Salyanın igid oğlu

Salyan dəmiryol stansiyası ərazisində 1987-ci ildə dünyaya göz açıb, buradakı orta məktəbdə təhsil alıb. Oxuduğu məktəb Birinci Qarabağ müharibəsində şəhid olan Yavər Qafarovun adını daşıyır. Hər gün məktəbə gələndə şəhid Y.Qafarovun keçdiyi qısa, lakin mənalı ömür yolunu əks etdirən guşəyə baş çəkərək ona oxşamağı, Vətənə onun kimi layiqli oğul olmağı qarşısına məqsəd qoymuşdu. Düşünüb ki, cənnətməkan Qarabağ torpağı heç vaxt yağı tapdağı altında qala bilməz. Xalqımız nəyin bahasına olursa-olsun bir gün Qarabağı düşməndən geri alacaq.

Gələcəkdə bu prosesdə bilavasitə iştirak etmək, erməni qəsbkarları ilə aparılacaq müharibənin ön sıralarında olmaq qərarı bir an da olsun ürəyini, fikir-düşüncəsini tərk etmirdi. Elə bu niyyətlə də orta təhsilini başa vuran kimi sənədlərini Heydər Əliyev adına Ali Hərbi Məktəbə verir. İmtahanda uğur qazanır. Hərb kişi işidir. Ona görə də təhsil aldığı illərdə qarşısına çıxan çətinliklərin heç biri onu qorxutmur. Əksinə, cüssələnir, mətinləşir. Hərbin sirlərinə dərindən bələd olmaq üçün keçilən dərsləri əsaslı şəkildə mənimsəyir, verilən tapşırıqları vaxtında və dəqiqliklə yerinə yetirir.

İllər bir-birini əvəz edir. Hüseynağa Balıyev ali hərbi təhsilini başa vurub leytenant kimi müxtəlif hərbi hissələrdə xidmət etməyə başlayır. Bir müddət sonra isə Qarabağ ərazisindəki hərbi hissələrdən birinə keçirilir. Düşmənlə üzbəüz səngərdə dayanıb nə vaxtsa döyüşə başlamaq əmrini səbirsizliklə gözləyir. Müharibə başlayacağı halda tabor komandiri olaraq necə vuruşacağı, düşməni necə məhv edəcəyi barədə fikirləşir, xəyallar qurur.

Nəhayət, belə bir gün gəlib çatır. Prezident, Ali Baş Komandan İlham Əliyevin əmri ilə sentyabrın 27-də səhər saatlarında Silahlı Qüvvələrimiz işğal olunmuş torpaqlarımızı azad etmək üçün əks-hücuma keçir. Şiddətli döyüşlər başlayır.

Düşmənin uzun illərdən bəri dəmir-betondan tikdiyi istehkamları yarıb keçmək o qədər də asan deyildi. Lakin Azərbaycan Ordusu ən müasir silahlara malik olduğundan həmin istehkamları darmadağın etdi.

Müharibə qurbansız olmur. Mənfur düşmənlə döyüş zamanı əsgər və zabitlərimizdən şəhidlik zirvəsinə ucalanlar da oldu, yaralananlar da. Mayor Hüseynağa Balıyev Xocavənd istiqamətində komandir kimi nümunə göstərirdi. Amma o, döyüşlərin birində düşmən gülləsinə tuş gəlir və qəhrəmancasına şəhid olur.

Şəhid H.Balıyevin atası Salman kişi deyir ki, övlad itkisi, oğul itirmək çox ağırdır: "Ancaq təsəllimiz odur ki, Vətən uğrunda qurban gedib. Vətəndən əziz heç nə ola bilməz. Bir də ona görə qürurluyuq ki, ordumuz 30 illik həsrətə son qoydu, düşmən üzərində qələbə çaldı. Sağ olsun Ali Baş Komandan İlham Əliyev. Bu qələbə ilə o, Azərbaycanın yeni tarixini yazdı. Özü də qızıl hərflərlə. Hər bir şəhid ailəsini, yaralı əsgəri diqqət mərkəzində saxlayır. Dünyanın azını-çoxunu görmüş bir adam kimi Azərbaycanın gələcəyini daha xoşbəxt görürəm”.

Şəhid mayorun iki övladı var. Qızı Rəna 8, oğlu Harun 3 yaşındadır. Hüseynağa hərbi xidmətdə olanda onlar anaları ilə birlikdə baba-nənələrinin yanında qalıblar. Salman kişi:

- Mənim və nənəsinin nə qədər canında can var, onların xidmətində duracaq, korluq çəkməyə qoymayacaq, təhsillərinə diqqət yetirəcəyik.

Ortaya çökən ani sükutdan sonra soruşuram:

- Neçə övladınız var, Salman kişi?

- İki oğlum, iki qızım var. Kiçik oğlum İsa 2016-cı ilin Aprel döyüşlərində iştirak edib. Hazırda Bakıda işləyir. Qızımın birini köçürmüşəm, ailəlidir, o biri isə Şirvan şəhərindəki Humanitar Kollecdə təhsil alır.

Qələbəmiz böyükdür. Artıq təqvimimizdə hansısa rayonun işğal günü olmayacaq. Bundan sonra hər il sentyabr ayının 27-si şəhidlərimizin Anım Günü, noyabrın 8-i isə Zəfər Günü kimi qeyd ediləcək. Şanlı qələbəmiz dərsliklərdə öz yerini tutacaq, bu haqda əsərlər yazılacaq, şəhidlərimiz minnətdarlıq hissi ilə yad ediləcək. O şəhidlər ki, Azərbaycanın ərazi bütövlüyü uğrunda canlarından keçiblər, qanları ilə tarix yazıblar.

Ölməz heç vaxt şəhidlər,

Mərd igiddir şəhidlər.

Vətən, yadında saxla,

Şəhidlər şahiddilər.

Seyran CAVADOV,

Azərbaycan.-2020.- 9 dekabr.- S.8.