Çiyələk
sahələri genişləndirilir
Son illər respublikamızda aqrar sahənin inkişafı istiqamətində həyata keçirilən məqsədyönlü tədbirlər, fermerlərə göstərilən diqqət və qayğı, bu sektorda çalışan insanlar üçün geniş imkanlar açmışdır. Başqa sözlə, dövlət tərəfindən verilən dəstək sayəsində kənd təsərrüfatı ilə məşğul olan sahibkarlar daha çox gəlir gətirən sahələrin genişləndirilməsinə böyük maraq göstərirlər.
Qazax fermerləri də qeyri-neft sektorunun inkişaf etdirilməsinə öz töhfələrini verirlər. Onlar iş yerləri ilə təminatda böyük rol oynayan kənd təsərrüfatının inkişaf etdirilməsi üçün məqsədyönlü tədbirlər həyata keçirirlər. Xüsusilə son illər bu sahəyə göstərilən diqqət və qayğının, sahibkarlara, sadə kənd adamlarına olan səmimi münasibətin nəticəsidir ki, rayonda əkin sahələri xeyli artırılmışdır.
Dövlətin qayğısını daim hiss edən təsərrüfat sahiblərindən biri Nüsrət Aşırovdur. Uzun illərin təcrübəsinə arxalanan fermer iqtisadi cəhətdən gəlirli olan kənd təsərrüfatı məhsullarının intehsalını ildən-ilə artırır. O, keçən ildən etibarən yeni üsulla çiyələk yetişdirməyə başlamışdır.
Söhbət zamanı Nüsrət Aşırov çiyələyin istehlakçıların ən çox maraq göstərdikləri giləmeyvələrdən olduğunu bildirdi. Dedi ki, rayonda çiyələk ilk dəfə yetişdirildiyinə görə rayon rəhbərləri də tez-tez çiyələk sahələrinə gəlir, fəaliyyət ilə maraqlanır, yeri gəldikdə öz köməklərini əsirgəmirlər.
Hazırda sahələrdə məhsuldarlığı daha yüksək, saxlama müddəti çox, süfrəlik və mürəbbəlik olan "Albion” sortu becərilir ki, onun da toxumu əsasən İspaniyadan gətirilir. İlk çiyələk şitillərinin ötən ilin avqust ayında əkildiyini və hektara təxminən 50-55 min ədəd şitil köçürüldüyünü qeyd edən N.Aşırov dedi ki, bu şitillər sahələrə köçürüldükdən sonra 4 il məhsul vermək qabiliyyətində olur. 1 şitil birinci il 700-800 qram, 2-ci ildə 1 kiloqramdan çox məhsul verir. yüksək məhsuldarlıq əldə etmək üçün bütün aqrotexniki qaydalara əməl edilməsinin vacibliyini də söyləyərək qeyd etdi ki, çiyələk əkilən sahələrdə işlər ilboyu aparılmalıdır. Torpaq əkinə hazırlanmamışdan qabaq ona üzvi gübrə verilməlidir. Yaxşı olar ki, suvarma damcı üsulu ilə aparılsın. Bu zaman su bitkilər arasında bərabər paylanır, torpaq qaysaqlamır, yumşaq qalır, alaq otlarının azalmasına və məhsuldarlığın yüksəlməsinə səbəb olur. Zərərvericilərə və müxtəlif xəstəliklərə qarşı mübarizə tədbirləri də vaxtında görülməlidir. Bunlara əməl edilsə, sahələrdən ilboyu məhsul götürmək olar.
Hazırda çiyələk sahələrində məhsul yığımı davam edir. Hər gün 250-300 kiloqram çiyələk dərilərək satışa göndərilir. Satışda da problem yoxdur. Təsərrüfatda 20 nəfərdən çox işçi çalışır.
Çiyələk sahələrində çalışanlar işlə təminatda yaradılan şəraitdən olduqca razılıq etdilər. Dedilər ki, sahibkarlığın inkişafına göstərilən diqqət və qayğı nəticəsində çox sayda yeni iş yerləri açılır, sadə kənd adamları belə təsərrüfatlarda işləyib ailələrinin dolanışığını təmin edirlər.
Sabir ƏLİYEV
Azərbaycan.- 2019.- 25 sentyabr.- S. 1; 5.