Ümummilli Liderin ideyaları layiqincə davam etdirilir

Müasir Azərbaycanın qurucusu Ulu Öndər Heydər Əliyevin xalqımızın rifahı naminə gördüyü işlər və atdığı addımların bəhrəsi bu gün də həyatımızda öz yerini tutur. Ulu Öndər tarixdə olan nadir şəxsiyyətlərdən, liderlərdən biri idi ki, vahid, suveren dövlət konsepsiyasını hazırlamış və həyata keçirmişdir.

Heydər Əliyev 1993-cü ildə ölkəmizin siyasi rəhbərliyinə geri döndüyü dövrdən etibaran "qurmaq” və "yaratmaq” prinsiplərinə öz fəaliyyətində sadiq qaldı. Ölkəmiz üçün tarixin çətin sınaq mərhələlərindən olan bir dönəmdə məhz Ümummilli Liderin siyasi səriştəsinin nəticəsində xalqımız sınaqlardan üzüağ çıxmış, bugünkü suveren və inkişaf etmiş Azərbaycanın təməlləri qurulmuşdur. Azərbaycan gənc bir dövlət kimi, elm, təhsil, iqtisadiyyat, gənclər siyasəti, ordu quruculuğu, xarici siyasət, beynəlxalq əməkdaşlıq, neft və qeyri-neft sektoru kimi sahələrdə inkişaf etməyə başladı və bu çiçəklənmə dövründə hər bir azərbaycanlı fəxrlə məşhur cümləni təkrarlayırdı: "Mən fəxr edirəm ki, Azərbaycanlıyam!”

Xüsusilə də Dağlıq Qarabağ münaqişəsinin davam etdiyi dövrdə BMT-nin Təhlükəsizlik Şurası tərəfindən qətnamələrin qəbul olunması, Azərbaycanın ərazi bütövlüyünün tanınması məhz ölkəmizin çətin dövründə görülən ən böyük işlərdən biri kimi qiymətləndirilə bilər. Ulu Öndərin siyasi fəaliyyətinin nəticəsində ərazi bütövlüyümüzə və torpaqlarımıza qarşı olan iddialar zamanı haqq səsimiz dünyaya çatdırılmışdır.

Həmçinin eyni dövrə təsadüf edən "Əsrin müqaviləsi”nin imzalanması müstəqil Azərbaycanda iqtisadi inkişafın və dirçəlişin əsas təməli oldu. Siyasi səriştə və illərin təcrübəsi ilə əsl lider kimi ölkəni idarə edən Ulu Öndəri bu amalda bütün azərbaycanlılar dəstəklədi. Çünki hər kəs çox yaxşı bilirdi ki, ana vətənin rəhbərliyi artıq doğru əllərdədir və ölkəmizi parlaq bir gələcək gözləyir.

Heydər Əliyev öz siyasi kursuna, dəyərli fikrinə sadiq qalaraq, fəaliyyətdə olduğu müddət boyunca qurmuş və yaşatmışdır. Özünün də dediyi kimi: "İnsan qurmalıdır, yaratmalıdır!” Ümummilli Lider Heydər Əliyev hər zaman Azərbaycan xalqının qəlbində yaşayacaq. Ulu Öndər öz şəxsi keyfiyyətləri və siyasi rəhbərliyi ilə bütün xalqımızın qəlbində böyük yer qazanmış, heç vaxt sınmayan bir inam və etibar ilə xalqımızla bağlılıq qurmuşdur.

Bu gün Ulu Öndərin müəyyənləşdirdiyi siyasi kurs, miras qoyduğu irs Prezident İlham Əliyev tərəfindən uğurla davam etdirilir. Azərbaycan xalqı buna görə xoşbəxtdir və gələcəyə inamla baxır. Çünki bilir ki, Azərbaycanın dayanıqlı inkişafı və tərəqqisi doğru şəxsin əlindədir. Hər birimiz üçün önəmli məsələ olan Qarabağın işğaldan azad edilməsi də məhz layiqli davamçı, peşəkar siyasi lider İlham Əliyevin fəaliyyətinin nəticəsidir. Sözsüz burada bir məqamı qeyd etmək lazımdır ki, Ulu Öndərin 2003-cü il Prezident seçkilərindən öncə İlham Əliyev barədə səsləndirdiyi "Mən Ona özüm qədər inanıram və gələcəyinə böyük ümidlər bəsləyirəm” cümləsi bu gün özünü doğruldur.

Ulu Öndərin ideyaları azərbaycançılıq məfkurəsi bu gün bütün Azərbaycanda hiss edilir, görülür. Ölkəmizin Birinci vitse-prezidenti Mehriban Əliyevanın rəhbəri olduğu Heydər Əliyev Fondu da bu gün respublikamızda və xaricdə bir çox böyük layihələr həyata keçirərək Ulu Öndərin xatirəsini əbədiləşdirir.

Ulu Öndərin hakimiyyətə gəlişi ilə Azərbaycanın xilası, quruculuq işlərinin aparılması, İlham Əliyevin rəhbərliyi ilə ölkəmizin yüksəlişi, Mehriban Əliyevanın təşəbbüsləri ilə mühüm layihələrin icra edilməsi bir daha Ulu Öndərin "İnsan qurmalıdır, yaratmalıdır” kəlamının dəyərini və aktual olduğunu göstərir. Bu kəlam son 27 il ərzində hər keçən gün ölkəmizdə inkişaf yolunda, xalqın rifahı üçün atılan hər addımda daha aydın görünür.

Şahin SEYİDZADƏ,

Milli Məclisin deputatı

Azərbaycan.-2020.- 12 dekabr.- S.7.