Yeni etibarlı siyasi dialoq mühiti formalaşıb

Fazil MUSTAFA: "İqtidar bu istiqamətdə öz iradəsini ortaya qoyursa, hər bir müxalifət partiyası səmimi şəkildə prosesə öz töhfəsini verməlidir”

Bu gün Azərbaycanda yeni siyasi mühit, siyasi həmrəylik mövcuddur. Hazırda ölkədə Prezident İlham Əliyevin rəhbərliyi ilə vətəndaş cəmiyyətinin daha da gücləndirilməsi, siyasi plüralizm istiqamətində inkişaf, partiyalarla, siyasi institutlarla dialoqun daha da möhkəmləndirilməsi prosesi gedir. Bütün bunlar yeni bir siyasi münasibətlərin formalaşdığını təsdiqləyir.

Həmsöhbət olduğumuz Böyük Quruluş Partiyasının sədri, Milli Məclisin deputatı Fazil Mustafa da son dövrlərdə ölkədə həm siyasi dialoqun aparılması, həm korrupsiyaya, həm də pandemiyaya qarşı mübarizə istiqamətində dövlətin gördüyü işləri yüksək qiymətləndirir.

Çevik kadr islahatları, siyasi konfiqurasiyanın fərqli təzahürü

Son vaxtların əsas siyasi müzakirə mövzularından biri Azərbaycanda siyasi sistemdə yeni konfiqurasiyanın formalaşmasıdır. Prezident İlham Əliyevin apardığı siyasi islahatların tərkib hissəsi olan bu proses artıq ilkin nəticələrini verir. Bu yeni düzənin əsas özəlliklərinin nədən ibarət olduğuna və prosesdən gözləntilərini bölüşən Böyük Quruluş Partiyasının sədri hesab edir ki, Azərbaycanda 2018-ci ilin prezident seçkilərindən sonra dəyişən ciddi bir siyasi vitrin və siyasi mahiyyət var: "Cənab İlham Əliyev prezident seçiləndən dərhal sonra çox ciddi kadr islahatlarına start verib və yeni, gənc kadrlara ən yüksək idarəçilik piramidasında yüksək etmad göstərməklə gələcəyin islahatçı komandasını formalaşdırmaqda israrlı olduğunu göstərdi.

Yüksək ranqlı məmurların bir-birinin ardınca yeni təfəkkürlü kadrlarla əvəzlənməsi siyasi konfiqurasiyanın fərqli təzahürünü ortaya qoydu. Bu cür çevik kadr islahatları ilə bərabər vətəndaşın sııxıntılarını azaldacaq sosialyönümlü qətiyyətli tədbirlərin görülməsi də islahatların mahiyyətinin dolğunluğunu ifadə edirdi. Hər hansı bir islahatın uğuru onu gerçəkləşdirən komandanın mənəvi və peşəkarlıq keyfiyyətindən asılı olur. Əsas gözləntimiz budur ki, bu iki vacib keyfiyyəti özündə birləşdirən islahatların uğuru üçün daha çox səfərbər olmaq mümkündür və bu tarixi şansı əldən buraxmaq olmaz. Hər an müharibə riski altında olan dövlətdə vaxtın doğru seçimi və qiymətləndirilməsi çox önəmlidir. Biz dövlət həyatının şəffaflaşması, vətəndaşların rifahının yüksəldilməsi üçün islahat prosesini daha sürətlə aparmalıyıq”.

Fazil Mustafanın sözlərinə görə, bu prosesdə, ümumiyyətlə, cəmiyyətin müasirləşən siyasi həyatında Böyük Quruluş Partiyası da təşəbbüslərlə, yeni proqram və təkliflərlə çıxış edib. Belə ki, 2005-ci ildən bu günədək Milli Məclisdə siyasi müxalifət partiyası platformasında yer alan BQP təmsil olunduğu bir nümayəndəsi ilə islahatları dəstəkləyən birmənalı mövqe ifadə edir. Konstruktiv tənqid və təklifləri ilə həm hökumətin islahatları dərinləşdirən ciddi qərarlar verməsinə yardım edir, həm də Milli Məclisdə əhəmiyyətli qanunların qəbul olunmasına töhfə verir: "Hökumətin hesabatları, büdcə layihəsinin müzakirələri, eləcə də cari məsələlər müzakirə olunarkən Böyük Quruluş Partiyası tərəfindən Konstitusiya islahatlarının aparılması, inhisarçılığa və məmur özbaşınalığına qarşı mübarizənin effektli təşkili, korrupsiyaya qarşı mübarizənin yeni metodlarının tətbiqi, ölkədə partiya demokratiyasının inkişafı, təhsil siyasətində köklü dəyişikliklərin edilməsi və başqa məsələlərlə bağlı çoxsaylı təkliflər təqdim olunmuşdur”.

