Doqquz iqlimin balı

20-ci sərgi-satış yarmarkasında Azərbaycanın bütün bölgələrinin arıçıları öz məhsullarını təqdim edirlər

Aqrar sektorda həyata keçirilən islahatlar digər ənənəvi sahələrlə yanaşı, arıçılığın inkişafına da təkan verir. Bunun nəticəsidir ki, ildən-ilə ölkədə arı ailələrinin sayı və məhsul istehsalı artır. Belə ki, arıçılıq haqqında qanunun qəbul edilməsindən ötən 9 il ərzində arı ailələrinin sayı 1,9 dəfə çoxalıb. Arıçılıqla məşğul olan təsərrüfatlarda hər təsərrüfata düşən arı ailələrinin sayı 11,1-dən 12,8-ə çatıb, bal istehsalı isə 2,2 dəfə artıb. Bu artım arıçılığın inkişafına verilən dövlət dəstəyinin nəticəsidir.

Sahəni stimullaşdırmaq üçün arıçılıqla məşğul olan fiziki və hüquqi şəxslərə saxladıqları hər arı ailəsinə (pətəyə) görə 5 il müddətində hər il 10 manat məbləğində subsidiya verilir. Bununla yanaşı, dövlət büdcəsindən yüksək məhsuldar bal arılarının yetişdirilməsi və arıçılıq məhsullarının istehsalının artırılması üçün bu sahədə seleksiya və damazlıq işlərinin yaxşılaşdırılması üçün də vəsait ayrılıb.

Digər stimullaşdırıcı amil isə arıçıların yetişdirdikləri məhsulun Bakı şəhərində bal sərgi-satış yarmarkalarının təşkil olunmasıdır. Belə yarmarkalar arıçılara yetişdirdikləri məhsulu daha çox və münasib qiymətə satmağa şərait yaradır. Sözsüz ki, bu da arıçılara yüksək qazanc əldə etməyə imkan verir.

Növbəti 20-ci respublika sərgi-satış yarmarkası Tofiq Bəhramov adına stadionun ərazisində təşkil edilib. Yarmarka sentyabrın 28-dən oktyabrın 18-dək davam edəcək. Bu yarmarka Kənd Təsərrüfatı Nazirliyinin strukturuna daxil olan "Aqrar Tədarük və Təchizat” ASC-nin və Azərbaycan Arıçılar Assosiasiyasının birgə təşkilatçılığı ilə keçirilir.

Yarmarkada 123 ton balın satılması nəzərdə tutulub. Qida Təhlükəsizliyi Agentliyinin əməkdaşları tərəfindən yarmarkada satışa çıxarılan məhsullardan nümunələr götürülərək laboratoriya şəraitində yoxlanılıb. Bütövlükdə 3241 nümunə götürülüb ki, bunların da 17,34 faizi keyfiyyət və qida təhlükəsizliyi göstəricilərinə uyğun hesab edilməyib. Bu səbəbdən də keyfiyyət və qida təhlükəsizliyi standartlarına uyğun olmayan həmin məhsullar satışa buraxılmayıb.

Builki yarmarka innovativ yenilikləri ilə ötənilkilərdən fərqlənir. Yarmarka ərazisinin zonalara və sektorlara bölünməsi, arıçıların yer bölgüsü püşkatma vasitəsilə müəyyən edilib.

Bu il tətbiq edilən növbəti yenilik isə satışına icazə veriləcək hər bir məhsulun qablaşmasının üzərində ştrix-kodun olmasıdır. Bu kod vasitəsilə müştərilər www.bal.kendden.az saytına daxil olaraq məhsulun hansı rayondan gətirildiyini və kim tərəfindən satışa çıxarıldığını öyrənə bilərlər.

Bir sıra kənd təsərrüfatı məhsulları Azərbaycan brendi kimi dünya bazarına ixrac edilir. Bu həm gəlir gətirir, həm də ölkəmizi dünya miqyasında tanıdır. Azərbaycan arıçıları bu sahədə də brend yaratmağı düşünürlər. Belə ki, "Doqquz iqlim” adlanacaq bu bal məhsulu bütün ölkə ərazisindən toplanan balların qarışığıdır. Azərbaycan balının ən böyük müştərisi qida həssaslığı ilə seçilən yaponlardır. Bu sahədə onlardan geri qalmayan almanlar da Azərbaycan balına maraq göstərirlər. İnanırıq ki, bu yeni brend balımıza dünya şöhrəti gətirəcək və daha çox müştərisi olacaq.

Azərbaycan balı dünyada ən keyfiyyətli bal hesab olunur. FAO-nun Azərbaycan ofisinin rəhbəri Mələk Çakmakın deyir: "Beynəlxalq ekspertlərin fikrincə, ən yaxşı arı cinsi və ən yaxşı bal Azərbaycana məxsusdur. Biz də bu məhsulun daha çox istehsal edilib dünya bazarına çıxarılmasına dəstək verməyə çalışırıq”.

Rüstəm KAMAL

Azərbaycan.- 2019.- 1 oktyabr.- S. 4.