Geniş vüsət alan hərəkat

DOST mərkəzlərində "Könüllü DOST” proqramına böyük maraq yaranmışdır. Ötən dövrdə bu proqram üzrə 250-dək könüllü DOST mərkəzlərinə cəlb edilib. Əksəriyyəti tələbə olan könüllülər gündəlik olaraq 3 saat fəaliyyət göstərirlər. İki ayın yekununda onlar məzun olurlar və daha sonra mərkəzə yeni könüllülərin seçimi başlayır.

"Könüllü DOST” proqramı fərqli ictimai və yaş təbəqələrini əhatə edən bir neçə altproqramdan ibarətdir: "Gənc DOST”, "Gümüşü DOST”, "Virtual DOST”, "Korporativ DOST”. Könüllü fəaliyyətini uğurla başa vuran gənclərin hər birinə xüsusi sertifikat verilir. Onlar bu sertifikatı almaq üçün fərqli 5 alətlə qiymətləndirilir. Həmin alətlərdən biri olan test mərhələsi onlayn formatda keçirilir.

Bu il Rusiyanın "Şimal-Cənub” Politologiya Mərkəzinin təşkilatçılığı ilə Bakıda "Xəzər Könüllülük Məktəbi”nin birinci iclası və "Xoşməramlı meridianlar” müsabiqəsinin final mərhələsi keçirildi. Azərbaycan, Rusiya və Qazaxıstanı təmsil edən müxtəlif könüllü fəaliyyət təşkilatçılarının iştirak etdiyi iclasda sosial əhəmiyyətli layihələrin təqdimatı oldu. Həmin müsabiqədə Xəzəryanı ölkələr üzrə finala çıxmış 25 layihə beynəlxalq münsiflər heyəti tərəfindən qiymətləndirildi. Azərbaycanı təmsil edən DOST Agentliyinin "DOSTtalks” layihəsi "İlin layihəsi” seçilərək 1-ci yerə layiq görüldü. Qazaxıstanı təmsil edən "Sputnik” layihəsi 2-ci, Rusiyanı təmsil edən "Tom Soyer Fest” isə 3-cü yeri tutdu.

Azərbaycan.-2020.- 5 iyul.- S.3.