BQP iqtidarın gördüyü faydalı işləri dəstəkləyir

BQP-nin iqtidara, onun fəaliyyətinə, siyasətinə, apardığı islahatlara münasibətini dəyərləndirən Fazil Mustafanın fikrincə, rəhbərlik etdiyi siyasi təşkilat müxalifət partiyası olaraq öz siyasi iradəsini iqtidara qarşı konstruktiv müxalifətçilik mövqeyindən həyata keçirir. İqtidarın gördüyü faydalı işləri dəstəkləyir, Dağlıq Qarabağ məsələsinin Azərbaycanın ərazi bütövlüyü çərçivəsində həlli və ordu quruculuğu prosesində təkliflərini vaxtaşırı hökumətə təqdim edir:

- Partiyamız islahatlar prosesində yalnız aktiv rol almır, həm də iqtidarı islahatlara təşviq edəcək təklif və təşəbbüslərini ortaya qoyur, nöqsanları isə səmimi və açıq şəkildə diqqətə çatdırır. Böyük Quruluş Partiyasının qaldırdığı təşəbbüslərin hökumət tərəfindən müsbət qarşılanması faktları da kifayət qədərdir. Bunların sırasında aztəminatlı vətəndaşlar üçün məişət qazına tətbiq edilən limitin artırılması, şəhid ailələrinə birdəfəlik müavinətin verilməsi, uşaqların doğumu üçün birdəfəlik müavinətin artırılması, sahibkarlara güzəştli kredit dəstəyinin gücləndirilməsi kimi tərəfimizdən qaldırılan məsələlər hökumət tərəfindən araşdırılaraq vətəndaşların maraqlarına uyğun şəkildə həll edilmişdir. Partiyamız beynəlxalq təşkilatlarda Azərbaycan nümayəndə heyətinin tərkibində dövlətimizin ali maraqlarının ifadə olunmasında, ölkəmizə qarşı ermənipərəst qüvvələrinin təxribatlarının qarşısının alınmasında da mühüm işlər görür.

Çoxpartiyalı sistemin inkişafına ciddi təkan verilib

Son vaxtlar siyasi sistemin komponentləri arasında yeni müzakirələrin - dialoqun başlamasını da yüksək qiymətləndirən BQP sədri hesab edir ki, Prezident Administrasiyasında parlamentlə və siyasi partiyalarla əlaqələr üzrə ötən ilin sonlarında yeni şöbənin yaranması əslində ölkədə siyasi ab-havanı müsbət yöndə xeyli dəyişib.

Fazil Mustafanın fikrincə, bununla ölkə Prezidenti daha aktiv parlament fəaliyyəti və daha çox inkişaf edən partiya demokratiyası modelinin formalaşması istiqamətində gözləntilərini ortaya qoyub: "Bu məqsədə nail olmaq üçün siyasi qüvvələr arasında məhz açıq dialoq mühitinin yaranması zəruri şərt idi. Prezidentin təmsilçisi - Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyevin qısa müddətdə və ağır pandemiya şəraitində demək olar ki, bütün siyasi partiyalarla təmasa keçməsi və konstruktiv müzakirələr aparması öz nəticəsini verdi. Əvvəlcə ölkə tarixində ilk dəfə olaraq parlament azlığını təmsil edən partiyaların nümayəndələri Milli Məclisin Sədr müavini, komitə sədri və komitə sədrinin müavini vəzifələrinə seçildilər və bu çoxpartiyalı sistemin inkişafına ciddi təkan verdi. Ardınca isə parlamentdənkənar müxalifət partiyalarının bir çoxunun problemlərinin həlli, yeddi siyasi partiyanın son 3 ayda dövlət qeydiyyatından keçməsi yeni etibarlı siyasi dialoq mühitinin formalaşmasını təmin etdi”.

Fazil Mustafa hazırda dialoqa hazır olduğunu bəyan edən istənilən siyasi partiya ilə hakimiyyətin müzakirələr aparmasına əngəl olacaq zehniyyətin tamamilə ortadan qalxdığını da söylədi.

