Azərbaycan uzadılmış karantin rejimindən mərhələli çıxış ərəfəsindədir

Hansı mərhələnin daha tez yumşaldılmasına başlanması və ardıcıllığı müzakirə olunur

Qlobal pandemiya elan edilən koronavirusdan qurtulmaq üçün bütün dünya səfərbər olub. Azərbaycanda da infeksiyanın yayıldığı ilk zamanlardan etibarən ona qarşı mübarizə tədbirləri həyata keçirilir. COVID-19-un ölkəmizdə yarada biləcəyi təhlükənin qarşısının alınması məqsədi ilə Prezident İlham Əliyevin tapşırığına əsasən, hələ yanvar ayından zəruri qabaqlayıcı tədbirlər görülməyə başlandı. Profilaktik və təxirəsalınmaz qərarların həyata keçirilməsi üçün Nazirlər Kabinetinin yanında aidiyyəti dövlət qurumlarından ibarət Operativ Qərargah yaradıldı.

Virusun erkən aşkarlanması istiqamətində aparılan testlərin sayı get-gedə artırıldı. Azərbaycanda indiyədək koronavirusa yeni yoluxma hallarının müəyyənləşdirilməsi ilə əlaqədar 102.764 test aparılıb.

Virusun yayılmasının qarşısının alınması istiqamətində ölkədə xüsusi karantin rejimi tətbiq olundu və hazırda bu rejim 2020-ci il 20 aprel saat 00:00-dan 2020-ci il 4 may saat 00:00-dək uzadılıb. Bununla əlaqədar Azərbaycan Respublikası Nazirlər Kabinetinin 2020-ci il 2 aprel tarixli 124 saylı qərarında qeyd olunan bütün tədbirlər, o cümlədən yükdaşımaları istisna olmaqla, Azərbaycan Respublikası ərazisinə yerüstü və hava nəqliyyatı yolu ilə giriş-çıxışa, yerli hava uçuşlarına tətbiq olunan məhdudiyyətlər, eləcə də bütün təhsil müəssisələrində tədris, təlim-tərbiyə prosesinin dayandırılması 2020-ci il 4 may saat 00:00-dək uzadılır.

Prezident İlham Əliyevə təşəkkür məktubları gəlməkdə davam edir

Eyni zamanda ölkədəki sanitar-epidemioloji vəziyyət təhlil edilərək uzadılmış karantin rejimi dövründə ayrı-ayrı sahələrdə tətbiq olunan məhdudiyyətlərin yumşaldılması da istisna edilmir.

Nazirlər Kabinetinin Mətbuat xidmətinin rəhbəri İbrahim Məmmədov bildirib ki, bu həftə uzadılmış karantin rejimindən mərhələli çıxış planı hazırlanacaq. Hazırda bununla bağlı bizə iki əsas prinsip məlumdur: "Mayın 4-dən sonrakı dövrdə artıq karantindən çıxış mərhələsi başlayır. Karantindən çıxış isə mərhələli şəkildə həyata keçiriləcək. Biz artıq mayın 4-də mart ayındakı situasiyaya qayıtmayacağıq. Bu, gözlənilmir. Bu barədə artıq fikir ayrılığı yoxdur və qərar qəbul olunub. Hansı mərhələnin daha tez yumşaldılmasına başlanılması və ardıcıllığı müzakirə olunur. Bu həftədən uzadılmış karantin rejimindən mərhələli çıxış planının detalları məlum olacaq və bu qarşıdan gələn günlərdə ictimaiyyətə elan ediləcək”.

Ölkəmizdə koronavirusa qarşı gördüyü effektiv tədbirlərə görə, Azərbaycan Prezidenti İlham Əliyevə təşəkkür məktubları gəlməkdə davam edir. Ölkənin müxtəlif guşələrindən dövlət başçısına məktublar ünvanlayan vətəndaşlar koronavirusun qarşısının alınması, virusa yoluxmuş insanların müalicəsi, əhalinin sosial-iqtisadi problemlərinin həlli istiqamətində görülən işləri yüksək qiymətləndirirlər.

