İlham Əliyevin Milli Məclisin işi ilə bağlı verdiyi tövsiyələr bundan sonra da ardıcıl yerinə yetiriləcək

Sahibə QAFAROVA: "Parlament Azərbaycanın dayanıqlı inkişafının təmin edilməsinə yönələn strateji xəttin həyata keçirilməsinə öz töhfəsini verəcək”

Aprelin 17-də Milli Məclisin növbəti plenar iclası keçirildi. İclası açıq elan edən Milli Məclisin Sədri Sahibə Qafarova ilk olaraq 2020-ci ilin birinci rübünün sosial-iqtisadi yekunlarına həsr olunan müşavirə ilə bağlı fikirlərini bildirdi.

Düşünülmüş siyasət insanlarımızın sağlamlığını qorumağa imkan verəcək

Sahibə Qafarova qeyd etdi ki, bu müşavirə bir çox vacib məqamları ilə diqqəti cəlb edir: "Möhtərəm Prezidentimiz özünün dərin məzmunlu nitqində ölkə iqtisadiyyatının vəziyyətini və inkişaf perspektivlərini ətraflı təhlil etdi.

Məmnunluqla qeyd olunmalıdır ki, birinci rübün göstəricilərinə görə ölkə iqtisadiyyatının əldə etdiyi nəticələr bütövlükdə müsbətdir.

Əlbəttə, dünyanın bütün ölkələrində yaşanan koronavirus pandemiyası Azərbaycandan da yan keçməmişdir və sosial-iqtisadi həyatımıza mənfi təsir göstərməkdə davam edir. Amma mən əminəm ki, həyata keçirilən qabaqlayıcı tədbirlər və düşünülmüş siyasət həm insanlarımızın sağlamlığını qorumağa, həm də iqtisadiyyatımıza dəyən ziyanın sürətlə aradan qaldırılmasına imkan verəcəkdir”.

Milli Məclisin Sədri bildirdi ki, cənab Prezident öz çıxışında ölkədə struktur islahatlarının davam etdirilməsi məsələlərinə də toxundu, icra orqanlarında, parlamentdə aparılan kadr dəyişikliklərini qeyd etdi: "Dövlət başçısı belə bir fikri də ifadə etdi ki, Prezident Administrasiyasında, Nazirlər Kabinetində və Milli Məclisdə aparılan ciddi islahatlar nəticəsində ölkəmiz indi yeni inkişaf mərhələsinə inamla qədəm qoyur və idarəetmədə təkmilləşmə göz qabağındadır.

Mən əmin etmək istəyirəm ki, altıncı çağırış Milli Məclisin birinci iclasında Azərbaycan Respublikasının Prezidenti cənab İlham Əliyevin Milli Məclisin işi ilə bağlı verdiyi tövsiyələr bundan sonra da ardıcıl yerinə yetiriləcək və ölkə parlamenti Azərbaycanın dayanıqlı inkişafının təmin edilməsinə yönələn strateji xəttin həyata keçirilməsinə öz töhfəsini verəcəkdir”.

AŞ PA-nın saxta seçkilərə münasibət bildirməməsi qəbulolunmazdır

Müşavirədə cənab Prezident beynəlxalq ictimaiyyətin gündəmində olan bir çox mühüm məsələlərlə bağlı əsaslandırılmış, ciddi arqumentlərə söykənən münasibətini diqqətə çatdırdı. O cümlədən Avropa Şurası Parlament Assambleyasının Azərbaycanın işğal olunmuş ərazilərində yaradılmış qondarma, cinayətkar rejimin keçirdiyi saxta seçkilərə münasibət bildirməməsini haqlı olaraq kəskin tənqid etdi. Bu barədə danışan Sahibə Qafarova dedi: "Hörmətli həmkarlar, siz bilirsiniz ki, mən son on il AŞPA-da Azərbaycan nümayəndə heyətinin üzvü olmuşam, həmin qurumun Büro üzvü və Komitə sədri kimi fəaliyyət göstərmişəm. Bu dövr ərzində mən və mənim hörmətli həmkarlarım bir çox hallarda qurumda ölkəmizə qarşı qərəzli münasibətin şahidi olmuşuq. Avropa Şurası Parlament Assambleyasında cəmləşmiş ermənipərəst dairələrin Azərbaycana böhtan atmaq, ölkəmizi nüfuzdan salmaq üçün saxta qətnamələr və qərarlar qəbul etmək, Azərbaycanı qaralamaq cəhdlərini dəfələrlə müşahidə etmişik. Bəzən təşkilatdakı antiazərbaycan, ermənipərəst qüvvələr ermənilərdən də artıq onların maraqlarını müdafiə ediblər.

