Xalq acından ölür,
Paşinyanı isə yalnız hakimiyyət düşündürür
Ermənistanda ictimai-siyasi vəziyyət daha
gərgin mərhələyə keçib
Ermənistanda sosial-iqtisadi, ictimai-siyasi müstəvidə vəziyyətin getdikcə ağırlaşması müşahidə olunur. Həm əhalinin maddi rifah halının pisləşməsi, həm də daxili və xarici siyasətdə qeydə alınan uğursuzluqlar ondan xəbər verir ki, bunlar qarşıdakı günlər ərzində hakimiyyət üçün yeni problemlər yaradacaq. Bu hadisələr fonunda baş nazir Nikol Paşinyan isə hər vəchlə hakimiyyətini möhkəmləndirməyə çalışır. Son günlərdə baş tutan istefalar isə daxili siyasi gərginliyin ən yüksək mərhələdə olduğunu nümayiş etdirir.
Politoloq Armen Badalyan yenicə istefaya göndərilmiş Milli Təhlükəsizlik Xidmətinin sabiq başçısı Artur Vanetsyanın Paşinyana qarşı yeni siyasi hərəkat yarada biləcəyini vurğulayıb. Qeyd edib ki, Vanetsyan xalq arasında nüfuzu getdikcə azalan Paşinyan hökumətinə yaxşı alternativ ola bilər. Onun sözlərinə görə, Paşinyana qarşı yeni siyasi güc mərkəzi məhz Milli Təhlükəsizlik Xidmətinin əməkdaşları hesabına formalaşa bilər. Badalyan bildirib ki, Ermənistanın sabiq prezidentləri Robert Koçaryanın və Serj Sarkisyanın əks siyasi qütbə rəhbərlik etmək şansları yoxdur və bu məsələdə tamamilə yeni siyasətçilər önə çıxmalıdırlar. Bundan başqa, onların tərəfdarlarının təmsil olunduğu Respublikaçılar Partiyasının da sıraları getdikcə seyrəlir. Politoloq bu amillərə söykənərək iddia edib ki, Vanetsyanın qarşısında dura biləcək heç bir siyasi güc olmayacaq.
MTX-nin sabiq sədri reytinqinə görə Paşinyandan geri qalmır, onun kifayət qədər imkanları və xarici dəstəyi var. Rusiyanın timsalında Vanetsyanın ciddi dəstəyi var. MTX sədrinin öz istefası ilə bağlı açıqlamasında "Biri sanki mənə "dayan” deyir!” sözləri də vacib məqamlardan xəbər verir. Paşinyanın mətbuat katibi onun bu sözlərini şərh etməkdən imtina edib.
Ermənistan baş nazirinin MTX sədrindən sonra ölkənin polis rəisi Valeri Osipyanı da istefaya göndərməsi iqtidar daxilində ciddi ziddiyyətlərin daha bir göstəricisidir. Paşinyanın aparat rəhbəri bildirib ki, baş nazir onların fəaliyyətindən narazı olub, lakin hər iki sabiq vəzifəli şəxs cinayətdə ittiham edilmir. Belə ki, Vanetsyan Futbol Federasiyasının sədri, Osipyan isə baş nazirin müşaviri təyin ediliblər. Politoloqlar hesab edirlər ki, Paşinyanın bu kosmetik addımları iqtidarın daxilində getdikcə güclənən ziddiyyətlərin qarşısını ala bilməyəcək.
Yerli mətbuatın yazdığına görə, Paşinyan Milli Təhlükəsizlik Xidmətinin sədri və polis rəisi vəzifələrinə istədiyi adamları təyin edə bilmir. "Lragir” qəzetinin yazdığına görə, Nikol Paşinyan "İşıqlı Ermənistan” parlament fraksiyasının təqdim etdiyi namizədlərin qəbul olunmasını gözləyir. Məlumata görə, sentyabrın 20-də Ermənistan parlamentində güc strukturlarına rəhbərlərin təyin edilməsi haqqında sənədə dəyişikliklər ikinci oxunuşda qəbul olunub. Dəyişiklik baş nazirə polis və MTX rəhbərliyinə bu sahənin mütəxəssisi olmayan, Ermənistanın 25 yaşı tamam olmuş, 4 il ölkə ərazisində yaşamış istənilən vətəndaşını təyin etməyə imkan verir. Bu qanun cari ilin noyabrında qüvvəyə minəcək.
