Neft-qaz sənayesində milli işçi qüvvəsi yetişdirmək yenə də gündəmdədir

"Əsrin müqaviləsi” imzalandıqdan sonrakı ilk illərdə saziş çərçivəsində dənizdə və quruda həyata keçirilən layihələrdə çalışanların 90 faizi xarici vətəndaşlar idi. İşçilərin yalnız 10 faizini yerli sakinlər təşkil edirdi. Hədəf isə nisbəti dəyişdirmək idi. Tikinti, əməliyyat və ofis işlərində çalışanların 90 faizinin Azərbaycan vətəndaşlarından ibarət olması qarşıya məqsəd qoyulmuşdu.

Bunun gerçəkləşəcəyinə çoxları inanmırdı. Xüsusilə müxalifət nümayəndələri layihələrdə çalışanların əksəriyyətinin öz mütəxəssislərimiz, texniklərimiz və fəhlələrimiz olacağına şübhə ilə yanaşdıqlarını açıq və qərəzli şəkildə bəyan edirdilər.

Zaman isə öz sözünü dedi. Məsələn, Azərbaycanda ən iri neft-qaz və ixrac layihələrinin əməliyyatçısı olan BP-nin ixtisaslı işçilərinin 90 faizini 2018-ci ilin ortalarından milli kadrlar təşkil edir. İxtisas tələb olunmayan işlərdə çalışanların isə hamısı Azərbaycan vətəndaşıdır. BP-nin bu ilin birinci yarısına aid olan hesabatında bildirilir ki, hazırda şirkətdə çalışan ölkə vətəndaşlarının sayı 2485 nəfərdir. Buraya müddətli müqavilə əsasında işləyənlər də daxildir.

İndi şirkətin təkcə ofisindəki işçilərin deyil, podratçı və subpodratçı müəssisələrində çalışanların da tərkibinin 90 faizi milliləşdirilib. Əməliyyatçı şirkət daim bəyan edir ki, Azərbaycandakı uzunmüddətli uğurlar istedadlı və müxtəlifyönlü əməkdaşlarının olmasından asılıdır.

Odur ki, təlim və inkişaf proqramlarını daha da optimallaşdırmaq, yüksəksəviyyəli kadrlar üzrə yerli bazarı daha da yaxşılaşdırmaq məqsədilə dövlət və özəl sektorun təşəbbüslərində yaxından iştirak etmək səyləri davamlı xarakter daşıyır. Başqa sözlə, Azərbaycanda güclü milli işçi qüvvəsi yetişdirmək şirkətin əsas prioritetlərindən biri olaraq qalır. İş təcrübəsi az olan və ya heç olmayan gənclərin təliminə sərmayə qoyulur, yeni istedadlar cəlb edilir və bütün karyera səviyyələrində işçilərə geniş çeşiddə inkişaf imkanları təklif edilir.

Prezident İlham Əliyev "Əsrin müqaviləsi”nin imzalanmasının tarixini xatırlayaraq bu məsələyə də böyük önəm vermiş və demişdir: "Danışıqlar çox gərgin keçirdi, bir çox problemlər var idi. Hər iki tərəf istəyirdi ki, özü üçün ən məqbul şərtləri əldə etsin. Nəticə etibarilə biz, hesab edirəm ki, çox məqbul kompromisə gələrək Azərbaycan üçün ən gözəl şərtləri əldə etdik. O şərtlər bugünkü pay bölgüsündə öz əksini tapıb. Bu gün mənfəət neftinin 75-80 faizi Azərbaycana çatır. Baxmayaraq ki, Azərbaycan yatağın işlənməsinə vəsait qoymayıb. O vaxt biz müqaviləyə belə bir maddə saldıq ki, vaxt keçdikcə işləyən insanların ən azı 90 faizi Azərbaycan vətəndaşları olmalıdır, buna da nail olduq. Bu da kadr hazırlığı deməkdir. Bu gün yaxşı təlim keçmiş kadrlar müxtəlif ölkələrdə işləyirlər, bizdə işləyirlər”.

Hazırda bir çox azərbaycanlı neft-qaz mütəxəssisi Böyük Britaniya, İraq, Rusiya və digər ölkələrdə müxtəlif vəzifələrə təyin olunaraq yüksək peşəkarlıq və səriştə nümayiş etdirir. Onlar həm quru, həm də dəniz əməliyyatları üzrə ixtisaslaşıb.

Əslində, Azərbaycandan olan işçilərin xaricdə, əcnəbilərin isə ölkəmizdə məqbul nisbətdə beynəlxalq təyinatı inkişaf üçün faydalıdır. Azərbaycanda həyata keçirilən neft-qaz və ixrac layihələrində Birləşmiş Krallıqdan, ABŞ-dan, Braziliyadan, Kanadadan, Misirdən və digər ölkələrdən olan onlarca mütəxəssisin müvəffəqiyyətlə çalışması buna misaldır.

Prezident İlham Əliyev yüksək peşə təlimi keçərək neft-qaz layihələrində bilik və bacarıq nümayiş etdirən insanların çox böyük işlər gördüyünü, ölkəmizin inkişafına böyük töhfə verdiyini dəfələrlə vurğulayıb. Azərbaycanın beynəlxalq layihələrdə çalışan yüksəkixtisaslı mütəxəssislərini böyük sərvət adlandırıb və qeyd edib ki, neft, qaz tükənən sərvətlərdir. İntellektual potensial, bilik, savad, səriştə, təcrübə isə dəyişməz sərvətdir.

Odur ki, milli işçi qüvvəsi yetişdirmək daim gündəmdə olan məsələlərdəndir. Əsas şərt işçinin düzgün seçilməsidir. Bu səbəbdən də əməkdaşların işə götürülməsində, vəzifədə irəli çəkilməsində hər kəsə qabiliyyətinə görə imkan yaratmaq öhdəlik kimi qəbul olunub.

Flora SADIQLI

Azərbaycan.- 2020.- 23 avqust.- S.1; 3.