Bu gün isə Parlament Assambleyasının qondarma "Dağlıq Qarabağ”dakı cinayətkar rejimin keçirdiyi saxta seçkilərə münasibət bildirməməsi, susqunluq nümayiş etdirməsi qəbulolunmazdır. Hesab edirəm ki, bu, həm də beynəlxalq hüquqa qarşı çox böyük hörmətsizlikdir. Ona görə də biz AŞ PA-nın bu davranışını qəti şəkildə pisləyirik və bununla əlaqədar Milli Məclis tərəfindən Avropa Şurası Parlament Assambleyasına etiraz məktubu göndərilmişdir”.

Dövlətə qarşı düşmənçilik edənlərin məqsədi ölkədə gərginlik yaratmaqdır

Müşavirədəki nitqində Prezident İlham Əliyevin ölkəmizdə yeni formalaşan siyasi konfiqurasiyanın və siyasi dialoq mühitinin gücləndirilməsi istiqamətində atılan addımları təqdir etməsinə münasibət bildirən Sahibə Qafarova dedi: "Azərbaycanda milli mənafedən, dövlətçilik maraqlarından çıxış edən bütün sağlam müxalifət partiyaları bu dialoqda iştirak edir, prosesə töhfə vermək üçün müvafiq addımlar atırlar. Çox təəssüf ki, hər zaman Azərbaycan dövlətçiliyinə, müstəqilliyimizə qarşı çıxış edən bəzi marginal qruplar bu dialoqdan imtina edərək xarici amilə bel bağlayıblar. Dövlətə qarşı düşmənçilik edən belə qrupların əsl məqsədi ölkəmizdə gərginlik yaratmaqdır. Özlərinə radikal müxalifət adını verən bu cür dağıdıcı qüvvələr hətta bütün bəşəriyyəti sarsıdan pandemiyadan və koronavirusdan belə öz məkrli niyyətlərini həyata keçirmək üçün istifadə etmək istəyirlər. Təbii ki, Azərbaycan cəmiyyəti, xalqımız bu cür davranışları görür və onların qeyri-sağlam, antimilli fəaliyyətini qətiyyətlə pisləyir. Azərbaycan xalqının mövqeyi bu yöndədir ki, ölkəmizdə yeni formalaşan siyasi konfiqurasiyada belə qüvvələrə yer yoxdur”.

Milli Məclis Mehriban Əliyevanın təşəbbüsünə qoşulur

Sahibə Qafarova onu da bildirdi ki, Azərbaycan Respublikasının Birinci vitse-prezidenti Mehriban xanım Əliyevanın təşəbbüsü ilə xeyirxah bir kampaniya başlanmışdır: "Xəstə insanlara kömək üçün qanvermə aksiyaları keçirilir. Mən belə düşünürəm ki, Milli Məclis də bu təşəbbüsə qoşulmalıdır. Biz bunun üçün Milli Məclisdə xüsusi yer ayırmışıq və həkim briqadası dəvət etmişik. Sabah (bu gün) Milli Məclisin binasında Milli Məclisin deputatları və Aparatın əməkdaşları könüllü qan verə bilərlər”.

