Bakıda Türkdilli Dövlətlərin Əməkdaşlıq Şurasına üzv ölkələrin Xarici İşlər nazirlərinin növbədənkənar iclası keçirilib

Fevralın 6-da Bakıda Türkdilli Dövlətlərin Əməkdaşlıq Şurasına üzv ölkələrin Xarici İşlər nazirlərinin növbədənkənar iclası keçirilib.

İclası açan Azərbaycanın Xarici İşlər naziri Elmar Məmmədyarov gündəliyin zəngin olduğunu bildirib.

Tədbirdə bir sıra mühüm mövzular, o cümlədən təşkilata üzv olmayan ölkələrlə əməkdaşlıq məsələləri müzakirə olunub.

İclasdan sonra keçirilən mətbuat konfransında Türkdilli Dövlətlərin Əməkdaşlıq Şurasının baş katibi Bağdad Amreyev və Xarici İşlər nazirinin müavini Ramiz Həsənov müzakirə edilən məsələlərlə bağlı məlumat veriblər.

Qeyd edilib ki, Ermənistan-Azərbaycan, Dağlıq Qarabağ münaqişəsinin də müzakirə olunduğu iclasda üzv ölkələr arasında əlaqələrin genişləndirilməsi, bir sıra ölkələrin Türk Şurası ilə əməkdaşlıq etmək istəmələri ilə bağlı məsələlər ətrafında fikir mübadiləsi aparılıb.

Bağdad Amreyev vurğulayıb ki, Türk Şurası daxilində investisiya institutunun yaradılmasına ehtiyac var. O bildirib ki, investisiya fondunun yaradılması ilə bağlı işlər gedir və İstanbulda keçiriləcək sammitdə onun təqdimatı nəzərdə tutulur.

Baş katib, həmçinin qeyd edib ki, növbədənkənar iclasda şurada müşahidəçi statusuna malik ölkələrə üzvlüyün verilməsi qaydaları müzakirə olunub. Habelə təşkilatın İƏT və BMT yanında müşahidəçi statusu alması, beynəlxalq təşkilatlarla əlaqələrin yaradılması imkanları nəzərdən keçirilib.

Diqqətə çatdırılıb ki, Xarici İşlər nazirləri üzv ölkələr arasında iqtisadi əməkdaşlığın daha da genişləndirilməsinin, təşkilat daxilində birliyin gücləndirilməsinin vacibliyini vurğulayıblar. Təşkilatın perspektivlərini müəyyən edən “Türk Şurası 2025” adlı yeni strategiya da müzakirə edilən məsələlər arasında yer alıb.

Azərbaycan.- 2020.- 7 fevral.- S.6.