Milli və qlobal prinsiplərə əsaslanan siyasət

Gənclər ölkənin demoqrafik inkişafında mühüm rol oynayırlar. Belə ki, ölkəmizdə əhalinin 30 faizini yaşı 14-dən 29-dək olan şəxslər təşkil edir. Əhalinin əhəmiyyətli hissəsini təşkil edən gənclər ölkənin əsas innovativ potensialı, aparıcı qüvvəsi və əmək resursudur. Gənclər çox vaxt gələcəyi təmsil edən bir təbəqə hesab olunur, çünki onlar hazırda mövcud olan biliklər bazasına yeni fikirlər və enerji gətirirlər.

Onlar həmçinin cəmiyyətə və ya ümumiyyətlə dünyaya fayda verən yeni kəşflərə və inkişafa səbəb ola biləcək həvəsə malikdirlər. Bu səbəblə də gənclərə doğru atılan hər bir addım gələcəyə investisiya deməkdir.

Ümumilikdə gənclər siyasətinin əsas məqsədi onların bilik, bacarıq və səriştələrini inkişaf etdirmələrinə və təcrübə qazanmalarına şərait yaratmaqdır. Bu, gənclərə cəmiyyətə inteqrasiya etməyə və xüsusən vətəndaş cəmiyyətində, əmək bazarında fəal rol oynamağa imkan verir.

Azərbaycanda əsası Ümummilli Lider Heydər Əliyev tərəfindən qoyulan gənclər siyasəti hazırda onun layiqli varisi Prezident İlham Əliyev tərəfindən uğurla davam etdirilir. Bunu gənclərlə bağlı mütəmadi olaraq inkişaf proqramlarının qəbul olunmasında, 2007-ci ilin "Gənclər ili” elan edilməsində, gənclərin həyat şəraitinin yaxşılaşdırılması üçün reallaşdırılan müxtəlif sosialyönümlü tədbirlərdə, o cümlədən sosial evlər layihəsində, 2013-cü ildə gənclərin nailiyyətlərinin qiymətləndirilməsi və stimullaşdırılması məqsədilə "Gənclər üçün Prezident Mükafatı”nın təsis edilməsində görə bilərik.

Prezidentin gənclər siyasətinin əsas tərkib hissələrindən biri də onlarla bağlı kadr siyasəti və o cümlədən gənclərin rəhbər vəzifələrə gətirilməsidir. Bu gün savadlı, müasir kadrların irəli çəkilməsi ilə hakimiyyətdə gəncləşmə siyasəti həyata keçirilir. Bu islahatlar birbaşa Prezident İlham Əliyevin şəxsi təşəbbüsüdür və uğurla davam etdirilir. İslahatların müjdəsini dövlət başçısı 2018-ci ildə növbədənkənar prezident seçkilərində qalib gəldikdən dərhal sonra vermişdi. Bu müjdəni bir-birinin ardınca gənc nazirlərin təyinatı, son günlərdə isə gənc icra başçılarının təyin olunması reallaşdırmışdı. Prezidentin gənc kadrlara ümidi böyükdür. O, yeni nəsildən şəffaflıq, dinamiklik, innovasiya, tərəqqi gözləyir. Bunu yeni təyin olunan icra başçıları ilə görüşdə bu şəkildə dilə gətirmişdi: "Sizin qarşınızda duran əsas vəzifələr rəhbərlik edəcəyiniz rayonların sosial-iqtisadi inkişafını təmin etməkdir. Siz vətəndaşlarla daim təmasda olmalısınız, bütün kəndləri gəzməlisiniz, kənd camaatı ilə görüşməlisiniz. Sizin işiniz kabinet işi olmamalıdır... Siz çox mobil başçılar kimi fəaliyyət göstərməlisiniz”.

2017-ci il sentyabrın 15-də Prezident İlham Əliyevin sərəncamı ilə təsdiq edilmiş növbəti "Azərbaycan gəncliyi 2017-2021-ci illərdə” Dövlət Proqramında gənclərin elmə, tədqiqata həvəsləndirilməsi, ali və orta ixtisas təhsili müəssisələrində gənclər tərəfindən irəli sürülən mütərəqqi ideya və təşəbbüslərin dəstəklənməsi, o cümlədən sağlam həyat tərzinin təbliğ edilməsi, qorunması və möhkəmləndirilməsi qarşıya qoyulan əsas vəzifələrdəndir. Bu istiqamətdə atılan addımlardan biri kimi Azərbaycan Respublikasının Prezidenti yanında Elmin İnkişafı Fondunun milyonlarla manat məbləğində maliyyələşdirdiyi layihələr, o cümlədən gənc alimlərə qrant layihələrinin verilməsi gənclər arasında elmi tədqiqat fəaliyyətinə marağı artırmışdır.

Azərbaycan cəmiyyətinin gənc seqmentinin sağlamlığının, təhsilinin, məşğulluğunun və sosial müdafiəsinin təmin edilməsi üçün genişmiqyaslı işlər görülmüşdür. Gənclər təşkilatlarının və ayrı-ayrı gənclərin ictimai əhəmiyyət daşıyan təşəbbüslərini dəstəkləmək məqsədilə Azərbaycan Respublikasının Prezidenti yanında Gənclər Fondu yaradılmışdır.

Bu gün Azərbaycanda yüksək intellektual səviyyəyə, vətənpərvərlik hissinə, milli dəyərlərə malik olan gənclər formalaşır. Bu təbəqə gündən-günə ölkənin ictimai-siyasi həyatında daha böyük rol oynayır. Hazırda respublikada mövcud olan 250-dən artıq qeyri-hökumət və gənclər təşkilatlarının aktiv fəaliyyəti dövlətin yaratdığı şərait sayəsində mümkün olub. Məhz dövlətin gənclərə dəstək və diqqət göstərməsi nəticəsində Azərbaycan gəncliyində özünə, istedadına, gələcəyinə inam hissi artıb. Həmçinin gənclərimiz iştirak etdikləri neçə-neçə beynəlxalq olimpiadalarda və idman yarışlarında qələbələrlə ölkəmizin bayrağını və şərəfini ucaldıblar.

Beləliklə, gənclərin inkişafı Azərbaycanda dövlət siyasətinin ən vacib tərkib hissələrindən biri hesab olunur və Prezidentin "Azərbaycan gəncliyinin 2015-2025-ci illər üçün İnkişaf Strategiyası” ilə bağlı sərəncamına əsasən deyə bilərik ki, gənclərə xüsusi diqqət və qayğının göstərilməsi bundan sonra da mütəmadi olaraq davam etdiriləcəkdir. Gənc nəslin nümayəndələrinin qanunvericiliyin təkmilləşdirilməsində daha yaxından iştirak etməsi təmin olunacaq, onların institusional bacarıqlarının artırılması, vətəndaş cəmiyyətinin inkişafında aparıcı rol oynaması istiqamətində ciddi işlər görüləcək, ictimai fəallıqlarının bundan sonra da dəstəklənməsi üçün müvafiq şərait formalaşdırılacaqdır.

Leyla ABBASLI,

Azərbaycan Respublikası Təhsil İnstitutunun doktorantı

Azərbaycan.- 2019.- 27 noyabr.- S.9.