O da diqqətə çatdırıldı ki, ötən iclasda Nazirlər Kabinetinin hesabatı dinlənildi. Ölkədə yaranmış epidemioloji vəziyyətlə əlaqədar olaraq Azərbaycan Respublikası Baş Nazirinin məruzəsi videoyazı şəklində təqdim edildi. Milli Məclisin iclasının bu hissəsinin stenoqramı və videoyazısı, eləcə də çıxış edə bilməmiş 31 deputatın çıxışlarının və suallarının yazılı mətnləri Nazirlər Kabinetinə göndərilib. Sahibə Qafarova bildirdi ki, əgər kiminsə əlavə çıxışı, təklifi və ya sualı varsa, onu Nazirlər Kabinetinə göndərmək üçün bizə təqdim etsin.

Bələdiyyə üzvlərinin 39,9 faizi gənclər, 38,8 faizi qadınlardır

Sonra gündəlikdəki məsələlərin müzakirəsi başladı. Əvvəlcə bələdiyyələrin fəaliyyətinə inzibati nəzarəti həyata keçirən orqanın illik məruzəsi dinlənildi. Məruzəni ədliyyə nazirinin müavini Vilayət Zahirov diqqətə çatdırdı. 2019-cu ildə sosial-iqtisadi tərəqqinin təmin olunduğunu deyən Vilayət Zahirov ölkə həyatının bütün sahələrində olduğu kimi, yerli demokratiyanın inkişafında da uğurların əldə edildiyini bildirdi. Yerli özünüidarəetmənin təşkili və bələdiyyələrin formalaşmasının 20 ilinin tamam olması, eləcə də növbəti bələdiyyə seçkilərinin keçirilməsi ölkəmizin ictimai-siyasi həyatında baş verən mühüm hadisələrdəndir.

Qeyd olundu ki, son seçkilər nəticəsində 1597 bələdiyyə üzrə 15075 bələdiyyə üzvü seçilib. Onlardan 5847 nəfər (38,8 faiz) qadınlar, 6012 (39,9 faiz) nəfər gənclərdir. Bələdiyyə üzvlərinin tərkibinin xeyli hissəsinin yeniləndiyi nəzərə alınaraq məqsədyönlü hüquqi maarifləndirmə işinin aparılması üçün xüsusi tədbirlər planı hazırlanaraq həyata keçirilib. "Bələdiyyələrin statusu haqqında” qanuna edilmiş dəyişikliyə əsasən, bələdiyyələrin fəaliyyətinin təşkilinə kömək və onlara metodoloji yardım göstərilməsinin hüquqi əsası ilk dəfə qanunla təsbit olunub.

Ötən il Ədliyyə Nazirliyi tərəfindən yerli özünüidarəetmə məsələləri ilə bağlı bir sıra normativ hüquqi aktların layihələri hazırlanıb və başqa tədbirlər görülüb. "Azərbaycan ədliyyəsinin inkişafına dair 2019-2023-cü illər üçün Dövlət Proqramı”nın icrası məqsədilə hazırlanmış "Bələdiyyələrin fəaliyyətinə inzibati nəzarət haqqında Azərbaycan Respublikasının Qanununda dəyişiklik edilməsi barədə” qanun layihəsi baxılması üçün Nazirlər Kabinetinə göndərilib. Ədliyyə Nazirliyi Kollegiyasının qərarı ilə "Bələdiyyələrin fəaliyyətinə inzibati nəzarətin təşkili haqqında” Təlimatda dəyişikliklər edilərək müvafiq qanuna uyğunlaşdırılıb.

İl ərzində 80261 (ötən illə müqayisədə 11 faiz çox) bələdiyyə aktı, o cümlədən Naxçıvan Muxtar Respublikasının Ədliyyə Nazirliyində 1796 akt hüquqi ekspertizadan keçirilib. 77427 akt qanunvericiliyə uyğun hesab edilib. Normativ hüquqi aktların tələblərinə zidd olan 2765 aktın dəyişdirilməsi və ya ləğv edilməsi üçün aidiyyəti bələdiyyələrə təkliflər verilib. Bu təkliflər əsasında bələdiyyələr tərəfindən 1285 akt ləğv edilib, 1274 akt dəyişdirilib.

