Azərbaycan həqiqətləri Almaniyada geniş ictimaiyyətə çatdırılıb

Avqustun 20-də Milli Məclisin Sədr müavini, Gənclər və idman komitəsinin sədri Adil Əliyevin təşkilatçılığı ilə Almaniyanın Köln şəhərində Azərbaycan, Türkiyə və bir sıra digər ölkələrin nümayəndələrinin iştirakı ilə görüş keçirilib.

Milli Məclisin Mətbuat və ictimaiyyətlə əlaqələr şöbəsindən AZƏRTAC-a verilən məlumata görə, tədbirdə Ermənistanın ölkəmizə qarşı davam edən işğalçılıq siyasəti haqqında geniş məlumat verilib. Ermənistanın Azərbaycan ərazilərini qanunsuz zəbt etməsi, ölkəmizin torpaqlarının 20 faizinin işğal altında qalması, 1 milyondan artıq azərbaycanlının qaçqın və məcburi köçkün vəziyyətində yaşaması, Azərbaycan Respublikasının ərazi bütövlüyünün bərpası ilə bağlı BMT-nin qəbul etdiyi 4 qətnamənin bu günə qədər Ermənistan tərəfindən icra edilməməsi diqqətə çatdırılıb.

Görüşdə cari il iyul ayının 12-də Azərbaycan-Ermənistan sərhədinin Tovuz rayonu istiqamətində erməni tərəfinin törətdiyi təxribat barədə danışılıb. Yaranmış qarşıdurma nəticəsində şəhid olan hərbi qulluqçularımız haqqında məlumat verilib, onların əziz xatirəsi yad edilib.

Tədbir iştirakçıları Azərbaycanla həmrəyliklərini nümayiş etdirərək, Ermənistanın işğalçılıq siyasətini birmənalı olaraq pisləyiblər.

Azərbaycan.- 2020.- 22 avqust.- S.4.