Paşinyanla kilsənin savaşı böyüyür

Yerevanda artıq katolikosun istefası tələb olunur

Ermənistanda hakimiyyətlə kilsə qarşıdurmasının getdikcə dərinləşməsi müşahidə olunur. Bu hal Ermənistan katolikosu II Qareginin sabiq prezident Robert Koçaryana azadlıq tələb etməsindən sonra yenidən aktuallaşıb.

Xatırladaq ki, bu günlərdə Qaregin erməni mediasına açıqlamasında Robert Koçaryan barəsində həbs-qətimkan tədbirinin dəyişdirilməsinin zəruriliyini bildirib: "Ermənistanın ikinci prezidenti Koçaryana gəldikdə, həkimlərin onun sağlamlığı ilə bağlı peşəkar fikirlərinə toxunaraq, ədalət mühakiməsinin həyata keçirilməsi ilə yanaşı bütün qabaqlayıcı üsul və tədbirlərin görülməsini, o cümlədən vəziyyətin daha da gərginləşməməsi üçün ehtiyat tədbirinin dəyişdirilməsini vacib sayırıq”.

Kilsəyə qarşı informasiya hücumu

Katolikosun bu açıqlaması Ermənistan hakimiyyətinin xoşuna gəlmədi və gözlənildiyi kimi, Nikol Paşinyan komandası informasiya hücumu təşkil etdi. Müxtəlif hökumət rəsmiləri katolikosu qınayan açıqlamalar verdilər. Ermənistan parlamentinin vitse-spikeri Alen Simonyan hətta bildirdi ki, minlərlə Ermənistan vətəndaşı artıq çoxdan katolikosun dəyişdirilməsini tələb edir: "Mən deyərdim ki, Ermənistanın minlərlə vətəndaşı artıq çoxdan katolikosun dəyişdirilməsini tələb edir. Düşünürəm ki, Qaregin illərlə səssiz qalıb, bu gün isə pulu bol olan Koçaryanın ilkin həbsinin dəyişdirilməsinin zəmanətçisi kimi çıxış etmək qərarına gəlib”.

Ermənistan parlamentinin keçmiş deputatı Lilit Qalstyan ermənilərin katolikosu ətrafında baş verən hadisələri şərh edərkən deyib ki, bu hal yeni qarşıdurmaya rəvac verir: "Hətta dərindən düşünəndə dəhşətə gəlirsən. Milli institutlarımıza qarşı bu amansız və utanmaz hücum, dinsizlərin hücumu deyərdim, ilk gündən başlayıb. Bütün milli institutları hədəfə alırlar. Bunlar ən vacib milli, dövlət dirəkləri olan ailə, kilsə, milli mədəniyyət və ordudur. Kimliyimizi gücləndirən dəyərləri hədəfə alan, ləkələyən, məhv edən siyasi texnologiyaları görmək çətin deyil. Vehapar və kilsə bu sıradadır”.

"Koronavirus kilsəyə revanş üçün yaxşı bəhanə olub”

Rusiyanın "lenta.ru” saytı yazır ki, əslində, hökumətlə kilsə arasında yaşananların dinlə əlaqəsi yoxdur. Belə ki, Paşinyanın hakimiyyətə gəlməsindən sonra hökumət kilsənin zənginliyinin səbəblərini araşdırmağa başlayıb, məktəblərdən dini yığışdırıb və ateistlər üçün dövlət vəzifələrini açıq elan edib. Hətta Eçmiədzinə belə ateist qadın rəhbər gətirilib ki, bu da kilsəni qəzəbləndirib: "Koronavirus kilsəyə revanş üçün yaxşı bəhanə olub. Bütün dünyada həkimlər, virusoloqlar koronavirus tapmacası üzərində baş sındırdığı zaman Ermənistanda dindarların səyləri ilə buna "çarə” dərhal tapılıb. İnsanları virusun həddən artıq təhlükəli olmadığına, ondan kompüterdə iki düyməni sıxmaqla azad olmağın mümkün olduğuna inandıra biliblər.

