Qida təhlükəsizliyi mövzusunda təlim keçirilib

Kənd Təsərrüfatı Nazirliyinin tabeliyində "Aqrar Tədarük və Təchizat” (ATT) ASC-nin Logistika və anbar departamentinin əməkdaşları üçün qida təhlükəsizliyi mövzusunda təlim keçirilib. Təlimin əsas məqsədi anbar və logistika işində təhlükəsizliyin təmin olunması, qida təhlükəsizliyinin idarə edilməsi sistemindəki müasir metodlar barədə əməkdaşların məlumatlandırılması olub.

Sağlamlıq, Əməyin Təhlükəsizliyi və Ətraf Mühit (SƏTƏM) mühəndisi İsmət Həmidov tərəfindən keçirilən təlimdə iştirakçılar İSO 22000 sistemi ilə yaxından tanış olublar. Qeyd edək ki, İSO 22000 qida təhlükəsizliyini təmin etmək üçün menecment imkanı verən təhlillər sistemidir. Bu sistemin prinsip və metodlarını tətbiq etməklə hər bir təşkilat özünün iş təcrübəsinə, şəraitinə və istehsal üsuluna xas olan sistem yarada və onu həyata keçirə bilər. İSO 22000 sistemi Avropa, ABŞ və bir sıra Asiya ölkələrində qida məhsulları ilə bağlı bütün biznes sahələri üçün vacibdir. Həmin ölkələrin bazarlarına girmək istəyən hər hansı bir ərzaq istehsalçısı mütləq bu sistemə malik olmalıdır.

Təlim zamanı bildirilib ki, ərzaq məhsullarının keyfiyyəti, qəbulu, saxlanması və daşınması insan həyatının təhlükəsizliyinə dair məcburi tələblərə cavab verməlidir.

Qeyd edək ki, "Aqrar Tədarük və Təchizat” ASC-nin əsas işi kənd təsərrüfatı və ərzaq məhsullarını yerli qida istehsalçılarından dövlət vəsaiti hesabına almaq, saxlamaq və bu məhsullarla satınalan özəl müəssisə və dövlət təşkilatlarını təchiz etməkdir. ATT-nin fəaliyyətində anbar, logistika və qida təhlükəsizliyi işinin düzgün təşkili və standartlara uyğunluğu prioritet istiqamətdir.

Göstərilən xidmət səviyyəsinin daha da artırılması və ölkə vətəndaşlarının təhlükəsiz qida məhsulları ilə təmin olunmasının davamlılığını təmin etmək məqsədilə bu təlimlərin mütəmadi olaraq keçirilməsi nəzərdə tutulur.

Azərbaycan.- 2019.- 14 sentyabr.- S. 10.