“Milli Rəqəmsal Yaddaşda Nəsimi irsi”

Prezident İlham Əliyevin "Böyük Azərbaycan şairi İmadəddin Nəsiminin 650 illik yubileyinin qeyd edilməsi haqqında” və "Azərbaycan Respublikasında 2019-cu ilin "Nəsimi ili” elan edilməsi haqqında” müvafiq sərəncamlarının icrası ilə əlaqədar Azərbaycan Milli Elmlər Akademiyasının (AMEA) Mərkəzi Elmi Kitabxanası (MEK) cari il üçün fəaliyyət planı hazırlayıb.

Planda MEK-in fondlarında Nəsimiyə aid mühafizə olunan materialların təftişi, sənədlərin sistemli axtarışı və mübadiləyə uyğunlaşdırılmış formatda elektron kataloqa, rəqəmsal bazaya daxil edilməsi, "Nəsimi” adlı e-bazanın yaradılması əsas yer tutur.

Bunlarla bağlı media vasitəsilə, o cümlədən MEK-in rəsmi www.mek.az saytında, sosial şəbəkələrdəki səhifələrində paylaşımlar edilməklə ictimaiyyətə mütəmadi məlumatlar veriləcək. Bundan başqa, kitabxana sərbəst ensiklopedik resurslarda - müxtəlif dillərdə olan "Vikipediya”larda Nəsiminin həyat və yaradıcılığı ilə bağlı məqalələrin yaradılmasını, mövcud olan yazıların əsaslı şəkildə redaktə edilməsini, 2019-cu ilin dekabrına qədər MEK-də sərginin təşkilini, "Bir kitabın izi ilə” formatında elektron təqdimatın hazırlanmasını və nümayişini, "Milli Rəqəmsal Yaddaşda Nəsimi irsi” mövzusunda müsabiqə keçirməyi də nəzərdə tutub.

Bu gün Nəsimi yaradıcılığı artıq milli-mənəvi varlığımızın ayrılmaz hissəsidir. Böyük mütəfəkkirin Azərbaycan xalqının mənəviyyat xəzinəsində layiqli yerini tutması ümummilli lider Heydər Əliyevin adı ilə bilavasitə bağlıdır. Məhz ulu öndərin təşəbbüsü ilə Azərbaycan ədəbiyyatının görkəmli nümayəndələrindən ilk dəfə Nəsiminin 600 illik yubileyi UNESCO-nun tədbirlər siyahısına daxil edilmiş və 1973-cü ildə beynəlxalq miqyasda qeyd olunmuşdur.

İmadəddin Nəsiminin 650 illik yibileyində də şairin irsinin araşdırılması istiqamətində mühüm addımlar atılacaqdır.

Rəhman SALMANLI

Azərbaycan.- 2019.- 27 yanvar.- S.6.