Birdəfəlik ödəmələrin verilmə prosesi hər gün davam edir

Əmək və Əhalinin Sosial Müdafiəsi Nazirliyi 30 min işsiz və xüsusi karantin rejiminə görə işini itirən qeyri-formal məşğul aztəminatlı şəxsin birdəfəlik ödəmə (190 manat) ilə təmin olunması üçün müvafiq vəsaiti aidiyyəti üzrə köçürüb.

Nazirlikdən verilən məlumata görə, həmin kateqoriyalardan olan şəxslərdən artıq 290 min nəfərə birdəfəlik ödəniş edilib və bunun üçün köçürülən maliyyə vəsaitinin məbləği 55,1 milyon manatdır.

İlkin mərhələdə 200 min şəxsə birdəfəlik ödəmə verilməsi nəzərdə tutulsa da, Prezident İlham Əliyevin tapşırığına əsasən birdəfəlik ödəmə proqramının əhatə dairəsi 3 dəfə artırılıb, 600 min şəxsə aprel və may ayları üçün birdəfəlik ödəniş ediləcək.

Aprel ayı üzrə ödənişlərin bu ayın sonu - gələn ayın əvvəlləri yekunlaşdırılması təmin olunacaq.

Hazırda hər bir ödəniş edilən şəxsin telefon nömrəsinə bu barədə SMS göndərilir. O, bu mesajı aldıqdan sonra evdən çıxmaq üçün müvafiq qaydada icazə alaraq mesajda "Azərpoçt” MMC qeyd edildiyi halda istənilən poçt şöbəsinə, bank göstərildiyi halda isə həmin bankın istənilən filialına şəxsiyyət vəsiqəsi ilə müraciət edərək birdəfəlik ödəməni əldə edirlər.

Birdəfəlik ödəmələrin verilməsi prosesi hər gün davam edir.

Pandemiyadan zərər çəkənlərin sosial yükü azaldılacaq

Azərbaycanda kənd təsərrüfatında çalışanların sosial yükü azaldılacaq. Bu, pandemiyadan zərər çəkmiş sahələrdə fəaliyyət göstərən sahibkarlıq subyektlərinə (o cümlədən kiçik və orta sahibkarlığa) vergi güzəştləri və tətilləri mexanizmi sənədinə əsasən həyata keçiriləcək.

Mövcud qanunvericilikdə mülkiyyətində olan kənd təsərrüfatına yararlı torpaqları istifadə edən fiziki şəxslərin torpaq sahəsinin az və ya çox olmasından asılı olmayaraq, sabit olaraq hər bir əmək qabiliyyətli ailə üzvünə görə minimum əməkhaqqının 6 faizi miqdarında baza sosial sığorta haqqı nəzərdə tutulur. Minimum aylıq əməkhaqqı məbləğinin 250 manat məbləğinədək artırıldığını nəzərə alsaq, 5 hektaradək torpaq sahəsi və 4 nəfər ailə üzvü olan kənd təsərrüfatına yararlı torpaqları istifadə edən fiziki şəxslər aylıq 60 manat məbləğində məcburi dövlət sosial sığorta haqqı ödəməlidir.

Karantin rejimini pozanlar məsuliyyətə cəlb olunurlar

Koronavirus infeksiyasının yayılmasının qarşısının alınması məqsədi ilə tətbiq edilən xüsusi karantin rejiminin pozulmasına görə 21.04.2020-ci il saat 00:00-dan 22.04.2020-ci il saat 00:00-dək olan müddət ərzində respublikanın avtomobil yollarında nəqliyyat vasitələri ilə hərəkətdə olan 1822 nəfər Azərbaycan Respublikası İnzibati Xətalar Məcəlləsinin 211-ci maddəsi ilə inzibati məsuliyyətə cəlb edilib.

