Biləsuvarın qəhrəman oğulları

Hər bir elin, diyarın öz adətləri, ənənələri var. Evdən-evə, eldən-elə, nəsildən-nəslə keçərək yaşayır, inkişaf edir bu ənənələr. Vaxt ötüb zaman keçdikcə yeni forma, məzmun alır həmin keyfiyyətlər.

Ənələrə sadiq qalan bölgələrimizdən biri də Biləsuvardır. Sovetlər birliyi dövründə baş vermiş 1941-1945-ci illərin Böyük Vətən müharibəsində alman faşizminə qarşı müharibədə yüzlərlə biləsuvarlı igidliklə vuruşmuşdur. Onların bir çoxu həlak olmuş, bir hissəsi isə sinəsi orden və medalla doğma Vətənə qayıtmışdır. Sonrakı illərdə bu torpağın yetirməsi olan neçə-neçə zəhmət adamı əmək cəbhəsinin qəhrəmanları olmuş, Sosialist Əməyi Qəhrəmanı kimi yüksək ada layiq görülmüş, doğulub boya-başa çatdıqları yurda başucalığı gətirmişlər.

Müstəqilliyimizin ilk illərində mənfur qonşularımız tərəfindən işğal olunan Qarabağımız göz dağımız idi. Düşmən o zaman yaranmış fürsətdən istifadə edərək əzəli torpaqlarımızı ələ keçirmiş, 1 milyon soydaşımızı dədə-baba yurdundan qovmuşdu. Bunlar azmış kimi dünyanın başqa-başqa ölkələrində yaşayan erməniləri Qarabağda yerləşdirməklə onu əbədi olaraq özününküləşdirmək istəmişlər. Bu isə hər bir vətənpərvər gəncdə, el oğlunda işğalçı ermənilərə qarşı sonsuz nifrət, qəzəb hissi yaradırdı.

Biləsuvarlı gizir Mübariz İbrahimovun içində kükrəyən, qəzəblənən qəzəb hissi onu düşməndən qisas almağa çağırırdı. Bu səbəbdən o, fikri, düşüncəsi, böyük, cəsur ürəyi ilə hər şeyi ölçüb-biçirdi. Ata-anasına son məktubunda "Ölərəmsə, zəhmətinizi halal edin” yazmışdı. Bu onun şəhidlik məqamına yüksələcəyindən xəbər verirdi. Şəhidlik isə Vətən, torpaq, haqq işi uğrunda ölümə getmək deməkdir.

22 yaşlı Mübariz İbrahimov 2010-cu il iyun ayının 18-dən 19-na keçən gecə Tərtər rayonunun Çaylı kəndi istiqamətində atəşkəs rejimini pozan erməni işğalçılarının geri oturdulmasında böyük şücaət göstərərək qəhrəmancasına həlak oldu. Onun bu igidliyi ildırım sürətilə Azərbaycanın hər yerinə yayıldı və bu, təsadüfi deyildi. Mübariz Azərbaycanın hərb tarixində özünəməxsus nümunə göstərmişdi, xalqımızın yenilməz ruhunu təcəssüm etdirmişdi. Dəfn mərasimində, hüzn məclisində iştirak edən komandirləri, əsgər yoldaşları onun igidliyindən, adı kimi mübariz bir döyüşçü olduğundan söhbət açırdılar.

M.İbrahimovun doğulub boya-başa çatdığı Əliabad kəndinə və onun buradakı ata evinə ölkəmizin ən ucqar yerlərindən belə axın-axın insanlar gəlirdilər. Həmkarım Bahadur İmanquliyevlə birlikdə həmin vaxt bu hüzn mərasimində iştirak edib, onun haqqında geniş yazı hazırladıq.

Həmin vaxtdan Biləsuvar gəncləri arasında bir coşqu yaşanmağa başladı. Önəmli yerdə, hətta maşınların şüşələrində Mübarizin pəhləvan cüssəli şəkilləri asıldı. Prezident, Ali Baş Komandan İlham Əliyevin 22 iyul 2010-cu il tarixli sərəncamı ilə Mübariz İbrahimova Azərbaycanın Milli Qəhrəmanı adı verildi.

İgid ölər, adı qalar. İndi ölkəmizin hansı bölgəsinə getsən, ən hörmətli yerdə onun pəhləvan cüssəli şəklini görərsən. Bu gün Biləsuvar şəhərində onun adını daşıyan məktəb, küçə var. Hər il rayon ictimaiyyəti qəhrəmanın doğum və anım gününü məzarı üstünə gedərək qeyd edir. Haqqında neçə-neçə bədii əsərlər - şeirlər, hekayələr, sənədli povest yazılıb, mahnılarda adı çəkilib, rəssamların ilham mənbəyinə çevrilib, şəxsiyyəti "Mübarizlik zirvəsi” sənədli filmində işıqlandırılıb. İndi "Mübariz İbrahimov” tankeri dünya sularında üzür.

Mübariz İbrahimov gəncliyimiz üçün əsl vətənpərvərlik, vətənsevərlik nümunəsi qoyub getdi, göstərdi ki, torpaq, yurd öz oğulları ilə şöhrətli və qiymətli olur.

