Koronaviruslu günlərdə ziyafət...

Bəşəriyyət can hayında, onlarsa..

Dünya koronavirus adlı mərəzin əsirinə çevrilib. Bir neçə aydır ki, bu bəladan çıxmaq üçün çırpınır, çarə yolları axtarır, dərman tapmağa çalışır. Hələliksə bunlara nail olunmayıb. Koronavirus sürətlə yayılaraq dünyada 2 milyondan çox insana yoluxub, 150 mindən artıq insanın həyatına son qoyub. Nə yazıq ki, bu statistika artan tendensiya ilə davam edir. Amma yayıldığı ilk zamanlarda onu ciddiyə almayan, dərhal təhlükəsizlik tədbirləri görməyən, sosial izolyasiya qaydalarını tətbiq etməyən ölkələrə qarşı daha amansız olur, yoluxma hallarını, aldığı canların sayını çoxaldır.

Bu virusun yayılması hava-damcı yolu ilə olduğu üçün onun qarşısını ala bilmək yalnız profilaktik tədbirlər görməklə, Ümumdünya Səhiyyə Təşkilatının (ÜST) tövsiyələrinə əməl etməklə mümkündür. Buna görə də Azərbaycanda virusun üzə çıxdığı ilk zamanlardan etibarən ciddi və təxirəsalınmaz tədbirlər həyata keçirilməyə başlanıldı. Koronavirusun geniş vüsət almasına imkan verməmək və insanların sağlamlığını qorumaq üçün həyata keçirilən tədbirlərin əhatə dairəsi genişləndirildi.

Qalib gəlmək üçün vacib şərt...

Ölkə üzrə xüsusi rejimli xəstəxanalarda olan xəstələrin səhhəti, karantinə yerləşdirilən şəxslərdən götürülən test nümunələri, eləcə də karantin rejimi müddətində paytaxt və regionlarda xəstəlik fonundakı sanitar-epidemioloji vəziyyət təhlil edilib, insanların həyat və sağlamlıqlarının daha səmərəli qorunması, virusun yayılması sürətinin kəskin azaldılması məqsədi ilə Azərbaycan ərazisində tətbiq olunan karantin rejiminin uzadılması məqsədəuyğun sayıldı. Bu baxımdan xüsusi karantin rejiminin 20 aprel 2020-ci il saat 00:00-dan 4 may 2020-ci il saat 00:00-dək uzadılmasına qərar verildi. Bununla əlaqədar Azərbaycan Respublikası ərazisinə yerüstü və hava nəqliyyatı yolu ilə giriş-çıxışa, yerli hava uçuşlarına tətbiq olunan məhdudiyyətlər, eləcə də bütün təhsil müəssisələrində tədris, təlim-tərbiyə prosesinin dayandırılması 4 may 2020-ci il saat 00:00-dək uzadıldı.

Bütün bu tədbirlər qlobal pandemiyanı nəzarətdə saxlamağa və yoluxmanın tempini aşağı salmağa imkan yaradır. Bununla yanaşı, xəstəliyin erkən aşkarlanması, yoluxan insanların sağaldılması, aztəminatlı, kimsəsiz və yaşı 65-dən yuxarı olan tənha insanlara yardım edilməsi və digər zəruri tədbirlər də ölkəmizdə pandemiyanın fəsadlarını xeyli azaldır.

Fərqində olmamaq...

Amma koronavirusa qalib gəlmək və bu bəladan qurtulmaq həm də vətəndaşların sosial məsuliyyəti sayəsində mümkündür. Səbirlə, təmkinlə qoyulan qaydalara uymaq, vacib iş olmadan küçəyə çıxmamaq, evlərimizdə qalmaq isə ən vacib şərtdir, amma nə yazıq ki, bəziləri hələ də dünyanı tərsinə çevirən bu gözəgörünməz bəlanın ciddiliyinin, təhlükəsinin fərqində deyil...

Belə olmasaydı, karantin rejimi başlayandan minlərlə şəxs məsuliyyətsiz davranaraq müxtəlif yollarla qoyulan qaydaları pozmazdı. İcazəsiz küçələrdə dolaşanlar, yaxınının yas mərasimi adı ilə evdən çıxanlar, maşınının yük yerində yaxınını gizlədərək postlardan keçmək istəyənlər və daha neçə-neçə bu cür faktlar aşkarlandı. Gizli fəaliyyət göstərmək istəyən kafelər, saxta icazə sənədləri hazırlayanlar üzə çıxarıldı...

