Azərbaycanda koronavirusla bağlı müsbət dinamika müşahidə olunur

Bu, ölkəmizdə ilk günlərdən görülən effektiv tədbirlərin real bəhrəsidir

Dünyada koronavirus pandemiyası ilə mübarizə davam edir. Çindən alovlanıb bütün ölkələrə yayılan COVID-19-un qarşısının alınması məqsədilə karantin rejimi, sosial izolyasiya tədbirləri həyata keçirilir.

Azərbaycanda da təhlükəli virusun yox edilməsi istiqamətində ciddi tədbirlər görüldü və bu effektiv tədbirlər qısa müddətdə müsbət təsirini göstərməyə başladı.

Elə buna görə də aprelin 27-dən etibarən koronavirus təhlükəsi ilə əlaqədar ölkə ərazisində tətbiq olunmuş məhdudiyyətlərin bir qismi yumşaldılıb. Nazirlər Kabineti yanında Operativ Qərargahın məlumatında bildirilir ki, COVID-19 virusu ilə bağlı hazırkı sanitar-epidemioloji vəziyyət, xüsusilə də xəstəliyin yayılma dinamikası və coğrafiyası, karantin zonalarındakı şəxslərin sıxlığı, onlar arasında virusa yoluxma halları təhlil edilib və 27 aprel 2020-ci il tarixindən məhdudiyyətlərin bir qisminin yumşaldılmasına qərar verilib.

Ölkə Prezidentinə minnətdarlıq məktubları gəlməkdə davam edir

Prezident İlham Əliyev Avropa Yenidənqurma və İnkişaf Bankının prezidenti Suma Çakrabarti ilə videokonfrans zamanı da səsləndirdi ki, ölkəmiz ilk gündən real vəziyyətə əsaslanan tədbirlər görməyə başladı: "Vəziyyətin düzgün dəyərləndirilməsi və bu böhranla məşğul olunması üçün səmərəli komandanın yaradılması bizim üçün çox vacib idi. Azərbaycana bu virus qonşuluqdan gəldi və bunun qarşısını almaq üçün biz müvafiq addımlar atdıq və qonşu dövlətlərlə razılıq və birgə qərar əsasında sərhədlərimizi bağladıq. Hesab edirəm ki, biz bu qərarı vaxtında və digər ölkələrin bənzər qərarlarından tez verdik və beləliklə, zaman udmuş olduq. Biz görürük ki, bu virusla mübarizədə ən vacib məsələ vaxtdır, çünki heç bir ölkənin səhiyyə sistemi bu qədər böyük sayda yoluxmuş insanların müalicəsinə hazır deyil. Bu səbəbdən vaxtın qazanılması, səhiyyə sistemimizin hazırlanması, mütəxəssis və həkimlərimizin səfərbər edilməsi və düzgün idarəçiliyin qurulması əsas hədəflərimiz oldu”.

Azərbaycanda pandemiya ilə mübarizədə mühüm addımların atılmasına, dövlətimizin bütün imkanlarını virusun yayılmasının qarşısının alınmasına və onun fəsadlarının aradan qaldırılmasına yönəltməsinə görə ölkənin müxtəlif guşələrindən Prezident İlham Əliyevə vətəndaşlardan minnətdarlıq məktubları gəlməkdə davam edir.

Pandemiyadan sonrakı dövrdə sərnişin axınını təmin etmək üçün fəaliyyət planı

Ötən gündən etibarən Bakı-Sumqayıt istiqamətində sərnişin axınının artması nəzərə alınaraq bütün avtobuslar xəttə çıxarılıb.

Bu barədə "Report”a Nəqliyyat, Rabitə və Yüksək Texnologiyalar Nazirliyi yanında Dövlət Avtomobil Nəqliyyatı Xidmətinin (DANX) İctimaiyyətlə əlaqələr sektorunun müdiri Nuridə Allahyarova məlumat verib.

Onun sözlərinə görə, təmsil etdiyi qurum pandemiyadan sonrakı dövr üçün fəaliyyət planı hazırlayıb, ölkədəki 56 avtovağzal və avtostansiya sərnişin axınını təmin etmək üçün hazır vəziyyətə gətirilib: "Karantin müddəti bitdikdən sonra regionlardakı sərnişinlərin paytaxta qayıtması ilə kifayət qədər sərnişin sıxlığı gözlənilir. Həmçinin Bakıda qalan sərnişinlərin də regionlara getməsi gözlənilir. Mərhələli şəkildə sərnişinlərin hərəkəti təmin ediləcək”.

Karantin rejimini pozanlar məsuliyyətə cəlb olunurlar

Koronavirus infeksiyasının yayılmasının qarşısının alınması məqsədilə tətbiq edilən xüsusi karantin rejiminin pozulmasına görə 28.04.2020-ci il saat 00:00-dan 29.04.2020-ci il saat 00:00-dək olan müddət ərzində respublikanın avtomobil yollarında nəqliyyat vasitələri ilə hərəkətdə olan 806 nəfər Azərbaycan Respublikası İnzibati Xətalar Məcəlləsinin 211-ci maddəsi ilə inzibati məsuliyyətə cəlb edilib.

Baş Dövlət Yol Polisi İdarəsindən bildirilib ki, ümumilikdə 01.04.2020-ci il tarixindən bu günədək respublikanın, o cümlədən paytaxtın avtomobil yollarında xüsusi karantin rejiminin pozulmasına görə 43177 hərəkət iştirakçısı inzibati məsuliyyətə cəlb edilib.

