“Qarabağ”, 30 yaşın mübarək!

30 il öncə - 1990-cı ilin may ayında Dağlıq Qarabağ və ətraf rayonlarda baş verən hadisələrin daha dəqiq və obyektiv işıqlandırılması üçün "Qarabağ” adlı qəzet təsis edildi.

Dağlıq Qarabağ Muxtar Vilayəti üzrə Respublika Təşkilat Komitəsinin orqanı kimi 1990-cı il iyul ayının 1-də işıq üzü görən "Qarabağ” ilk gündən Qarabağın tarixi, mədəniyyəti, adət-ənənəsi və görkəmli şəxsiyyətləri haqqında oxuculara ətraflı məlumat verməyə başlayıb.

Həmin vaxt bölgədə erməni separatizmi baş qaldıraraq azərbaycanlılara qarşı torpaq iddiası ilə bölgədə müharibə şəraiti yaratmışdı.

Qəzetin əməkdaşları münaqişənin alovlandığı bütün nöqtələrdən real vəziyyət haqqında respublika oxucularına və dünya ictimaiyyətinə Azərbaycan və rus dillərində dəqiq və operativ məlumatlar çatdırırdı.

40 min tirajla çap olunan "Qarabağ” qəzeti 27 fevral 1992-ci il tarixli sayında - Xocalıda baş verən hadisələri "Xocalıda soyqrımı törədildi” başlıqlı xəbərlə tam dolğunluğu ilə Azərbaycana yayan ilk qəzetlərdən olub.

Çox böyük sıxıntılarla da olsa fəaliyyət göstərən "Qarabağ” qəzetinin davamlı çap olunmasını arzulayaraq "Qarabağ”lıları 30 illik yubileyləri münasibətilə təbrik edir, qəzetin ilk redaksiyasının yerləşdiyi məkanına - Ağdam şəhərinə DÖNÜŞÜNÜ diləyirik.

Azərbaycan.-2020.- 2 iyul.- S.7.