Bələdiyyələr tərəfindən təmin olunmayan 19 təklif üzrə məhkəmələrdə iddia qaldırılıb, onlardan 8-i məhkəmə tərəfindən təmin edilib, 11 iddia isə hesabat ilinin sonuna məhkəmə icraatında olub. Qanunsuz verilmiş 7019 ha torpaq sahəsinin bələdiyyə mülkiyyətinə və ya sahibliyinə qaytarılması təmin edilib (ötən illə müqayisədə 18,5 faiz çox).

112 bələdiyyə sədri inzibati məsuliyyətə cəlb edilib

Bələdiyyə aktının ekspertiza üçün vaxtında təqdim edilməməsinə görə bələdiyyələrin vəzifəli şəxsləri barəsində 131 (2018-ci ildə 143) inzibati xəta haqqında protokol tərtib edilərək məhkəmələrə göndərilib, 112 bələdiyyə sədri inzibati məsuliyyətə cəlb edilib, 19 protokol isə ilin sonunda məhkəmə icraatında olub. Aparılmış 24 inzibati araşdırma üzrə toplanmış materiallar hüquqi qiymət verilməsi üçün prokurorluq orqanlarına göndərilib. 17 material üzrə cinayət işi başlanılıb, 1-i üzrə cinayət işinin başlanması rədd edilib, digərləri isə baxılmaqdadır.

Bələdiyyələrin fəaliyyəti ilə bağlı daxil olmuş 3304 müraciətdən 140-ı təmin və ya qismən təmin olunub (ötən illə müqayisədə 71 faiz çox). Hüquq pozuntularının və nöqsanların aradan qaldırılması və ya təkrar törədilməsinin qarşısının alınmasına önəm verilərək ayrı-ayrı bələdiyyələrə müxtəlif məsələləri əhatə edən 9264 tövsiyə göndərilib (ötən illə müqayisədə 55 faiz çox).

İl ərzində 235 bələdiyyədə kargüzarlıq və sənədlərin arxivləşdirilməsi işi öyrənilib, bu sahədə bələdiyyələrə zəruri kömək göstərilib. Sahibkarlığın inkişafı sahəsində bələdiyyələr tərəfindən 22 yeni müəssisə təsis edilib, fəaliyyətə başlamış 7 müəssisəyə 100-ə yaxın işçi cəlb edilib. 4 bələdiyyəyə dövlət büdcəsindən 1 milyon manat subvensiya ayrılıb və layihələr icra edilib. Bunun nəticəsində 140-dan çox iş yeri açılıb.

Mədən vergisinin, habelə mehmanxana, sanatoriya-kurort və turizm xidməti göstərən şəxslərdən ödənişlərin yerli büdcələrə ödənilməsi, icarəyə ayrılmış bələdiyyə torpaqlarının məqsədli təyinatına uyğun istifadəsi və icarə haqlarının bazar məzənnələrinə uyğunluğunun təmin edilməsi, o cümlədən bələdiyyələr tərəfindən sosial sığorta borclarının ödənilməsi məsələləri ilə bağlı bir sıra tədbirlər görülüb. Qeyd olundu ki, 2019-cu ildə də bələdiyyələrin milli assosiasiyaları ilə Ədliyyə Nazirliyinin əməkdaşlığı da davam etdirilib.

Məruzə ilə bağlı Regional məsələlər komitəsinin sədri Siyavuş Novruzov fikirlərini bildirdi və təkliflərini diqqətə çatdırdı. Təkliflərdən biri bələdiyyə seçkilərinin Seçki Məcəlləsindən çıxarılması və onunla bağlı ayrıca qanunun qəbul olunması haqda oldu. Eyni zamanda prezident və parlament seçkilərindən fərqli olaraq bələdiyyə seçkilərinin yerli əhəmiyyət daşıdığı üçün hissə-hissə keçirilməsini və bu işlə yalnız dairə seçki komissiyalarının məşğul olmasını məqbul saydı.

