Maliyyə Nazirliyi tərəfindən öyrənilir. Plenar iclasda deputatların toxunduqları məsələlər cavablandırılacaq.

Hesablama Palatasının sədri Vüqar Gülməmmədov bildirdi ki, təmsil etdiyi qurumun təqdim etdiyi rəydə gələn ilin dövlət büdcəsi ilə bağlı bütün məsələlər tam əksini tapıb. Bununla yanaşı Hesablama Palatası mandatına uyğun olaraq dövlət büdcəsinin həm iqtisadi, həm funksional, həm inzibati təsnifatı üzrə bölgüsü, ehtiyat, bölüşdürülməmiş, büdcədənkənar vəsaitlərin həcmi barədə geniş məlumatlar rəydə göstərilib. Rəydə məntiqə söykənən nəticələr əsasında təhlillər aparılıb.

Müzakirələr zamanı deputatlardan Fazil Mustafa, Asim Mollazadə, Qüdrət Həsənquliyev, Qənirə Paşayeva, Tahir Kərimli, Çingiz Qənizadə, Şahin İsmayılov, Sona Əliyeva və Naqif Həmzəyev gələn ilin büdcə layihəsi ilə bağlı fikirlərini bildirdilər, təkliflərlə çıxış etdilər.

Yekunda Maliyyə nazirinin birinci müavini İlqar Fətizadə, Hesablama Palatasının sədri Vüqar Gülməmmədov, iqtisadiyyat nazirinin müavini Sevinc Həsənova, Əmək və Əhalinin Sosial Müdafiəsi nazirinin müavini Anar Kərimov müzakirələr zamanı qaldırılan məsələlərə münasibət bildirdilər və gələn ilin dövlət büdcəsinin layihəsi ikinci oxunuşda müzakirə edilmək üçün Milli Məclisin plenar iclasına tövsiyə olundu.

Rəşad CƏFƏRLİ

Azərbaycan.- 2019.- 21 noyabr.- S. 1; 3.