2020-ci il fevralın 9-da keçirilmiş Azərbaycan Respublikasının Milli Məclisinə seçkilərdə Mərkəzi Seçki Komissiyasına daxil olmuş 12 fevral 2020-ci il tarixli 137 saylı və 13 fevral 2020-ci il tarixli 164 saylı müraciətlərə baxılması barədə

Azərbaycan Respublikası Mərkəzi Seçki Komissiyasının Qərarı

Qərar 24/203

2020-ci il fevralın 9-da keçirilmiş Azərbaycan Respublikasının Milli Məclisinə (Milli Məclis) seçkilərdə 77 saylı Astara seçki dairəsi üzrə qeydə alınmış namizədlər Həsənov Rəşad Əlövsət oğlu 2020-ci il fevralın 12-də və Bağırov Rövşən Tofiq oğlu 2020-ci il fevralın 13-də Azərbaycan Respublikasının Mərkəzi Seçki Komissiyasına (Mərkəzi Seçki Komissiyası) yazılı müraciət edərək seçkiqabağı təşviqat mərhələsində baş vermiş qanun pozuntularının araşdırılmasına dair dairə seçki komissiyasının 30 yanvar 2020-ci il tarixli 14/51 saylı qərarını mübahisələndirmiş, müvafiq qərar qəbul edilməsi yolu ilə pozulmuş hüquqlarının bərpa olunmasını xahiş etmişdir.

Seçkiqabağı təşviqatın aparılması zamanı ehtimal olunan qanun pozuntularına dair daxil olmuş həmin müraciətlər eyni məzmunlu olduğundan və eyni seçki dairəsini əhatə etdiyindən bir icraatda birləşdirilmişdir.

Müraciət Azərbaycan Respublikası Seçki Məcəlləsinin 112-ci, 112-1-ci maddələrinə və "Azərbaycan Respublikasının Mərkəzi Seçki Komissiyasına və dairə seçki komissiyalarına seçki hüquqlarının pozulması ilə əlaqədar şikayət və müraciətlərin verilməsi və onlara baxılması qaydaları haqqında Təlimat”a uyğun olaraq Mərkəzi Seçki Komissiyasının nəzdində ekspert qrupunun üzvü tərəfindən araşdırılaraq rəy verilmiş və komissiyanın iclasında baxılmışdır.

Namizədlər R.Ə.Həsənov və R.T.Bağırov müraciətlərində bildirmişlər ki, 2020-ci il fevralın 9-na təyin edilmiş Milli Məclisə seçkilərdə 77 saylı Astara seçki dairəsindən qeydə alınmış namizəd Rəşad Mahmudov 21 yanvar 2020-ci il saat 17:37-də "Facebook” sosial şəbəkəsində Astara Rayon İcra Hakimiyyətinin işçiləri Mərasim Hacıyev, Asiman Qasımlı, Kijəbə qəsəbə tam orta məktəbinin direktoru Təbrizə Rəsulova, Astara Rayon Mərkəzi Xəstəxanasının baş həkimi Əlövsət Əliyev, Astara Rayon Təhsil Şöbəsinin müdiri Rəşad Həsənov və digərləri ilə görüş keçirmək barədə post paylaşmışdır.

Yuxarıda qeyd olunanlarla əlaqədar namizədlər Həsənov Rəşad Əlövsət oğlu və digərləri 77 saylı Astara seçki dairəsi dairə seçki komissiyasına müraciət etmiş, komissiya tərəfindən şikayət hərtərəfli araşdırılmış, 30 yanvar 2020-ci il tarixli 14/51 saylı qərar ilə əsassız hesab edilərək təmin olunmamışdır.

Araşdırma prosesində ərizəçilərlə əlaqə saxlanılmış, araşdırma və iclasda iştirak etmək, həmçinin digər hüquqlarının olması izah edilmiş, lakin onlar komissiyanın iclasında iştirak etməkdən imtina etmişlər.

Dairə seçki komissiyasında aparılmış araşdırma ilə müəyyən edilmişdir ki, Astara Rayon İcra Hakimiyyətinin işçiləri M.Hacıyev, A.Qasımlı, R.Həsənov Yeni Azərbaycan Partiyasının (YAP) yerli təşkilatının iclasında Şura və İdarə Heyətinin üzvləri olaraq namizəd R.Mahmudovun vəkilləri qismində iştirak etmiş və həmin müddətdə onlar rayon icra hakimiyyətinin müvafiq əmrləri ilə ödənişsiz məzuniyyətdə olmuş, Astara Rayon Mərkəzi Xəstəxanasının baş həkimi Ə.Əliyev isə izahat verərək R.Mahmudovun seçkiqabağı təşviqat kampaniyası zamanı hər hansı bir görüşdə iştirak etmədiyini, Kijəbə qəsəbəsi tam orta məktəbinin direktoru T.Rəsulova isə izahatında namizəd R.Mahmudovun YAP Astara rayon təşkilatının üzvləri ilə görüşündə İdarə heyətinin üzvü kimi iştirak etdiyini bildirmişlər. N.İbadov və G.Rzayev isə izahatlarında dövlət orqanlarında hər hansı bir vəzifə tutmadıqlarını, pensiyada olduqlarını və namizədlə görüşlərdə seçici kimi iştirak etdiklərini göstərmişlər.

Araşdırma ilə namizəd R.Mahmudovun qardaşı A.Mahmudovun seçkiqabağı təşviqatın aparılması zamanı seçki prosesinə hər hansı bir formada müdaxiləsi təsdiq olunmamışdır.

Beləliklə, araşdırma nəticəsində müəyyən edilmişdir ki, namizəd R.Mahmudovun seçkiqabağı təşviqatın aparılması qaydalarının pozulmasına yol verməsinə dair namizədlər R.Həsənovun və R.T.Bağırovun iddiaları öz təsdiqini tapmadığından şikayətlərin təmin olunması və 77 saylı Astara seçki dairəsi dairə seçki komissiyasının 30 yanvar 2020-ci il tarixli 14/51 saylı qərarının ləğv edilməsi üçün əsaslar yaranmamışdır.

Yuxarıda göstərilənləri əsas götürərək Mərkəzi Seçki Komissiyası Seçki Məcəlləsinin 19.4-cü, 28.2-ci, 112-ci, 112-1-ci maddələrinə və "Azərbaycan Respublikasının Mərkəzi Seçki Komissiyasına və dairə seçki komissiyalarına seçki hüquqlarının pozulması ilə əlaqədar şikayət və müraciətlərin verilməsi və onlara baxılması qaydaları haqqında Təlimat”ın 1-ci, 2-ci, 4-cü, 6-cı və 7-ci hissələrinə əsasən qərara alır:

1. 2020-ci il fevralın 9-na təyin edilmiş Milli Məclisə seçkilərdə 77 saylı Astara seçki dairəsi üzrə qeydə alınmış namizədlər Həsənov Rəşad Əlövsət oğlunun 12 fevral 2020-ci il tarixli 137 saylı və Bağırov Rövşən Tofiq oğlunun 13 fevral 2020-ci il tarixli 164 saylı müraciətləri əsassız olduğundan təmin edilməsin, dairə seçki komissiyasının 30 yanvar 2020-ci il tarixli 14/51 saylı qərarı dəyişdirilmədən saxlanılsın.

2. Bu Qərar dərc edildiyi gündən qüvvəyə minir.

Sədr Məzahir Pənahov

Katib Arifə Muxtarova

Katib Mikayıl Rəhimov

15.02.2020

Azərbaycan.- 2020.- 16 fevral.- S.9.