Parlamentin Təbii ehtiyatlar, energetika və ekologiya komitəsinin sədri Sadiq Qurbanov, Aqrar siyasət komitəsinin sədri Tahir Rzayev, deputatlardan Tahir Kərimli, Azər Badamov, Aydın Mirzəzadə məruzə ilə bağlı fikirlərini bildirdilər. Yekunda məruzə səsə qoyularaq nəzərə alındı.

Karantin zamanı hərəkət məhdudiyyətləri deputatlara şamil edilməyəcək

Milli Məclis Sədrinin birinci müavini, Hüquq siyasəti və dövlət quruculuğu komitəsinin sədri Əli Hüseynli "Azərbaycan Respublikası Milli Məclisi deputatının statusu haqqında” Azərbaycan Respublikasının Qanununda dəyişiklik edilməsi barədə (üçüncü oxunuş) Azərbaycan Respublikasının 1996-cı il 17 may tarixli 74-IQ nömrəli Qanunu ilə təsdiq edilmiş "Azərbaycan Respublikası Milli Məclisinin Daxili Nizamnaməsi”ndə dəyişiklik edilməsi haqqında (üçüncü oxunuş) və "Azərbaycan Respublikası Milli Məclisinin komitələri haqqında” Azərbaycan Respublikasının Qanununda dəyişiklik edilməsi barədə (üçüncü oxunuş) qanun layihələrini müzakirəyə təqdim etdi. Qeyd olundu ki, dəyişikliklər karantin rejiminin tətbiq edilməsi, sanitariya-epidemioloji və bu kimi məsələlərlə əlaqədar olaraq Milli Məclisin və Milli Məclisin komitə və komissiya iclaslarının müəyyən dövr üçün videokonfrans sistemi vasitəsilə keçirilməsi, həmçinin karantin rejiminin tətbiqi ilə əlaqədar ölkə ərazisində sərbəst hərəkətə qoyulan məhdudiyyətlərin deputata, onun şəxsi və xidməti nəqliyyat vasitələrinə şamil edilməməsi məsələləri ilə bağlıdır.

Qanun layihələri təsdiq olundu

"Böyük Vətən Müharibəsində Qələbənin 75 illiyi (1945-2020)” Azərbaycan Respublikasının yubiley medalının təsis edilməsi ilə əlaqədar "Azərbaycan Respublikasının orden və medallarının təsis edilməsi haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası Qanununun layihəsi də üçüncü oxunuşda təsdiq olundu.

Komitə sədrləri Hicran Hüseynova, Ziyafət Əsgərov və Bəxtiyar Əliyevin məlumatından sonra "Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında” Azərbaycan Respublikasının Qanununda dəyişiklik edilməsi barədə və "Sərhəd mühafizə orqanları haqqında”, "Təhsil haqqında” və "Peşə təhsili haqqında” Azərbaycan Respublikasının qanunlarında dəyişiklik edilməsi barədə qanun layihələrinə də deputatları müsbət münasibət bildirdilər.

Fasilədən sonra işini davam etdirən parlamentdə 3 qanun layihəsi - Cinayət Məcəlləsi və İnzibati Xətalar Məcəlləsində dəyişikliklər edilməsi, "Azərbaycan Respublikasının vətəndaşlığı haqqında” qanunda dəyişiklik edilməsi barədə qanun layihəsi (hər 3-ü birinci oxunuş) birgə müzakirəyə çıxarıldı.

Sənədlərlə bağlı geniş məlumat verən parlamentin Hüquq siyasəti və dövlət quruculuğu komitəsinin üzvü Kamal Cəfərov bildirdi ki, layihə Prezidentin "Məhkəmə-hüquq sahəsində islahatların dərinləşdirilməsi haqqında” 2019-cu il 3 aprel tarixli fərmanı ilə verilmiş tapşırığın icrası çərçivəsində hazırlanıb.

Prezident İlham Əliyevin humanist siyasətinin növbəti təzahürü

Bu layihə Prezident İlham Əliyevin humanist siyasətinin təzahürü olmaqla, həyata keçirilən sistemli və genişmiqyaslı hüquqi islahatların tərkib hissəsidir. Təklif edilən dəyişikliklər cinayət təqibi və cəzaların icrası sahələrində hüquqi islahatların növbəti mərhələsidir.