Nikol Paşinyan polis rəisi vəzifəsinə müvəqqəti olaraq Yerevan meri Hayk Martunyanın dostu Arman Sarkisyanı, Dövlət Təhlükəsizliyi Xidmətinin direktoru vəzifəsinə isə qurumun direktor müavini Eduardı təyin edib. Arman Sarkisyanın bu vəzifədə qalacağı gözlənilən olsa da, Martirosyanın direktor olacağı az ehtimal olunur.
Hadisələrin bu
səpkidə cərəyan etdiyi bir vaxtda Rusiyanın "Prtime.ru” saytında erməni politoloq
Styopa Safaryan və Ermənistanın
baş naziri Nikol Paşinyanla onun mətbuat katibi Vladimir Karapetyanın gizli
və bir o qədər
də alçaldıcı "Whatsapp”
yazışmalarını ortaya
çıxarıb. Qeyd olunub ki, bu
yaxınlarda Styopa Safaryana məxsus olan "iPhone” markalı telefon itib. Əslində isə bu hadisə planlı şəkildə və siyasi motivlər əsasında hazırlanıb.
Hücum
isə bir qrup şəxs tərəfindən həyata
keçirilib.
Bu faktlar Safaryana
məxsus telefonun itməsindən sonra mətbuata sızıb. Telefonda baş
nazir Nikol Paşinyana, onun mətbuat katibi Vladimir Karapetyana və Styopa Safaryana məxsus "Whatsapp” yazışmaları var. Yazışmalarda
üçlük arasında
rüşvət sövdələşmələrindən
və pulla kiminsə prokuror vəzifəsinə gətirilməsindən
və həmin şəxsdən 30 milyon
dram rüşvət alınmasından
bəhs olunur. Baş nazirin mətbuat katibi Vladimir Karapetyan dəllallıq edən Safaryana baş nazirlə olan söhbəti barədə
yazır, hətta vurğulayır ki, baş nazir çox dözülməz
insandır, hərdən
elə danışır
ki, istər-istəməz
insanda ikrah hissi yaradır.
Yazışmalarda "Baba” adlandırılan şəxs
isə Ermənistanın
eks-prezidenti Levon Ter-Petrosyandır. Məlum olur ki, Nikol Paşinyan atdığı hər addımı onunla bölüşür, məsləhət
alır.
Bu gün Ermənistanda
reallıq həm də ondan ibarətdir
ki, xalq aclıq çəkir. Paşinyan isə
hakimiyyətini möhkəmlətmək
üçün bütün
vasitələrə əl
atır. Buna görə
hər an sosial partlayışların
olacağı istisna edilmir. Son illər
səfalət içində
yaşayanların sayı
bir qədər də artıb. Reallıqda işğalçı ölkənin
əhalisinin yarıdan
çoxunun aclıq problemi ilə üzləşməsi danılmazdır.
Ermənistanda azgəlirli ailələr
çörək məmulatlarını
artıq kartofla əvəz ediblər.
Yoxsul həyat tərzinə dözə bilməyən
əhali miqrasiyaya üstünlük verir.
Nəticədə kəndlər boşalır,
infrastruktur dağılır.
Kəndlərdə əsasən qadınlar,
uşaqlar və yaşlı insanlar yaşayır. Həmin ailələrin
əməkqabiliyyətli kişiləri
isə ölkə xaricində miqrant kimi çalışır.
Ermənistanda vəziyyəti ağırlaşdıran
digər bir cəhət isə işsizlik səviyyəsinin
durmadan yüksəlməsidir. Araşdırmalara görə, əməkqabiliyyətli
əhalinin yarıya qədəri hazırda işsizdir. Aydındır ki, bu vəziyyətdə Paşinyanın
da uzun müddət
iqtidarda qala bilməsi ciddi sual altına düşür.
Elçin CƏFƏROV
Azərbaycan.- 2019.- 24 sentyabr.- S. 7.