Baş Dövlət Yol Polisi İdarəsindən verilən məlumata görə, ümumilikdə 01.04.2020-ci il tarixindən bu günədək respublikanın, o cümlədən paytaxtın avtomobil yollarında xüsusi karantin rejiminin pozulmasına görə 35 156 hərəkət iştirakçısı inzibati məsuliyyətə cəlb olunub.

Koronavirus dünyada

Dünyada COVID-19 virusundan sağalanların sayı 700 mini keçib. Koronavirusdan ölənlərin sayı isə 178 281 nəfərdir.

İspaniyada son sutka ərzində yeni növ koronavirusdan 435 nəfər vəfat edib və ölkədə indiyə kimi bu virusdan ölənlərin sayı 21 717 nəfərə çatıb. Bu günə kimi ölkədə 208 389 nəfər COVID-19 virusuna yoluxub ki, onlardan 85 915 nəfər sağalıb.

Almaniyada son sutka ərzində yeni növ koronavirusa 2237 yoluxma qeydə alınıb, 281 nəfər vəfat edib. Robert Kox İnstitutunun məlumatına görə, ölkədə indiyə kimi 145 694 nəfər bu virusa yoluxub, 99 mindən çox insan sağalıb, 4879 nəfər ölüb.

Meksikada son sutka ərzində COVID-19-a 729 yeni yoluxma qeydə alınıb, 145 nəfər ölüb. Ölkədə indiyə kimi 9501 nəfər koronavirusa yoluxub.

Pakistanda isə son sutkada yeni növ koronavirusdan 17 nəfər ölüb, 533 yeni yoluxma qeydə alınıb. Ölkədə virusa yoluxanların sayı 9759 nəfərə, xəstəlikdən ölənlərin sayı isə 209 nəfərə çatıb. İndiyə kimi 2156 nəfər xəstəlikdən sağalıb. Ölkədə ən çox yoluxma Pəncab əyalətində qeydə alınıb.

İsraildə yeni növ koronavirusa 384 yoluxma qeydə alınıb, 3 nəfər vəfat edib. İsrail Səhiyyə Nazirliyi məlumat yayıb ki, ölkədə koronavirusa yoluxanların sayı 14 326 nəfərə çatıb, xəstəlikdən 187 nəfər ölüb.

Rusiyada son sutka ərzində daha 5236 nəfər yeni növ koronavirusa yoluxub və bununla da ölkə ərazisində COVID-19-a yoluxanların sayı 57 999 nəfərə çatıb. Son sutka ərzində 57 nəfər ölüb, ümumilikdə ölənlərin sayı 513 nəfərə çatıb. Xəstəlikdən sağalanların sayı 4420 nəfərdir.

Ukraynada son sutka ərzində COVID-19-a 467 yoluxma qeydə alınıb, 13 nəfər ölüb. Ukraynada indiyə kimi 6592 nəfər koronavirusa yoluxub, 174 nəfər ölüb.

Gürcüstanda yeni növ koronavirusa yoluxanların sayı 411 nəfərə çatıb. Hazırda ölkə üzrə karantində 5015 nəfər saxlanılır, stasionar müalicədə isə 573 nəfər var. Virusa yoluxmuş şəxslərdən 97-si sağalıb, 4 nəfər isə vəfat edib.

İranda son 24 saat ərzində yeni növ koronavirusdan 94 nəfər vəfat edib və bununla da ölkədə bu virusdan ölənlərin sayı 5391 nəfərə çatıb. Burada son 24 saat ərzində 1194 yeni yoluxma faktı qeydə alınıb və indiyədək COVID-19 virusuna yoluxanların sayı 85 996 nəfərə çatıb.

Ermənistanda son sutka ərzində yeni növ koronavirusa 72 yoluxma qeydə alınıb. Bununla da xəstəliyə yoluxanların sayı 1473 nəfərə çatıb. Burada koronavirusdan 24 nəfər ölüb.

Bəzi ölkələrdə karantin rejimi yumşaldılacaq, amma...