Belə ki, dövlət başçısının müvafiq fərman və sərəncamları ilə bu günə qədər 9 mindən artıq şəxs cinayət məsuliyyətindən azad edilib, 3 minə qədər şəxsin cəzası yüngülləşdirilib, 800-ə qədər şəxs azadlıqdan məhrumetmə cəzasından azad olunub.

Milli Məclisə təqdim edilən yeni layihədə 200-ə yaxın dəyişiklik təklif olunur. 35 cinayətin dekriminallaşdırılması nəzərdə tutulur, 10 cinayət əməli Cinayət Məcəlləsindən çıxarılır, 25 cinayət əməlinə görə məsuliyyət yaradan hədd artırılır. 3 cinayətə görə zərərçəkmiş şəxslə barışma və ziyanın ödənilməsi şərti ilə cinayət məsuliyyətindən azadetmə müəyyən olunur. 30 cinayətə görə sanksiyalara azadlıqdan məhrumetməyə alternativ cəzalar (cərimə, islah işləri və azadlığın məhdudlaşdırılması) daxil edilir. 60 cinayətə görə cərimə və ya azadlıqdan məhrumetmə cəzasının yüngülləşdirilməsi nəzərdə tutulur.

Hərbi xidmət əleyhinə cinayətlər bölməsində edilən dəyişikliklərin məqsədi isə orduda məhkumluqların sayının azaldılmasından ibarətdir. Belə ki, məhkumluqdan irəli gələn hüquqi nəticələr hərbi qulluqçuların gələcək karyerasına mənfi təsir göstərə bilər. Bununla belə orduda ciddi nizam-intizamın təkmilləşdirilməsi üçün Cinayət Məcəlləsində dekriminallaşdırılan əməllərə görə İnzibati Xətalar Məcəlləsində inzibati məsuliyyət müəyyən edilir.

Müzakirələr zamanı çıxış edən deputatlardan Fazil Mustafa, Azay Quliyev, Qüdrət Həsənquliyev, Rəşad Mahmudov, Jalə Əliyeva, Zahid Oruc, Sədaqət Vəliyeva, İlham Məmmədov, Arzu Nağıyev çıxış edərək fikir və təkliflərini səsləndirdilər. Qeyd edildi ki, bu dəyişikliklər onu deməyə əsas verir ki, Azərbaycanda cəza siyasəti yenə də humanistləşdirilir.

Çıxışlardan sonra sənədi təqdim edən deputat Kamal Cəfərov bəzi məsələlərə aydınlıq gətirdi və bildirdi ki, səslənən bütün fikir və təkliflər qanun layihələri ilə bağlı yaradılmış işçi qrupuna təqdim ediləcək. Sonra sənədlər ayrı-ayrılıqda səsverməyə çıxarılaraq birinci oxunuşda qəbul edildi.

İclasda həmçinin Miqrasiya Məcəlləsində dəyişiklik edilməsi haqqında qanun layihəsi birinci oxunuşda müzakirəyə çıxarıldı. Dəyişikliyə əsasən ölkəmizin ali və orta ixtisas təhsili müəssisələrində əyani formada və ümumi təhsil müəssisələrində təhsil alan əcnəbilər və vətəndaşlığı olmayan şəxslərlə yanaşı, peşə təhsili müəssisələrində təhsil alan şəxslərə də ölkəmizin ərazisində müvəqqəti yaşamaq icazəsinin verilməsi təklif edilir. Sənəd səsverməyə çıxarılaraq ilk oxunuşda təsdiqləndi.