Marginal qrupların hansısa prosesə təsir gücü əhəmiyyətsiz səviyyədədir

Yeniləşən siyasi sistemdə əsas məsələlərdən biri də müxalifətin bu prosesdə iştirakı, rolu, funksiyası və fəaliyyətinin hansı formada həyata keçirilməsidir. Siyasi ekspertlər də hesab edirlər ki, artıq müxalifət partiyalarının fəaliyyətində də təkmilləşməyə ehtiyac var.

BQP sədri da hesab edir ki, yeniləşən siyasi sistemdə müxalifət öncə iqtidarla münasibətlərini konstruktiv siyasi rəqabət əsasında qurmalı və öz tənqidi görüşlərini siyasi-etik çərçivədə müxtəlif platformalardan istifadə edərək təqdim etməlidir. Daxili siyasətdə qəbul etmədiyi məsələləri iqtidarla açıq müzakirə etməkdən yayınmamalı, seçki prosesində aktiv iştirak edərək ölkə həyatında problemlərin həllinə çalışmalı, demokratik islahatların irəliləməsinə, korrupsiyaya qarşı mübarizəyə dəstək verməlidir. Xarici siyasətdə isə müxalifət dövlət maraqlarına uyğun olaraq müəyyən funksiyaları bir çox hallarda öz üzərinə götürməli, iqtidar üçün məqbul sayılmayacaq platformalarda ölkə mənafeyini müdafiə etməlidir.

Özünü sağlam siyasi proseslərdən təcrid edən, marginallaşan radikal müxalif partiyalara gəlincə, Fazil Mustafa deyir ki, günümüzün bəlkə də ən anlaşılmaz məsələsi radikal görüşlərə sahib müxalifət təmsilçilərinin dialoqdan imtina etməsidir. Halbuki bu gün aparılan islahatlara, yeni siyasi münasibətlərin qurulmasına onlar hamıdan çox maraqlı olmalıdırlar: "Hakimiyyətə gəlmək üçün xalqın dəstəyindən məhrum olan marginal qruplar öz ideoloji düşüncələrində uzun illərdir dəyişiklik etmədən, tavtalogiya siyasətini davam etdirməklə siyasi spektrdən daha da uzaqlaşmış olurlar. Əslində pandemiyanın yaratdığı sosial-iqtisadi çətinliklərdən, müəyyən narazılıqlardan istifadə edərək sosial şəbəkələr vasitəsilə böhtan, təhqir, söyüş kampaniyasını körükləyən siyasi qruplar anlamaq iqtidarında deyillər ki, bu cür fəaliyyətlə hakimiyyətə qarşı deyil, Azərbaycan dövlətinin zəifləməsinə, onun düşmənlərinin dəyirmanına su tökməyə xidmət edirlər”.

BQP sədri düşünür ki, Azərbaycan cəmiyyətinin sağlam düşüncəli insanları onların bu niyyətlərini anladıqları və ən çətin dövrdə öz dövlətinin maraqlarını müdafiə etməkdə qətiyyət göstərdiklərinə görə, həmin marginal qrupların təbliğatının təsir gücü əhəmiyyətsiz səviyyədədir.

Yeni tərkibli Milli Məclis siyasi müzakirələrin əsas məkanına çevrilib

Yeni tərkibli Milli Məclisdə çoxpartiyalılıq artıq parlamentin, o cümlədən komitələrin idarəçiliyində özünü aydın büruzə verməkdədir. Müxalifət partiyalarının parlamentdə iştirakı, onlarla qanunverici orqanda yaradılan şərait barədə fikirlərini bölüşən Fazil Mustafa öncə vurğuladı ki, yeni tərkibli parlament həm də yeni düşüncənin özünü ifadə etməsi baxımından diqqəti çəkir:

- Artıq burada parlament azlığının, xüsusilə də siyasi müxalifətin təmsilçilərinə idarəçilikdə etimad göstərilərək mühüm mövqelərə gətirilməsi ciddi bir yenilik olmaqla yanaşı, həm də parlamentdənkənar müxalifət partiyaları üçün təşviqedici mahiyyət daşıyır. Ölkədə çoxpartiyalılığın formal xarakter daşımadığı, siyasi müzakirələrin əsas məkanının Milli Məclis olduğu göz önündədir. Xüsusilə də Sahibə xanım Qafarovanın Milli Məclisin Sədri seçilməsi ilə yaranan demokratik ab-hava deputatların fəallığı, aktual problemlər ətrafında müzakirələr üçün ciddi stimul yaradıb. Cari məsələlərin müzakirəsinə daha çox vaxt ayrılması, komitələrdə ictimai dinləmələrin sayının və keyfiyyətinin artması, sədrin bilavasitə ayrı-ayrı parlament qrupları ilə internet resursları üzərindən intensiv müzakirələr aparması olduqca müsbət tendensiyadır və bu həm də parlamentin cəmiyyətdə nüfuzunun yüksəlməsinə təsir edəcək yeniliklərdir.

Dialoq ölkədə siyasi münasibətlərin keyfiyyətinə öz təsirini hökmən göstərəcək

İyulun 7-də Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyev və Milli Məclisin Sədri Sahibə Qafarovanın iştirakı ilə parlamentdə təmsil olunan siyasi partiyaların sədrləri və nümayəndələri arasında videokonfrans formatında növbəti müzakirələr aparıldı. Bu sayca ikinci görüş idi. İlk dəfə tərəflər arasında mart ayında görüş keçirilmişdi.

İyulun 14-də isə Fazil Mustafa Prezident Administrasiyasına dəvət edilib. Şöbə müdiri Ədalət Vəliyevlə BQP sədri arasında siyasi partiyalarla dialoq formatında təkbətək görüş olub. Öncə əvvəlki iki görüşlə bağlı təəssüratlarını bölüşən BQP sədri bildirdi ki, hər iki görüşdə faydalı müzakirələr aparılıb. Sadəcə olaraq pandemiya şəraitində təhlükəsizlik baxımından ikinci görüşün videokonfrans formatında keçirilməsinə üstünlük verilib.

Onun sözlərinə görə, son konfransda Milli Məclisin Sədri Sahibə Qafarova və Prezident Administrasiyasının şöbə müdiri Ədalət Vəliyev tərəfindən gerçəkləşdirilən giriş çıxışının ardından bütün siyasi partiya rəhbərləri pandemiya dövründə yaranan problemlərə, iqtidar-müxalifət münasibətlərinin indiki vəziyyətinə, görüşlərin gələcək formatına öz münasibətlərini ortaya qoyublar. Təklif olunub ki, görüşün yekunu olaraq siyasi partiyalar tərəfindən birgə bəyanat qəbul edilsin və bu təşəbbüs hamı tərəfindən bəyənilib.

Öz çıxışına gəlincə, Fazil Mustafa dedi: "Çıxışımda Milli Məclisdə müzakirə mühitinin demokratikləşməsinin siyasi partiyaların fəaliyyətində canlanma yaratdığını vurğuladım. Bu kimi müsbət məqamlarla yanaşı, neqativ təzahürlərə də diqqət yetirdim. Bu, ilk növbədə, partiyaların bir siyasi orqanizm kimi proseslərdə aktiv rol ala bilməməsi, daha çox onların rəhbərlərinin fərdi fəaliyyətinin qabarıq olması ilə bağlı idi. Parlamentdə "Siyasi müxalifət haqqında” qanunun qəbul olunmamasının da partiyaların inkişafına mənfi təsir göstərdiyini vurğuladım. Digər tərəfdən, siyasi partiyaların sosial şəbəkələrdə rolunun xeyli əhəmiyyətsiz olduğu, buradakı qaragüruhçu zehniyyətə qarşı nə hakim partiyanın, nə də digər siyasi partiyaların təsir gücünün ortaya qoyulmaması faktına da diqqət yönəltdim. Dialoqdan kənarda qalmanı düşünən siyasi qüvvələrin davranışlarının da öncə onların özlərinə mənfi imic gətirəcəyini vurğulayaraq, bu çətin günlərdə dövlətə qarşı barışmazlıq sindromunun davam etməsinin zərərli nəticələrini göstərməyə çalışdım. Bu formatda görüşlərin davam etməsinin, ölkə həyatının aktual mövzularının siyasi partiyalarla birgə platformada müzakirəsinin faydalı olacağını diqqətə çatdırdım. Çıxışımın ana tezisi bundan ibarət idi ki, ölkədə siyasi münasibətlərin mədəni səviyyəsinin yüksəlməsi partiya demokratiyasının inkişafından çox asılıdır.