Slovakiyadakı koronavirusla bağlı tətbiq edilmiş karantin rejimi aprelin 22-dən yumşaldılacaq. Ölkənin Baş Naziri İqor Matoviç bildirib ki, çərşənbə günündən etibarən respublikada ilk karantin güzəştləri ediləcək: "Xüsusilə sahəsi 300 kvadratmetrə qədər olan mağazalar və xidmət müəssisələri açılacaq. Eyni zamanda stadionlarda idman etməyə, müvafiq iaşə xidmətlərindən istifadəyə, yəni bufeti və yeməkxanaları olmayan yataqxanaların, açıq ərazilərdəki fermer bazarlarının, avtomobil salonlarının fəaliyyətinə icazə veriləcək”.

Hollandiya hökuməti tərəfindən iyunun 1-dək qüvvədə olan kütləvi tədbirlərə qoyulan qadağa sentyabrın 1-dək uzadılıb. Bu barədə Hollandiyanın Baş Naziri Mark Ryutte bildirib ki, məhdudiyyətlər həmçinin böyük yay musiqi festivallarına, eləcə də idman yarışlarına da şamil ediləcək: "Ölkədə koronavirusun yayılması səbəbindən bu il futbol çempionatı oynanılmayacaq. Bəli, bu, kədərli xəbərdir. Bu tədbirləri qurban verməyə məcburuq”.

Fransa Prezidenti Emmanuel Makron çərşənbə axşamı ölkənin dini konfessiyalarının nümayəndələri ilə telekonfrans zamanı bildirib ki, Fransadakı dini obyektlər mayın 11-dən, yəni karantin rejimi ləğv edildikdən sonra açılmayacaq: "Görünür, bu obyektlər yalnız iyunun ortalarından etibarən fəaliyyətə başlaya biləcək”.

ABŞ-ın bu ştatı Çin hökumətini məhkəməyə verib

"ABŞ-ın Missuri ştatı Çin hökumətini məhkəməyə verərək ölkəni koronavirusa yoluxdurmaqda günahlandırıb”. Bu barədə ştatın baş prokuroru Erik Şmitt açıqlamasında bildirib.

Prokurorun sözlərinə görə, Çin hökuməti COVID-19 təhlükələri və yoluxucu olması barədə dünyaya yalan məlumat verib, şikayət edənləri susdurub və xəstəliyin yayılmasını dayandırmaq üçün heç bir iş görməyib: "Çin hökuməti hərəkətlərinə görə cavab verməlidir”.

Məhkəmənin iddiasına görə, Çin hakimiyyəti ictimaiyyəti aldatmaqda, vacib məlumatları yayımlamamaqda, şikayətçiləri həbs etməkdə, virusun insandan insana ötürülmə faktını rədd etməkdə, tibbi araşdırmaları məhv etməkdə, milyonlarla insanın virusla təmasda olmasına imkan verməkdə ittiham edilir.

Çin hakimiyyətinin isə bu və digər iddiaları rədd etdiyi bildirilir.

Taclı bəlaya qarşı yeni peyvənd sınaqları

Almaniyada yeni növ koronavirusa qarşı hazırlanmış peyvəndin klinik sınağına icazə verilib. Bu barədə ölkənin Peyvəndlər üzrə Federal İnstitutu məlumat yayıb.

Peyvəndin effektivliyini yoxlamaq üçün klinik sınaqlarda 18-55 yaş aralığında 200 nəfər sağlam şəxs iştirak edəcək.

Bundan başqa, Böyük Britaniyanın Səhiyyə naziri Matt Hankok deyib ki, bu gün ölkəsində Oksford Universiteti tərəfindən koronavirusa qarşı hazırlanan peyvəndin sınağına başlanılacaq.

Qeyd edək ki, Ümumdünya Səhiyyə Təşkilatı (ÜST) hazırda COVID-19-a qarşı 20 peyvəndin üzərində iş getdiyini bildirib.

Yasəmən MUSAYEVA

Azərbaycan.-2020.- 23 aprel.- S.6.