Amma Mübariz bu yolda tək deyil. Biləsuvarın Hikmət Mirzəyev kimi igid general-leytenantı da var. H.Mirzəyev Azərbaycan Ordusunun tək-tək ali rütbəli zabitlərindəndir ki, Vətən müharibəsinin gedişində Ali Baş Komandan əlaqə saxlayıb döyüşdə göstərdikləri şücaətə görə ona və rəhbərlik etdiyi şəxsi heyətə minnətdarlıq etmişdir.

Biləsuvarlı gənclər bu gün onların yollarını özlərinə nümunə seçiblər, onlara oxşamağa çalışırlar və oxşayırlar da. Biləsuvarlı gənclərin əksər hissəsi əsgəri xidməti başa vurduqdan sonra gizir, çavuş kimi orduda qalaraq hərb işini özlərinə peşə seçirlər. Bəziləri C.Naxçıvanski adına hərbi liseyə, bir çoxu isə oradan və ya tam orta təhsili bitirdikdən sonra Heydər Əliyev adına Ali Hərbi Məktəbə daxil olurlar. Odur ki, bu gün Biləsuvarda az-az ailə tapılar ki, üzvlərindən orduda xidmət edəni olmasın.

Hərbi xidmət yolunu seçən hər kəs yaxşı bilir ki, hər gün, hər saat döyüşlə, ölümlə üzləşə bilər. Özü də erməni kimi mənfur, hiyləgər bir düşmənlə qarşı-qarşıya durduğun zamanda. Ancaq qəlbi Vətənin azadlığı üçün döyünən biləsuvarlı əsgərləri heç nə qorxutmur. Rayonun Nərimankənd kənd sakinləri gizir Pərvin Əliyev, kiçik gizir Rahil Hüseynov, əsgər Anar Qarazadə, 2016-cı il Aprel döyüşləri zamanı qəhrəmancasına həlak olmuş Hüseyn Dəmirli, Rahim Məmmədov, Fərahim Novruzov və başqaları belə igid oğullarımızdandır.

Məlum olduğu kimi, bu il iyul ayının 12-də mənfur düşmən növbəti təxribat törədərək Tovuz istiqamətindəki mövqelərimizi ələ keçirməyə cəhd etdi. Döyüşlərdə Azərbaycan Ordusunun bir neçə zabiti və əsgəri qəhrəmancasına həlak oldu. Onların sırasında biləsuvarlı baş leytenant Rəşad Mahmudov da vardı. O, rayonun Aşağı Cürəli kəndindəki tam orta məktəbin 8-ci sinfini bitirdikdən sonra əvvəlcə C. Naxçıvanski adına liseydə, sonra isə Heydər Əliyev adına Ali Hərbi Məktəbdə təhsil almışdır. Şəhid zabit bu gün Aşağı Cürəli kənd qəbiristanlığında uyuyur.

Sentyabr ayının 27-də başlayan və 44 gün davam edən müharibədə müzəffər ordumuz indiyədək özünü yenilməz hesab edən Ermənistan ordusunu darmadağın etdi. Murov dağı, Suqovuşan, Cəbrayıl, Füzuli, Zəngilan, Qubadlı, yüzlərlə kəndlərimiz, neçə-neçə qəsəbələrimiz, Qarabağın ürəyi Şuşa bir-birinin ardınca azad edildi. Ölkəmizdə qismən səfərbərlik elan edilən zaman 800 biləsuvarlı gənc cəbhəyə gedib, döyüşlərdə böyük rəşadətlər göstərdilər. Müharibə itkisiz, qurbansız olmur. Ağır döyüşlərdə Biləsuvardan olan əsgər və zabitlərdən müharibənin sonuna qədər döyüşənlərlə bərabər, şəhidlik zirvəsinə yüksələnlər də oldu. Rayon icra hakimiyyətinin, inzibati orqanların rəhbərləri, idarə, müəssisələrin kollektivləri, ictimaiyyət nümayəndələri hər bir şəhidi böyük hörmət və ehtiramla torpağa tapşırdılar. Yaralı hərbçilər isə diqqət mərkəzindədir. Həkimlər hər gün onlara baş çəkir, müalicələri, tezliklə sağalmaları üçün əllərindən gələni edirlər.

Müharibə gedən müddətdə biləsuvarlılar arxa cəbhədə də fədakarlıqla çalışmışlar. Yetişdirilən pambıq və digər kənd təsərrüfatı məhsulları vaxtında və itkisiz yığılmışdır. Tədarük olunan pambığın həcmi 27 min tondan çoxdur. Yığım isə davam edir. Fermerlər, torpaq mülkiyyətçiləri qüvvələrini səfərbər edərək payızlıq taxıl əkinini də optimal müddətdə başa çatdırmağa çalışırlar. Heyvandarlıq sahəsində fəaliyyət göstərənlər isə mal-qaranın qışdan sağlam və gümrah çıxması üçün nəzərdə tutulan işləri başa çatdırmağa tələsirlər.

Seyran CAVADOV,

Azərbaycan. - 2020.- 1 dekabr.- S.7.