Azərbaycana gələn turistlərin sayı artdıqca gəlirlər də çoxalır

Cari ilin yanvar-avqust aylarında Azərbaycana səfər edən xarici ölkə vətəndaşlarının sayı ötən ilin müvafiq dövrü ilə müqayisədə 8,3 faiz artaraq 2,1 milyona çatıb. Keçən ilin statistikası göstərdi ki, turistlər Azərbaycanda olduqları müddətdə 2,6 milyard dollardan çox pul xərcləyiblər. Azərbaycana gələn əcnəbilərin sayında davamlı artım nəzərə çarpır.

Belə ki, 2016-cı ildə 2,25 milyon, 2017-ci ildə 2,7 milyon, 2018-ci ildə isə 2,85 milyon əcnəbi ölkəmizə səfər edib. Ehtimala görə, gələn turistlərin sayı 2019-cu ildə 3 milyon nəfəri ötəcək. 2018-ci ildə turizmdən gəlir 2,634 milyard dollar, xərci 2,284 milyard dollar, müsbət fərqi 350 milyon dollar təşkil edib. Faktlardan göründüyü kimi, turizm Azərbaycanda valyuta gətirən əsas sahələrdən birinə çevrilib.

Ölkəmizə gələn turistlərin ildən-ilə çoxalması bu sahədə yaradılan əlavə dəyərin həcminin artmasına səbəb olur. 2014-cü ildə turizm sektorunda 2,4 milyard manatlıq əlavə dəyər yaradılıb. Bu göstərici 2018-ci ildə 3,46 milyard manata yüksəlib. Turizmin inkişafı həm də əhalinin məşğulluğunun artmasına töhfə verib. 2014-cü ildə bu sektorda 42 min insan çalışırdısa, ötən ilədək onların sayı 53,2 mini ötüb. Azərbaycan Turizm Assosiasiyasının müşaviri Müzəffər Ağakərimov jurnalistlərə müsahibəsində bildirib ki, turizm sahəsi tezliklə neft-qaz sektorundan sonra iqtisadiyyatın əsas aparıcı qüvvəsinə çevriləcək.

Bunun başlıca səbəbi Prezident İlham Əliyevin bu sahəyə göstərdiyi hərtərəfli dəstəyidir. Yeni turizm növlərinin inkişafına, dünya standartlarına uyğun hotellərin inşasına dövlət başçısı tərəfindən xüsusi diqqət yetirilir. Turist səfərlərinin asanlaşdırılması məqsədilə viza alınması sadələşdirilib. Azərbaycanın beynəlxalq tədbirlərə, simpozium və konfranslara evsahibliyi etməsi, beynəlxalq idman yarışları, musiqi festivalları, mədəniyyət tədbirləri ölkəmizdə turizmin inkişafına müsbət təsir göstərmişdir. Ekspertlərin fikrincə, növbəti illərdə Azərbaycana gələn turistlərin sayının nəzərəçarpacaq dərəcədə artacağı ehtimal olunur. Hətta strateji yol xəritəsində göstərildiyi kimi, Azərbaycan 2025-ci ildə dünyanın 20 ən yaxşı inkişaf edən turizm ölkəsindən birinə çevriləcək.

Ölkəmizdə turizm infrastrukturu və müxtəlif turizm növləri inkişaf edir, eyni zamanda, xalqımızın qonaqpərvərliyi turist səfərlərinə müsbət təsir göstərir. Azərbaycan həm təbiətinə, həm coğrafi mövqeyinə, həm də sabitliyinə görə unikal ölkədir. Turistlər xüsusilə də ailələri ilə o yerlərə üz tuturlar ki, orada sabitlik, insanlara münasibət yüksək səviyyədə olsun.

Azərbaycanda turizm şirkətlərinin və onların növlərinin sayı ildən-ilə artır. Bildiyimiz kimi, əvvəllər ölkəmizdə turizm növləri az idi. Sevindirici haldır ki, bu azlıq içərisində qış turizmi indi populyarlığı ilə seçilir. Tufandağda, Şahdağda, Qusarda və başqa ərazilərdə qış turizminin inkişafı buna bariz nümunədir. Bundan başqa, ölkəmizdə çimərlik turizmi ilə yanaşı, kənd turizmi də inkişaf edir. Kənd turizminin məmnunluq doğuran cəhətlərindən biri də odur ki, turistlərin bir çoxu Şəkidə, Qusarda, Qubada, Qəbələdə, Lənkəranda, Gədəbəydə fərdi evlərdə qalmağa meyillidirlər. Bu da yerli sakinlərin gəlirlərinin artmasına səbəb olur.

Azərbaycanda sağlamlıq turizmi də gündəmdədir. Qalaaltı, Duzdağ, Naftalanda günün tələblərinə cavab verən müasir hotellər fəaliyyət göstərir. Gələcəkdə bu hotellərin sayı arta bilər. Masallıda və Lənkəranda istisu mənbələri yaxınlığında yeni hotellər tikilib. Bu da sağlamlıq turizminin inkişafı üçün daha geniş imkanlar yaradır.

Turizmin çoxşaxəli inkişafı dünyanın müxtəlif ölkələrindən Azərbaycana gələnlərin sayını çoxaldan əsas amillərdəndir. Odur ki, bu sahəyə diqqət daha da artırılmalıdır. Sağlamlıq məqsədilə respublikamıza gələn turistlər iki-üç gün deyil, ən azı bir kurs müalicə məqsədilə 14 gün qala bilsələr, ölkəyə daha çox valyuta daxil olar.

Turizmin inkişafı həm Bakı şəhərində, həm də regionlarda yeni iş yerlərinin açılması deməkdir. Dövlət zərurət duyulan yerlərdə yol, su, enerji infrastrukturunu yaxşılaşdırır. Yollar çəkilir, su xətləri yenilənir, elektriklə təminat yaxşılaşır. Bütün bunların nəticəsidir ki, keçmiş Sovetlər birliyi ərazisində turizmin inkişafı baxımından Azərbaycan öncül yerdədir.

Rəhman SALMANLI

Azərbaycan.- 2019.- 24 sentyabr.- S. 6.