İki düşmən, iki ön cəbhə

Daha məsuliyyətli davranaraq, xəstəliklə mübarizəyə və ordumuzun öz işlərini lazımi şəkildə yerinə yetirməsinə töhfə verməyin məqamıdır

Dünyada COVID-19 pandemiyasının yaratdığı gərginlik davam edir. Gözlənilənin əksinə olaraq yeni növ koronavirus getdikcə yoluxma sayını artırır. Virusun zəiflədiyini düşünərək sərt karantin rejimlərini yumşaldan, turistlər üçün sərhədlərini açmaq istəyən ölkələr indi bu qərarlarından vaz keçmək məcburiyyətində qalıblar.

Mütəxəssislər, Ümumdünya Səhiyyə Təşkilatının üzvləri isə hazırkı vəziyyətin ürəkaçan olmadığını bildirirlər. Hətta bəzi ölkələrdə infeksiyanın üçüncü dalğasının başlaması barədə məlumatlar mövcuddur. Sözün əsl mənasında müasir dünya "taclı” bəlanın əsirinə çevrilib və onun qarşısını almaqda acizlik çəkir. Tətbiq edilən karantin rejimləri isə hələlik sadəcə virusun yoluxma sayını azaltmaq, onu nəzarətdə saxlamağa imkan verir. Bu müsbət nəticə isə vətəndaşların pandemiyanın şərtlərinə əməl edilməsi sayəsində əldə oluna bilir.

Belə olmasa COVID-19 yoluxdurma və ölüm sayını amansızlıqla artıracaq, ona qarşı görülən bütün tədbirləri təsirsizləşdirəcək.

İnfeksiyaya qarşı vaksin sınaqları isə davam edir və bəşəriyyət səbirsizliklə tibb elmindən şad xəbər gözləyir...

Vətəndaşlarımızın təhlükəsizliyi və sağlamlığı prioritetdir

Azərbaycanda da bütün sahələr üzrə qlobal pandemiya ilə mübarizə davam etdirilir. Yeni növ koronavirusun Uhandan dünyaya yayıldığı ilk zamanlardan etibarən ölkəmizdə ona qarşı qabaqlayıcı tədbirlərə start verilib və bunun sayəsində vətəndaşlarımızın təhlükəsizliyi və sağlamlığı etibarlı şəkildə qorunur.

Dövlətimiz tərəfindən atılan təsirli addımlar nəticəsində COVID-19-la bağlı vəziyyət daim nəzarətdədir.

Prezident İlham Əliyevin və birinci xanım Mehriban Əliyevanın hər bir vətəndaşın sağlamlığına diqqəti, ön cəbhədə olan həkimlərin səhhətinə isə xüsusi həssaslıqla yanaşmaları COVID-19-a qarşı mübarizəni daha asan edir. Heydər Əliyev Fondunun dəstəyi ilə spesifik olaraq PSR testlərinin aparıldığı laboratoriyaların qurulması, onların sayının artırılması isə daha çox vətəndaşı analizlərin verilməsinə cəlb etməyə kömək edir. Çünki yoluxmanın qarşısını almaq üçün əsas vasitələrdən biri də infeksiyanın erkən aşkarlanmasıdır.

Eyni zamanda infeksiyaya yoluxan xəstələrin müalicəsinin yüksək səviyyədə aparılması, dərman və digər tibbi ləvazimatların təchizi ilkin mərhələdə virusdan sağalan xəstələrin yoluxanların sayını xeyli üstələməsinə rəvac verdi. Son zamanlarda da yoluxanlarla sağalanlar arasında eyniləşmə baş verir. Mütəxəssislər isə stabilləşməyə vətəndaşların qaydalara əməl etməsinə görə nail olunduğunu bildirirlər.

Məsafə gözlənmədi, maska taxılmadı, virusun varlığı yaddan çıxdı...

Amma təəssüflə qeyd edək ki, bütün dünyanın pandemiya ilə mübarizə apardığı bir şəraitdə Ermənistan yenə də öz riyakar və namərd əməllərindən əl çəkmək istəmir. Düşmən dövlətimizə qarşı təxribat törədərək qarışıqlıq yaratmaq, vəziyyətimizi çətinləşdirmək niyyətini güdür.

Digər tərəfdən, COVID-19 pandemiyasının hələ məhdudlaşdırılmadığı, yoluxma hallarının yüksək olduğu bir vaxtda aksiyaların keçirilməsi, minlərlə insanın bu aksiyalara qoşulması virusun daha geniş yayılması və insanların həyatını təhlükə qarşısına qoyması üçün əlverişli şərait yaratdı. İyulun 14-də keçirilən aksiyada distansiyanın gözlənməməsi, maskalardan istifadə olunmaması, insanlar arasında sıx təmaslar adi hala çevrildi. Aksiya iştirakçıları virusun varlığını tamamilə unutdular.

Həmçinin vətəndaşların kütləvi şəkildə həlak olmuş hərbçilərimizin yaşadığı ünvanlara toplaşması və onların yaxınlarını ziyarət etməsi, dəfn mərasimlərində müşahidə olunan kütləvilik virusun yayım sürətini daha da artırır. Bir müddət sonra biz bu kütləviliyin acı nəticələrini görəcək və yaşayacağıq. Böyük ehtimal ki, yoluxma dinamikasında artım müşahidə olunacaq.

İnsanların kütləvi şəkildə dəfn mərasimlərində iştirakı və həmin yerlərdə hərbçilərlə sıx təmasları ordu üçün də ciddi təhlükə yaradır. Bu halda koronavirus ordumuza da ayaq aça bilər.

Bütün bunlara yol verməmək üçün insanlarımız kütləvi aksiyalardan, ziyarətlərdən, dəfn mərasimlərində iştirakdan çəkinməlidirlər.

Vətəndaşlarımız daha məsuliyyətli davranmaqla, karantin rejiminə riayət etməklə, sabitliyi və təhlükəsizliyi qorumaqla həm xəstəliklə mübarizəyə, həm də Milli Ordumuzun, hərbçilərimizin öz işlərini lazımi şəkildə yerinə yetirmələrinə mühüm töhfələrini verə bilərlər.

Bəli, reallıq budur ki, Azərbaycan indi iki təhlükəli düşmənlə, iki ön cəbhədə vuruşur. Hər ikisi hiyləgər, hər ikisi insan qənimidir. Onlar kiçicik bir ehtiyatsızlıq, sərvaxtlıq gözləyirlər ki, amansızlıqla hücuma keçsinlər.

Bu çətin günlərdə, ətrafımızın düşmənlərlə sarıldığı bir zamanda dövlətimizin qoyduğu qaydalara riayət edərək, daha ehtiyatlı davranaraq, məsuliyyətli olaraq təhlükəni dəf etməliyik. Bilməliyik ki, hər iki düşmənə qarşı qalibiyyət hər birimizin davranışından, vətəndaş həmrəyliyindən, birliyindən asılıdır.

Əminik ki, təhlükəyə qarşı səfərbər olaraq vətənimizin üzərinə kölgə salan hər iki qəddar düşmənin təhlükəli nəfəsini tezliklə boğacağıq...

Yasəmən MUSAYEVA

Azərbaycan.-2020.- 17 iyul.- S.1;6.