Müzakirə zamanı, eyni zamanda, daha çox pandemiya dövründə siyasi partiyaların fəaliyyəti üzərində dayandım. Bütün siyasi partiyaların bu ağır günlərdə öz təşəbbüs və təklifləri ilə vətəndaşların sağlamlığının qorunması, hökumətin gördüyü tədbirlərin dəstəklənməsi, prosesin qanunvericilik bazasının çevik tənzimlənməsi istiqamətində çalışmalarının qaneedici olduğunu da burada qeyd etmək yerində olardı”.

Prezident Administrasiyasında keçirilən təkbətək görüşə gəlincə, Fazil Mustafa dedi ki, maraqlı keçən dialoq zamanı öncə şöbə müdiri Ədalət Vəliyev Böyük Quruluş Partiyasının iyulun 15-də keçirilən VI Qurultayı münasibətilə bütün partiya üzvlərinə təbriklərini çatdırıb. Həmçinin Ədalət Vəliyev ölkə Prezidentinin siyasi partiyaların inkişafı, siyasi münasibətlərin daha sağlam zəmində formalaşması istiqamətində tapşırıqlarına uyğun olaraq hər bir partiya ilə münasibətlərin açıq, şəffaf və demokratik prinsiplərə uyğun qurulmasının vacibliyinə diqqət yetirib. Eyni zamanda BQP-nin ölkənin ictimai-siyasi həyatında və Milli Məclis müstəvisində fəaliyyətinin konstruktiv müxalifətçiliyə əsaslandığını, sağlam tənqid və təkliflərinin Azərbaycan hakimiyyəti tərəfindən diqqətə alındığını xüsusi olaraq qeyd edib: "Mən də qarşılıqlı olaraq ölkədə başlanan dialoq prosesində ən fəal rol alacağımızı bildirərək, son vaxtlar sağlamlaşan iqtidar-müxalifət münasibətlərinin dövlətçiliyimiz üçün vacib olduğunu vurğuladım. Son vaxtlar yeni siyasi partiyaların qeydə alınmasının ölkədə siyasi plüralizmin inkişafına töhfə verəcəyini qeyd edərək, bu cür hüquqi maneələrin ortadan qaldırılmasının qarşılıqlı etimadın güclənməsinə təkan verəcəyini ifadə etdim. Görüşdə Ermənistanın torpaqlarımızı işğalı və Dağlıq Qarabağ məsələsində BQP-nin mövqeyi ilə bağlı da müzakirələr apardıq. Bizim BQP olaraq dövlətçiliyimizin maraqlarının təmin olunması üçün bir müxalifət partiyası kimi üzərimizə düşən vəzifəni hər zaman həssaslıqla yerinə yetirəcəyimizi qeyd etdim”.

Fazil Mustafanın sözlərinə görə, ümumilikdə bu kimi görüş və müzakirələrin ölkə Prezidenti tərəfindən dəstəklənməsi və orada səslənən təkliflərin xeyli hissəsinin qəbul edilərək real qərarlarda öz əksini tapması çox yaxşı haldır və bu, ölkədə siyasi münasibətlərin keyfiyyətinə öz təsirini hökmən göstərəcəkdir.

Pandemiya ilə mübarizə - Prezident bir lider olaraq prosesi inamla idarə edir

Hazırda dövlətləri çətin vəziyyətdə qoyan qlobal pandemiya Azərbaycandan da yan keçməyib. İnsan sağlamlığını ön planda tutan ölkəmiz böhrandan az itkilərlə çıxmaq üçün bütün mümkün vasitələrdən istifadə etməkdədir.

BQP sədrinin bu məsələyə münasibəti birmənalıdır: "Pandemiyaya qarşı mübarizədə Azərbaycan bəlkə də ən çətin durumda qalan ölkələrdən biri olub. Çünki bu xəstəliyin ilkin nəticələri Azərbaycanın cənub qonşusu olan ölkədə üzə çıxıb və virusun ölkəmizə yayılmaması üçün sərhədlərin bağlanması, iqtisadi əlaqələrin kəsilməsi kimi ciddi nəticələr doğuracaq qərarlar qəbul etmək lazım gəlirdi. Üstəlik xaricdə qalan çox sayda vətəndaşımızın problemi də narahatedici amillərdən biri idi. Digər tərəfdən, səhiyyə sistemimizdə icbari tibbi sığortaya keçid dövrü başlamışdı. Neft bazarında qiymətlərin aşağı düşdüyünü də buraya əlavə etsək, Azərbaycanın hansı çətin şəraitdə pandemiyaya qarşı mübarizə apardığını görərik. Məhz ölkə Prezidentinin bir lider olaraq prosesi inamla idarə etməsi, yeni modul xəstəxanaların tikilməsi ilə bağlı çevik qərar qəbul etməsi, vacib tibbi avadanlıqların ölkəyə gətirilməsi, qoruyucu vasitələrin istehsalına qısa bir zamanda başlanması təhlükənin böyüməsinin qarşısını aldı”.

