“Siz bir daha əsl liderlik missiyası nümayiş etdirdiniz”

Qlobal pandemiyaya çevrilən koronavirus infeksiyası Azərbaycandan da ötmədi. Lakin respublikamızda virusun yayılmasının qarşısının alınması və ağır nəticələrə səbəb olmaması üçün ilk gündən təxirəsalınmaz tədbirlər həyata keçirildi.

Bütün bunları ilk gündən nəzarətdə saxlayan Prezident İlham Əliyevin təşəbbüsü ilə problemin vətəndaşların sosial rifahına və iqtisadi həyatımıza çətinlik yaratmaması üçün müvafiq proqramlar da həyata keçirilməkdədir.

Azərbaycan ictimaiyyəti bütün bu tədbirləri böyük razılıqla qarşılayaraq təqdir edir. Bu günlərdə ölkənin hər yerindən dövlət başçısına ünvanlanan məktublarda vətəndaşların səmimi təşəkkürləri ifadə olunur. Eyni zamanda bu məktubların hər birində xalqımızın nümayiş etdirdiyi milli həmrəyliyi görürük. Bakı şəhərindən Arif Hüseynzadə adına 20 saylı məktəb-liseyin şagird və müəllimləri də ölkə başçısına minnətdarlıq məktubu ünvanlayıblar.

Bu gün bəşəriyyətin ağır sınaq qarşısında olduğunu, pandemiya təhlükəsindən sərhədlərin bağlandığını, nəticədə bir çox ölkələrdə səhiyyənin, təhsilin, iqtisadiyyatın və digər sahələrin çətin vəziyyətə düşdüyünü, hətta inkişaf etmiş dövlətlərin belə koronavirus qarşısında aciz qaldığını qeyd edən məktəb-liseyin direktoru, Əməkdar müəllim Səadət Veysova dövlət başçısına xitabən yazır: "Cənab Prezident, məhz Sizin qətiyyətli iradəniz və təşəbbüskarlığınız sayəsində ilk gündən ölkəmizdə koronavirusun geniş yayılmasının qarşısını almaq məqsədilə vətəndaşlarımızın sağlamlığının qorunmasına xidmət edən bütün zəruri, qabaqlayıcı addımlar atıldı. Azərbaycan vətəndaşlarının sağlamlığının qorunması, pandemiyadan zərər çəkən bütün təbəqələrin sosial qayğı ilə əhatə olunması, xaricdə olan soydaşlarımıza diqqət göstərilməsi, həmçinin tibb işçilərinə xüsusi qayğının göstərilməsi ilə bağlı həyata keçirdiyiniz strateji əhəmiyyətli fəaliyyətlər həm Azərbaycan xalqının təhlükəsizliyinə zəmin yaradır, həm də bu çətin günlərdə onlara mənəvi və maddi dəstək verir. Bütün bunların nəticəsidir ki, Azərbaycan koronavirusla mübarizədə beynəlxalq səviyyədə təqdir olunan fəaliyyət ortaya qoyur”.

Səadət Veysova daha sonra yazır: "Bu günlərdə Siz bir daha əsl liderlik missiyası nümayiş etdirdiniz. Bir daha təsdiq etdiniz ki, xalqımızın layiqli rəhbərisiniz. Çünki hər bir məsələdə vətəndaşların yanındasız. Biz də təhsil işçiləri olaraq həmişə Sizin yanınızdayıq. Bu gün üçün müəyyənləşdirib uğurla tətbiq etdiyiniz idarəçilik modelinin alternativsiz olduğunu anlayırıq. Sizin "Biz birlikdə güclüyük!” çağırışınız xalqımızın bütün tarixi dövrlərdə birlikdə olmasının nə qədər vacib olduğunu göstərən aydın baxışın ifadəsidir.

Bu narahat günlərdə biz təhsil işçiləri öz məsuliyyətimizi anlayır və karantin günlərində də şagirdlərimizi onlayn vasitələrlə tədrisə cəlb edirik. Qarşımızda duran əsas məqsəd Sizin və hörmətli Birinci vitse-prezident Mehriban xanım Əliyevanın verdiyi tövsiyə və tapşırıqları indiki şəraitdə də layiqincə yerinə yetirməkdir. İnanırıq ki, respublikamızın hər yerində təhsil işçiləri öz vəzifə borclarını əsl vətəndaşlıq missiyası ilə həyata keçirirlər. Çünki təhsil işçilərinin öz vəzifələrini layiqincə yerinə yetirmələri həm də Sizin liderliyinizlə xalqımızın milli həmrəyliyinin təcəssümü və "Biz birlikdə güclüyük!” çağırışınızın uğurla reallaşmasının göstəricisidir.