Effektiv koronavirus müalicəsi Azərbaycanda da tətbiq ediləcək

Koronavirus xəstələrinin müalicəsində istifadə olunan konvalesent plazma müalicəsi artıq Azərbaycanda da tətbiq edilməyə başlanılacaq.

TƏBİB-dən verilən məlumata görə, immun plazma müalicəsi COVID-19 diaqnozu ilə müalicə alıb sağalmış xəstələrdən Mərkəzi Qan Bankı tərəfindən toplanan qan plazmasının ağır vəziyyətdə olan xəstələrdə istifadəsi ilə həyata keçirilən müalicə metodudur.

Qurum koronavirus xəstələri üçün kimlərin plazma donoru ola biləcəyi barədə də məlumat verib:

- COVID-19 diaqnozu laborator olaraq təsdiqlənib sonradan sağalan şəxslər;

- klinik olaraq tam sağalmadan ən azı 14 gün sonra, 2 dəfə test nəticəsi neqativ olan şəxslər;

- 18-60 yaş arası könüllülər;

- kişi və hamilə olmayan qadınlar (düşüyü və abort olmamış), həyatının heç bir dövründə qan transfuziyası edilməmiş insanlar.

Uyğun donor qan donorluğunda olduğu kimi, razılıq forması doldurur və müayinə edilir. Daha sonra donordan qan alınaraq laborator testlər həyata keçirilir. Test nəticələri uyğun olan donorlardan aferez metodu ilə plazma alınır. Prosedur 45-60 dəqiqə davam edir. Donordan immun plazma 1 ay ərzində ən çox 3 dəfə, ilk plazmanın götürüldüyü tarixdən etibarən 7-10 gün fasilə ilə alına bilər.

Plazma alınmasının donor üçün hansı riski var:

- bu prosedurun donorun sağlamlığı üçün heç bir riski yoxdur;

- aferez proseduru zamanı qanın ayrılması üçün istifadə olunan setlər birdəfəlik və sterildir;

- setlər qapalı sistem kimi işləyir;

- prosedur zamanı qan cihazla təmas etmir.

Sağalan xəstələrin məlumatları TƏBİB tərəfindən Mərkəzi Qan Bankına göndərilir və plazma donorları Mərkəzi Qan Bankı tərəfindən seçilir. Könüllü donorlar müəyyən olunmuş növbəli sistem əsasında Mərkəzi Qan Bankına dəvət olunur. Gəlmə imkanı olmayan könüllü donorlar üçün Mərkəzi Qan Bankı tərəfindən gəliş-gedişləri təmin olunur. Xəstəxanadan gələn tələblərə əsasən plazmalar göndərilir. Plazma istəyi xəstənin yaxını və ya xəstənin özü tərəfindən edilə bilməz.

Məlumatda o da bildirilir ki, bu müalicə tam ödənişsizdir, bütün xərclər TƏBİB tərəfindən qarşılanır.

Dünyanın koronavirus mənzərəsi

Ümumdünya Səhiyyə Təşkilatının yaydığı məlumatda bildirilir ki, son statistikaya görə, dünyada 3186694 nəfər yeni növ koronavirusa yoluxub, 225529 nəfər isə bu ölümcül virusun qurbanına çevrilib. Son gün ərzində 50186 insanda koronavirus aşkarlanıb, ölənlərin sayı isə 7716 nəfər artıb.

Ən çox yoluxma və ölüm halları Avropa regionunda qeydə alınıb - 1345389 yoluxma və 132373 ölüm. Sutka ərzində burada yoluxanların sayı 22683, ölənlərin sayı isə 5951 nəfər artıb.

Şimali və Cənubi Amerikada virusa yoluxanların ümumi sayı 1290428 nəfər təşkil edir, indiyədək 73292 nəfər ölüb.

ÜST-ün son məlumatına görə, ən çox yoluxanlar ABŞ-dadır - 1048834 nəfər. Onun ardınca İspaniya (236899), İtaliya (203591), Fransa (165911), Böyük Britaniya (165221) və Almaniya (160479) gəlir.

Metronun fəaliyyəti karantin davam etdiyi dövrdə bərpa olunarsa...

"Bakı Metropoliteni” Qapalı Səhmdar Cəmiyyətinin Mətbuat xidmətinin rəhbəri Bəxtiyar Məmmədov bildirib ki, metro stansiyaları fəaliyyətini bərpa edəcəyi təqdirdə sərnişinlərə sosial məsafə saxlamaqla bağlı mütəmadi xəbərdarlıqlar olunacaq. Onun sözlərinə görə, bununla bağlı metroda sərnişindaşıma fəaliyyəti dayandırılana qədər də tövsiyələr olunub: "Bakı Metropoliteninin bütün stansiyalarında sosial məsafə saxlamaq barədə sərnişinlər mütəmadi məlumatlandırılıb. Əgər metronun fəaliyyəti karantin davam etdiyi dövrdə bərpa olunarsa, bu kimi müraciətlər, maarifləndirmə və tövsiyə xüsusiyyətli bir sıra tədbirlər davam etdiriləcək. Həmçinin metro nəqliyyatında mümkün olan bir sıra xəbərdaredici əyani nümunələr də tətbiq edilə bilər. Sosial məsafənin qorunmasının təşkili metropolitendə digər yerlərdə olduğundan çox da fərqlənmir. İctimai nəqliyyatda, o cümlədən metroda da sosial məsafənin qorunmasına riayət edilməsi əsasən sərnişinlərdən asılı olan məsələdir”.

Yasəmən MUSAYEVA

Azərbaycan.-2020.- 30 aprel.- S.6.