Fazil Mustafaya görə, məhz bu səbəbdən də Azərbaycan dövlətinin pandemiyaya qarşı mübarizəsi insan həyatı və başqa amillərlə bağlı zərərin minimuma endirilməsinə səbəb olub.

Korrupsiyaya qarşı mübarizə cəmiyyətdə xeyli müsbət impulslar yaradıb

Son dövrlərdə ölkədə korrupsiyaya qarşı effektiv mübarizə tədbirləri həyata keçirilir. Ölkə ictimaiyyəti tərəfindən yüksək qiymətləndirilən bu tədbirlərə münasibətini bildirən Fazil Mustafa dedi: "Prezident birmənalı şəkildə dövlət büdcəsini dağıdan, vətəndaşları incidən məmurlara qarşı güzəşt olmayacağını bəyan etdikdən sonra ayrı-ayrı icra başçılarının rüşvət üstündə yaxalanması, ayrı-ayrı nazirliklərdə büdcə talançılığına qarşı atılan addımlar cəmiyyətdə xeyli müsbət impulslar yaratdı. Təyin olunan icra başçılarını qəbul edərkən dövlət başçısının verdiyi təlimatlarla xalqın tanış olması, tələblərin içində vətəndaşların maraqlarını təmin etmənin vacibliyinin vurğulanması insanlarımızda məmurların özbaşınalığına qarşı daha aktiv mövqe sərgiləməyə stimul yaratmış oldu. Dövlət Təhlükəsizlik Xidmətinin bir-birinin ardınca yerli və mərkəzi icra hakimiyyəti orqanlarında keçirdiyi əməliyyatlar da cəmiyyətimiz tərəfindən dəstəkləndi”.

Fazil Mustafanın fikrincə, korrupsiyaya qarşı mübarizə qətiyyətlə davam etməlidir. Çünki bu, yalnız vətəndaşı dövlətdən narazı salacaq təzahür deyil, həm də ölkəmizin beynəlxaq imici üçün də xoşagəlməz haldır.

Prezidentin islahatlarının alternativsiz yol olduğunu qəbul etməliyik

Prezident İlham Əliyevin müəllifi olduğu sosial-iqtisadi islahatlar konsepsiyası son dövrlərdə yeni keyfiyyət mərhələsinə qədəm qoyub. Söhbət əsnasında BQP sədrindən bu islahatlarlara münasibətini öyrəndik. O dedi:

- Artıq insanlar birmənalı olaraq inqilablar, təlatümlər olmadan, cəmiyyətdə xaosa yol vermədən yalnız islahatlar yolu ilə dövlət həyatının korrupsiyadan təmizlənən, hüququn aliliyinə dayanan bir modelinin olduğuna inanırlar. Bu inamın davam etməsi üçün islahatlar daha da dərinləşməli, hər bir vətəndaş bu istiqamətdə əlindən gələn dəstəyi əsirgəməməlidir. Ona görə də bizim islahatlara münasibətimiz gələcəyimizə ümidimiz deməkdir. Ümidimizin yaşaması və dövlətimizin rifahı üçün islahatların alternativsiz yol olduğunu qəbul edərək, bu istiqamətdə bütün təklif və təşəbbüslərimizi açıq təqdim edirik. İslahatlara münasibətdə müxalifətçilik zehniyyəti ilə davranmaq olmaz. Bu, bizim səsləndirdiyimiz tələblərdirsə və Azərbaycan iqtidarı bu istiqamətdə öz iradəsini ortaya qoyursa, hər bir müxalifət partiyası səmimi şəkildə prosesə öz töhfəsini verməlidir.

Söhbəti yazdı,

Rəşad BAXŞƏLİYEV

Azərbaycan.-2020.- 24 iyul.- S.1;8.