Hörmətli cənab Prezident, biz Sizinlə sıx birlik və həmrəylik nümayiş etdirir, Azərbaycanımız naminə həyata keçirdiyiniz məsuliyyətli və şərəfli fəaliyyətinizdə Sizə daha böyük və yeni-yeni uğurlar arzulayırıq. Allah Sizi və öz şərəfli missiyası ilə ölkəmizin inkişafına layiqli töhfələr verən Birinci vitse-prezident Mehriban xanım Əliyevanı qorusun! Biz Sizlərlə fəxr edirik!”

Məktəb-liseyin Azərbaycan dili və ədəbiyyat müəllimi Həmidə Sanıyevanın məktubunda qeyd olunur ki, Prezident İlham Əliyevin operativ şəkildə verdiyi tapşırıqlar nəticəsində koronavirusun geniş yayılmasının qarşısı alınır. Bu, ilk növbədə, məhz Prezidentin vətəndaşlara diqqət və qayğısının həmişə ön planda olmasını göstərir.

"Siz və Birinci vitse-prezident Mehriban Əliyevanın məktəbimizin açılışı zamanı kollektivimiz qarşısında qoyduğunuz tapşırıq və göstərişləri əzmlə yerinə yetirməyə çalışırıq. Məktəbin açılışına gəlməyiniz kollektivimizi daha da ruhlandırmış və yeni-yeni nailiyyətlər qazanmağa sövq etmişdir. Üzərimizə düşən vəzifələri layiqincə yerinə yetirərək Sizin etimadınızı doğruldacağıq.

"Biz birlikdə güclüyük!” çağırışınıza biz təhsil işçiləri də qoşularaq belə bir şəraitdə şagirdlərin təhsildən geri qalmaması üçün onlayn şəkildə dərsləri davam etdirməyi özümüzə borc bilirik.

İnanırıq ki, qısa müddət ərzində bəşəriyyət üçün bəlaya çevrilən pandemiyaya qalib gələcəyik. Xalqımıza, ölkə vətəndaşlarına göstərdiyiniz diqqət və qayğıya görə Sizə dərin minnətdarlığımızı bildiririk. Biz Sizinlə güclüyük!”, - deyə H.Sanıyeva yazır.

20 nömrəli məktəb-liseyin XI sinif şagirdi, Ümummilli lider Heydər Əliyevin anadan olmasının 95 illiyinə həsr olunmuş "Ən yaxşı təqdimat” ümumrespublika müsabiqəsinin qalibi Elnur Qaracayev da Prezident İlham Əliyevə minnətdarlıq məktubu ünvanlayıb. O yazır: "Möhtərəm Prezident! Artıq bir neçə aydır ki, dünya, o cümlədən Azərbaycan koronavirus pandemiyası ilə mübarizə aparır. Azərbaycanda pandemiya ilə mübarizədə qabaqlayıcı tədbirlərin həyata keçirilməsi, bu çətin dövrdə bir çox vacib amillərin (təhsil, sosial və s.) Sizin tərəfinizdən daim diqqətdə saxlanılması xalqımızda böyük inam və əminlik hissi yaradır.

Cənab Prezident! Biz şagirdlər Sizin koronavirusla mübarizə ilə bağlı tələb və tövsiyələrinizə əməl edib evdə qalsaq da, təşkil olunmuş teledərslər və müəllimlərimizin keçdiyi onlayn dərslər sayəsində təhsilimizi davam etdiririk. 2020-ci ilin abituriyentləri olacaq biz XI-ləri qarşıda ali məktəblərə qəbul imtahanları gözlədiyi üçün bu dərslərə daha məsuliyyətlə yanaşırıq. Belə bir şəraitin yaradılması şəxsən Sizin Azərbaycanın gələcəyinə və təhsilinə göstərdiyiniz yüksək münasibətin, diqqət və qayğınızın nəticəsidir. Bunun üçün biz şagirdlər Sizə minnətdarıq, əziz Prezidentimiz!

Cənab Prezident! Biz anlayırıq ki, indi ən vacib məsələ, Sizin qeyd etdiyiniz kimi, ölkəmizin bu pandemiyadan maksimum az itkilərlə xilas olmasıdır. Bunun üçün hər birimiz üzərimizə düşən vəzifələri layiqincə yerinə yetirməli, məsuliyyətimizi dərindən dərk etməli, Sizin rəhbərliyinizlə bütöv xalq olaraq sıx birlik və həmrəylik nümayiş etdirməliyik. Biz inanırıq ki, Azərbaycan bu sınaqdan da üzüağ çıxacaq!”

Rəşad CƏFƏRLİ

Azərbaycan.-2020.- 23 aprel.- S.2.