Şəhidlər

Dağılar duman da, dağılar çən də,

Həm Allah sevinər, həm də ki, bəndə.

Dava qurtaranda, üzlər güləndə

Şəhidlər qayıdar yenə bu yurda.

Torpaq rahatlanıb nəfəs alanda,

Durular əhval da, durular qan da.

Arzu cücərdikcə ürəkdə, canda

Şəhidlər qayıdar yenə bu yurda.

Bir oğul evlənsə, bir gəlin köçsə,

Aşıq sinəsində sazıyla ötsə,

İgidlər, ərənlər girəndə bəhsə

Şəhidlər qayıdar yenə bu yurda.

Bir dəli gülüşün uğultusunda,

Körpə bir uşağın qığıltısında,

Elin toy günündə, elin yasında

Şəhidlər qayıdar yenə bu yurda.

Yananda hər evdə toy-bayram şamı

Sevinər el-oba, sevinər hamı...

Həftədə bir dəfə - cümə axşamı

Şəhidlər qayıdar yenə bu yurda.

Yayılsın bu sədam şəhərə, kəndə,

Dedim sözlərimi ürək dinəndə.

Bütün Azərbaycan bütövləşəndə

Şəhidlər qayıdar yenə bu yurda.

Seyran CAVADOV

Azərbaycan.-2020.- 27 dekabr.- S.16.