"Dövlət rüsumu haqqında” qanunda dəyişiklik edilməsi barədə qanun layihəsinə (birinci oxunuş) təklif olunan dəyişiklik isə Miqrasiya Məcəlləsinə uyğun olaraq hazırlanıb və ölkəmizdə peşə təhsili müəssisələrində təhsil alan əcnəbilərə verilən icazə vəsiqəsinin təqdim edilməsinə görə dövlət rüsumunun məbləğinin tənzimlənməsini nəzərdə tutur. Dəyişiklik müsbət qarşılandı, sənəd səsə qoyularaq qəbul edildi.

Deputatlar həmçinin "Dövlət satınalmaları haqqında”, "Dövlət vergi orqanlarında xidmət haqqında Əsasnamə”də və "Nağdsız hesablaşmalar haqqında” qanunlarda dəyişiklik edilməsi barədə qanun layihəsini birinci oxunuşda qəbul etdilər.

Azərbaycanda kimyəvi silaha dair qadağalar müəyyənləşir

Prezident İlham Əliyev tərəfindən Milli Məclisə bir paketdə daxil olan 2 sənəd - 16-cı və 17-ci məsələlər parlamentin 6 komitəsində müzakirəyə çıxarılıb. Bu sənədlər - "Yol hərəkəti haqqında”, "Sosial sığorta haqqında”, "Tibbi sığorta haqqında”, "İşsizlikdən sığorta haqqında”, "Məşğulluq haqqında”, "Dövlət rüsumu haqqında”, "Əhalinin sağlamlığının qorunması haqqında”, "Ətraf mühitin mühafizəsi haqqında”, "Baytarlıq haqqında”, "Fitosanitar nəzarəti haqqında” və "Yeyinti məhsulları haqqında” qanunlarda və "Miqrasiya orqanlarında qulluq keçmə haqqında Əsasnamə”də dəyişiklik edilməsi barədə qanun layihəsi haqqında (birinci oxunuş), həmçinin Əmək Məcəlləsində, Torpaq Məcəlləsində, Vergi Məcəlləsində, Gömrük Məcəlləsində və Şəhərsalma və Tikinti Məcəlləsində dəyişiklik edilməsi haqqında qanun layihəsi (birinci oxunuş) idi.

Sənədləri təqdim edən Milli Məclis Sədrinin birinci müavini, parlamentin Hüquq siyasəti və dövlət quruculuğu komitəsinin sədri Əli Hüseynli bildirdi ki, dəyişikliklər bu sənədlərin tələblərinin pozulduğu halda yazılacaq cərimə rüsumları ilə bağlıdır. Məsələn, yol hərəkəti təhlükəsizliyini təmin etmək və müvafiq icra hakimiyyəti orqanının müəyyən etdiyi orqanların (qurumların) işçilərinin sosial müdafiəsini gücləndirmək məqsədi ilə yol hərəkəti qaydaları, yol hərəkəti təhlükəsizliyinin təmin edilməsi və avtomobil yollarından istifadə qaydalarının pozulmasına görə müvafiq icra hakimiyyəti orqanının müəyyən etdiyi orqan (qurum) tərəfindən İnzibati Xətalar Məcəlləsinə əsasən tətbiq edilən cərimələrdən, nəqliyyat vasitələrinin müşayiət olunması və haqqı ödənilən digər əlavə xidmətlərdən daxil olan vəsaitlərin 7 faizi dövlət büdcəsinə köçürüləcək.

Müzakirələrdə iştirak edən deputatlardan Qüdrət Həsənquliyev, Vahid Əhmədov, Fəzail Ağamalı çıxış edərək dəyişikliyə müsbət münasibət bildirdilər. Sənədlər səsverməyə çıxarılaraq qəbul edildi.

İclasda "Kimyəvi silahın hazırlanması, istehsalı, artırılması (yığılması) və tətbiq edilməsinin qadağan olunması və onun məhv edilməsi haqqında” qanun layihəsi birinci oxunuşda müzakirəyə çıxarıldı.