Təkcə 18-20 aprel tarixləri arasında yaxın qohumunun yas mərasimində iştirak etmək adı ilə 8103 nömrəsinə həqiqətə uyğun olmayan müraciət edən daha 169 nəfərin şəxsiyyəti müəyyən edildi və onlar inzibati qaydada cəzalandırıldı.

Qeyd edək ki, bu cür sui-istifadə hallarına yol verənlər barəsində İnzibati Xətalar Məcəlləsinin 211-ci maddəsi ilə müvafiq tədbirlər görülüb və onların hər biri 100 manat məbləğində cərimə edilib.

Kür qırağının əcəb seyrəngahı var, amma...

Ötən həftə 19 nəfərin Kür çayı sahilində karantin rejimini heçə sayaraq düzənlədikləri qonaqlıq görüntüləri isə sözün əsl mənasında hər kəsi heyrətə saldı...

Ayın 20-də isə bənzər mənzərə Qubada təkrarlandı. Rayonun 2-ci Nügədi kəndi ərazisində yerləşən Çənlibel gölü ətrafında toplaşaraq yeyib-içmək məclisi təşkil edərək karantin qaydalarını pozan 5 gənc saxlanıldı.

Koronavirusla mübarizə aparılan çətin günlərdə qeydə alınan belə qayda pozuntularının siyahısını uzatmaq da olar, amma elə həmin iki fakt da bəs edir düşünəsən ki, bu necə arxayınlıq, bu necə məsuliyyətsizlikdir? Görəsən, həmin şəxslərin ölkədə, dünyada baş verənlərdən xəbəri yoxdurmu? İnsanlığın yaşam savaşı verdiyi belə bir anda hansı sevincli, əlamətdar günü qeyd edirlər?

İnsanların sağlamlığı, həyatı ilə oynadıqlarını, virusun daha da yayılmasında vasitəçi olduqlarını düşünmürlərmi?

Bu çətin, sınaqlarla dolu zamanda kimsənin problem yaşamaması üçün dövlətimiz bütün aztəminatlı ailələrə mütəmadi yardımlar edir, onların dayağında durmağa çalışır.

Yaxşı olmazmı ki, karantin rejimini pozaraq qonaqlıqlar, ziyafətlər təşkil edənlər özlərinin, doğmalarının və digərlərinin həyatını riskə atmaqdansa, köməyə ehtiyacı olanlara yardım edərək dövlətimizə dəstək olsunlar...

Həm də müqəddəs Ramazan ayının başladığı bu günlərdə əməlisaleh bir işə imza atmış olsunlar...

Qaydalara uyaq, uymayanları da riayət etməyə çağıraq...

Yaşana biləcək faciəvi ssenarilərin qarşısına keçmək mümkündür və bu, bizim əlimizdədir. Sosial izolyasiyaya əməl etməklə təhlükəni aradan qaldıra bilərik.

Dövlətimizin gördüyü tədbirlərin effektivliyi həm də fərdi qaydada hər bir vətəndaşın üzərinə düşən müvafiq məsuliyyəti yerinə yetirməsindən asılıdır. Bütün bunlar milli təhlükəsizlik, həmrəylik məsələsidir və vətəndaşlardan maksimal şəkildə diqqətli və məsuliyyətli olmaq tələb edir.

Tətbiq olunan qaydalara ciddi riayət etməyimiz, evdə qalmağımız özümüzün və sevdiklərimizin həyatını, ümumilikdə insanlığı xilas etmiş olacaq…

Gəlin vətəndaş olaq, nəfsimizin qurbanına çevrilib, mahiyyətsiz bir əyləncə, düşünülməmiş bir addım nəticəsində insanlara qənim kəsilməyək.

Bir olaq, birlik olaq, bir-birimizə dayaq duraq, düşmənə də birgə qalib gələk...

Qaydalara uyaq, uymayanları da riayət etməyə çağıraq...

Yasəmən MUSAYEVA

Azərbaycan.-2020.- 22 aprel.- S.5.