BMT-nin Əhali Fondunun Azərbaycanda fəaliyyətinin 25 illiyi münasibətilə qəbul keçirilib

Sentyabrın 27-də BMT-nin Əhali Fondunun Azərbaycan üzrə nümayəndəliyi fəaliyyətə başlamasının 25 illiyi münasibətilə rəsmi qəbul təşkil edib.

AZƏRTAC xəbər verir ki, qəbulda BMT-nin Əhali Fondunun ötən dövr ərzində ölkədə fəaliyyətinə dəstək olmuş və mühüm töhfələr vermiş tərəfdaşları - rəsmi şəxslər, ölkəmizdəki diplomatik korpusun təmsilçiləri, iş adamları, ictimai xadimlər, vətəndaş cəmiyyəti və mətbuat nümayəndələri iştirak ediblər.

Tədbirdə çıxış edən Baş Nazirin müavini Əli Əhmədov qeyd edib ki, Azərbaycan hökuməti BMT-nin Əhali Fondu ilə çox sıx və səmərəli əməkdaşlıq edir. Təşkilatın Azərbaycan hökumətinə demoqrafiya və əhali sakinliyinin inkişafı sahəsində dəstək verdiyini qeyd edən Baş Nazirin müavini hökumətin dəlillərə əsaslanan etibarlı məlumatlarla təmin olunması baxımından fondun fəaliyyətini yüksək qiymətləndirib.

BMT-nin Azərbaycandakı rezident əlaqələndiricisi Qulam İshaqzai qeyd edib ki, ölkəmizdə fəaliyyət göstərdiyi 25 il ərzində təşkilat hökumətdən, özəl və ictimai sektordan olan tərəfdaşları ilə birgə əməkdaşlıq şəraitində müxtəlif uğurlu layihələr və tədbirlər həyata keçirib.

BMT-nin Əhali Fondunun Azərbaycan üzrə direktoru Karl Kulessa 25 il əvvəl Qahirədə Əhali və İnkişaf üzrə Beynəlxalq Konfransda (ICPD) qəbul edilmiş Fəaliyyət Proqramının əhəmiyyətindən danışıb. O, bu ilin noyabrında Keniyanın paytaxtı Nayrobidə təşkil ediləcək "ICPD-25” Sammiti haqqında məlumat verərək həmin proqramın hədəflərinə nail olmaq məqsədilə qlobal miqyasda və ölkə səviyyəsində bütün maraqlı tərəfləri daha sıx əməkdaşlığa çağırıb.

Tədbirdə BMT-nin Əhali Fondunun Azərbaycan nümayəndəliyi tərəfindən səmərəli və məhsuldar əməkdaşlığa görə fərqlənənlərə xüsusi təşəkkür elan edilib.

Azərbaycan.- 2019.- 28 sentyabr.- S. 3.