Sənədi təqdim edən parlamentin Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov məlumat verərək bildirdi ki, qanun layihəsinə əsasən bəzi fəaliyyətlər qadağan olunacaq. Bunlar kimyəvi silahın tətbiqi, kimyəvi silahın tətbiq edilməsi ilə bağlı hərbi hazırlıq keçirmək və ya hər hansı hərbi hazırlıqda iştirak etmək və digər müddəalardır. Qanunla qadağan olunan fəaliyyətlər Azərbaycanın tərəfdar çıxdığı beynəlxalq müqavilələrə uyğun olaraq, ölkə hüdudlarından kənarda yaşayan vətəndaşlara da şamil edilir. Bu qanunun tələblərinin pozulması qanunla müəyyən edilmiş məsuliyyətə səbəb olur. Layihə səsverməyə çıxarılaraq birinci oxunuşda qəbul edildi.

Kütləvi informasiya vasitələrinin dilinə dair yeni tələb

İclasda həmçinin "Hərbi qulluqçuların statusu haqında”, "İnzibati icraat haqqında”, "Təhsil haqqında” və "Elm haqqında” qanunlarda, "Hərbi xidmətkeçmə haqqında” Əsasnamə”də və İnzibati Prosessual Məcəlləsində dəyişiklik edilməsi barədə qanun layihəsi haqqında (birinci oxunuş), həmçinin Mənzil Məcəlləsində, İnzibati Xətalar Məcəlləsində, "Uşaq hüquqları haqqında”, "Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında”, "Qeyri-hökumət təşkilatları (ictimai birliklər və fondlar) haqqında”, "Gənclər siyasəti haqqında”, "Penitensiar müəssisələrdə cəza çəkməkdən azad edilmiş şəxslərin sosial adaptasiyası haqqında”, "Könüllü fəaliyyət haqqında”, "Bədən tərbiyəsi və idman haqqında”, "Reklam haqqında” və "Uşaqların zərərli informasiyadan qorunması haqqında” qanunlarda dəyişiklik edilməsi barədə qanun layihəsi (birinci oxunuş) təsdiqləndi.

Deputatlar həmçinin "İnformasiya, informasiyalaşdırma və informasiyanın mühafizəsi haqqında”, "Kütləvi informasiya vasitələri haqqında”, "Televiziya və radio yayımı haqqında”, "Azərbaycan Respublikasında dövlət dili haqqında” və "İctimai televiziya və radio yayımı haqqında” qanunlarda dəyişiklik edilməsi barədə qanun layihəsinə müsbət münasibət bildirdilər.

Qeyd edək ki, "Kütləvi informasiya vasitələri haqqında” qanuna təklif edilən dəyişiklikdə qanunun 6-cı maddəsinə (Kütləvi informasiya vasitələrinin dili) təklif edilən əlavəyə əsasən, kütləvi informasiya vasitələrində dövlət dili normalarına riayət edilməlidir. İndiyə qədər "Kütləvi informasiya vasitələri haqqında” qanunda sadəcə Azərbaycan Respublikasının ərazisində kütləvi informasiya vasitələrinin dövlət dilindən istifadə etməsinə dair müddəa əksini tapmışdı. Sənəd birinci oxunuşda qəbul edildi.

"Azərbaycan Respublikası Milli Məclisinin Daxili Nizamnaməsi”ndə, "Televiziya və radio yayımı haqqında”, "Azərbaycan Respublikası Dövlət bayrağının istifadəsi qaydaları haqqında” və "İctimai televiziya və radio yayımı haqqında” qanunlarda dəyişiklik edilməsi barədə qanun layihəsi (birinci oxunuş), həmçinin "Tarix və mədəniyyət abidələrinin qorunması haqqında” və "Azərbaycan Respublikasında dövlət dili haqqında” qanunlarda dəyişiklik edilməsi barədə qanun layihəsi (birinci oxunuş) "Reklam haqqında” qanunda edilən dəyişikliyə uyğunlaşdırmaq məqsədi daşıyır. Sənədlər səsverməyə çıxarılaraq birinci oxunuşda qəbul edildi və Milli Məclisin plenar iclası başa çatdı.

Rəşad CƏFƏRLİ,

Rəşad BAXŞƏLİYEV

Azərbaycan.-2020.- 18 aprel.- S.1;4.