Məsələn, erməni kilsələrindən birinin "Facebook” səhifəsində buxur tüstüsünün mikrobların havada, suda və orqanizmdə artmasının qarşısını aldığına və bütün virusları məhv etdiyinə dair saxta elmi dezinformasiya paylaşılıb. Bunun mənasının nə olduğu aydındır. Erməni Apostol Kilsəsinin Ararat Yeparxiyasının rəsmi saytında buxurun təkcə kilsədən alınmasına dair tapşırıq var”.

Fövqəladə hal ölkədə kilsənin təbliğatını artırıb. Hətta vəziyyət o həddə çatıb ki, keşişlər koronavirusun ya psixoloji hal olduğunu, ya da tanrının cəzası olduğunu təbliğ etməyə başlayıblar. Təbliğat o qədər yüksəlib ki, hətta sosial şəbəkələrdəki az baxışa sahib olan dini səhifələr də bir neçə dəfə yüksəlib. Bununla əlaqədar olaraq ölkədə dini xurafat həddən ziyadə artıb.

Rus portalı həmçinin hökumətin də öz maraqları üçün koronavirusa ilk gündən əhəmiyyət vermədiyini bildirir. Hətta Paşinyan əsl koronavirusun dövlət orqanizmini zəhərləyənlərdən olduğunu deyərək, öz hakimiyyətini gücləndirmək üçün israrla referendum təşviqatını aparıb. Fevralın 26-da səhiyyə naziri Arsen Torosyan belə koronavirusun ciddi bir şey olmadığını söyləyib. Amma epidemiya özünü çox gözlətməyib və bir neçə gün sonra koronavirusa qeyri-ciddi yanaşan hakimiyyət mövqeyini 180 dərəcə dəyişməyə məcbur olub. Kilsə də bundan hökumətə qarşı istifadə edir.

Rahiblərin cinayətə cəlb olunması tapşırığı verilib

Paşinyan və komandası kilsə rəhbərliyini dəyişdirmək planlarını yenidən işə salıb. Artıq Paşinyanın ailəsinə aid "Aykakan Jamanak” belə bir yazı ilə çıxış edib ki, Paşinyan Koçaryanın azadlığını tələb edənləri bağışlamayacaq. Bu xüsusda Paşinyan hüquq mühafizə orqanlarının rəhbərlərini yanına dəvət edərək, kilsənin rahiblərini cinayətə cəlb etmək üçün hər cür səy göstərmələrini tapşırıb. Bundan başqa, hakimiyyət nəzarəti altında olan media vasitələrinə ləkələyici faktlar əsasında kilsəyə qarşı hücuma keçmək tapşırığı verilib.

Artıq Milli Təhlükəsizlik Xidmətinin İstintaq departamenti kilsənin yeparxiyasından birinin rəhbərinə qarşı ittiham irəli sürüb. Söhbət Ararat Patriarxal Yeparxiyasının lideri Navasard Kçoyandan gedir.

"Politik.am” nəşri yazır ki, Ermənistan hökuməti öz qarşısına kilsə ilə aparılacaq belə bir siyasəti əsas qoyubsa, bu, olduqca ibtidai və işləməyən bir tezisdir: "Əslində, hökumətin hədəf aldığı qurumun rolundan və əhəmiyyətindən bir an ayrılsaq, hakimiyyətin təsadüfən qorxularını dilə gətirdiyinin şahidi olarıq. Koçaryanı azadlıqda görmək Paşinyan administrasiyasının demək olar ki, ən böyük qorxusudur və hakimiyyəti hərəkətlərinə nəzarətetmə ampluasından çıxara biləcək gücə malikdir. II Qaregin şəxsiyyətinə müsbət və ya mənfi münasibətindən, dini etiqadından asılı olmayaraq Paşinyanın sırf siyasi cəhətdən ən böyük qorxusu, daha doğrusu, hazırkı baş nazirin ən çox nədən qorxduğu amil ortaya çıxdı”.

Beləliklə, indiki durumda kilsə də Paşinyanın hakimiyyətini tam qəbul etmir. Bu da qarşıdurmanı şiddətləndirir.

Elçin CƏFƏROV

Azərbaycan.-2020.- 23 aprel.- S.1;6.