“Human Rights Watch” Ermənistanın müharibə cinayətlərini ifşa etdi

Sentyabrın 27-də başlayan və 44 gün davam edən İkinci Qarabağ müharibəsində Azərbaycan Ordusu qalib gələrək, torpaqlarımızı erməni işğalçılarından təmizlədi. Bu müharibə həm də Ermənistanın terrorçu dövlət olduğunu nümayiş etdirdi. Çünki mülki əhalini hədəfə alanlar və qadağan edilmiş silahlardan istifadə edənlər yalnız terrorçulardır.

Ermənistanın mülki əhalini hədəfə alması düşmənin Gəncəyə və Bərdəyə ballistik raketlər atması ilə pik həddə çatdı. Tərtərdə dəfn mərasimində iştirak edən gözüyaşlı insanlara artilleriya atəşi açmaq dünyanın gözü qarşısında törədilən daha bir müharibə cinayəti idi. 44 günlük müharibə müddətində ermənilərin yaşayış məntəqələrini atəşə tutması nəticəsində 98 mülki şəxs həlak oldu, 414 nəfər yaralandı. Bundan başqa, 5000-dən çox ev və 100 yaşayış binası dağıdıldı və ya yararsız hala salındı. Bütün bunlar erməni vandalizminin sübutu oldu.

Ermənistanın Azərbaycanın dinc sakinlərinə və mülki obyektlərinə qarşı istifadəsi qadağan olunmuş raketlərdən zərbələr endirdiyini "Human Rights Watch” təşkilatının növbəti hesabatı da təsdiqləyir. Hesabatda Ermənistanın və ya Dağlıq Qarabağdakı qondarma rejimin hərbi qüvvələrinin altıhəftəlik müharibə dövründə Azərbaycanın yaşayış məntəqələrini dəfələrlə qadağan olunmuş silah-sursatlar vasitəsilə atəşə tutduğu bildirilir.

Vurğulanır ki, qadağan olunmuş silahların istifadəsi müharibə qanunlarının pozulmasıdır.

Hesabatda qeyd edilir ki, "Human Rights Watch”un tədqiqatçıları 2020-ci ilin noyabr ayında Azərbaycana səfərləri zamanı bu ölkənin üç rayonunda kasetli silah-sursatdan istifadə olunduğu dörd hücumu sənədləşdiriblər. Erməni silahlılarının hücumları nəticəsində 2-si uşaq olmaqla, ən azı 7 mülki şəxs həlak olub, eyni zamanda 2-si uşaq olmaqla, 20 mülki şəxs yaralanıb.

Məlumat üçün qeyd edək ki, kasetli silahlar top, raket və minaatanlar vasitəsilə yerdən və ya təyyarə ilə havadan atıla bilər. Tipik olaraq bu sursatlar havada partlayır və ondan ayrılan bir çox bomba hissəcikləri geniş əraziyə yayılır. Hücum zamanı bölgədəki hər kəs - istər döyüşçülər, istərsə də mülki insanlar ölüm və ya yaralanma riski altında qalırlar. Bundan əlavə, kasetli sursatlar tez-tez ilkin təsir nəticəsində partlaya bilmir və onlar minalar kimi təhlükə mənbəyi olaraq qalır.

Hesabatda bu ilin oktyabr ayında Bərdə şəhərinə atılan və 21 mülki şəxsin ölümünə, 70 nəfərin yaralanmasına səbəb olan kasetli silah hücumu da sənədləşdirilib. Noyabr ayının birinci yarısında Azərbaycana araşdırma səfəri zamanı "Human Rights Watch” Ermənistan silahlı qüvvələri tərəfindən biri Bərdə, ikisi Goranboy, biri Tərtər rayonunda olmaqla dörd kasetli silahlı hücumu sənədləşdirib. Kasetli silahlar mülki və hərbi obyektləri ayıra bilmədiyi üçün onların istifadəsi müharibə qanunlarını pozur.

Bildirilir ki, Beynəlxalq Strateji Araşdırmalar İnstitutu tərəfindən dərc edilən illik "Hərbi Balans-2020” daxil olmaqla, bir sıra beynəlxalq nəşrlər Ermənistanın "Toçka-U” və "İsgəndər” ballistik raketlərinə, "Smerç” və WM-80 çoxlüləli raket atıcılarına sahib olduğunu və bunların hamısının kasetli bombalar ata biləcəyini deyirlər. "Human Rights Watch” Dağlıq Qarabağdakı qüvvələrin kasetli silahlara sahib olmadığının fərqindədir. Belə olan halda Ermənistan silahlı qüvvələrinin bu hücumları həyata keçirdiyi və ya Dağlıq Qarabağdakı hərbi qüvvələri bu döyüş sursatları ilə təmin etdiyi ehtimal olunur. Qadağan edilmiş silahlar kimi, kasetli döyüş sursatları da heç bir halda, heç kim tərəfindən istifadə və ya təmin edilməməlidir.

Beləliklə, Ermənistan artıq öz cinayətlərini gizlədə bilmir və bu cinayətlər beynəlxalq miqyasda daha geniş şəkildə ifşa olunur.

Elçin CƏFƏROV

Azərbaycan.-2020.- 17 dekabr.- S.1-2.