Azərbaycan nümunə göstərməkdə davam edir

Bunu BMT-nin son hesabatı da təsdiqləyir

Koronavirus pandemiyası təkcə insanların sağlamlığına deyil, həm də dünya iqtisadiyyatına mənfi təsir göstərir. Bu üzdən dünyada iş yerlərinin kütləvi şəkildə bağlanması səbəbindən milyonlarla insan işsiz qalıb.

Sözsüz ki, pandemiya Azərbaycan iqtisadiyyatına da öz mənfi təsirini müəyyən qədər göstərir. Lakin dövlət iqtisadiyyatın və insanların qorunması üçün operativ şəkildə lazım olan bütün tədbirləri görür.

Təsadüfi deyil ki, dünyanın ən nüfuzlu beynəlxalq təşkilatı olan Birləşmiş Millətlər Təşkilatı ölkəmizdə həyata keçirilən sosial-iqtisadi islahatları yüksək qiymətləndirir. Belə qiymətləndirmədən sonuncusu "Davamlı inkişaf hesabatı - 2020” sənədində 166 ölkə arasında "Davamlı inkişaf məqsədləri indeksi” üzrə Azərbaycanın 54-cü pilləyə layiq görülməsidir. Qeyd edək ki, BMT bu indeksi müəyyənləşdirərkən hər bir ölkə üzrə dərin elmi araşdırmalar aparır.

Ölkəmiz həyata keçirilən dərin islahatlar sayəsində iqtisadi və sosial sahələrdə bir sıra uğurlara imza atıb. BMT-nin sənədində qeyd edilir ki, Azərbaycan səhiyyə, rifah, yoxsulluq, qidalanma, təmiz su, təmiz enerji, davamlı şəhərlər və icmalar, sülh, ədalət və güclü institutlar kimi sahələrdə yüksək irəliləyişə nail olub. Onu da bildirək ki, ölkəmiz "Davamlı inkişaf məqsədləri indeksi”nin mümkün 100 balından 72,6 bal toplayaraq Şərqi Avropa və Mərkəzi Asiya regionunda orta göstəriciləri 70,9 bala çatdırıb.

Həqiqətən, Azərbaycanda son iki-üç ildə pensiyaların, təqaüdlərin, sosial müavinətlərin, dövlət və özəl strukturlarında çalışanların əməkhaqlarının artırılması əhalinin sosial müdafəsinin güclənməsini təmin edib. Elə buna görədir ki, hesabatda sosial rifahın yüksəldilməsini təsdiq edən fakt kimi Azərbaycan gündəlik gəliri 3,2 dollardan az olan yoxsulun qeydə alınmadığı ölkələr sırasına daxil olunub.

BMT-nin bu sənədinin bir maraqlı tərəfi də ondan ibarətdir ki, ölkəmiz sözügedən indeks üzrə keçmiş SSRİ məkanında olan ölkələrlə müqayisədə ən üstün mövqedədir. Belə ki, bu indeks üzrə Rusiya 57-ci, Gürcüstan 58-ci, Qazaxıstan 65-ci, Ermənistan 75-ci pillədə qərarlaşıb. Qonşulara gəldikdə, İran 59-cu, Türkiyə 70-ci yerdədir.

Belə yüksək uğurun əldə edilməsi Prezident İlham Əliyev tərəfindən həyata keçirilən məqsədyönlü sosial-iqtisadi siyasət sayəsində mümkün olub.

İslahatların nəticəsində ölkədə qeyri-neft sektoru inkişaf edib ki, bu da iqtisadi tərəqqinin təmin edilməsində mühüm rol oynayıb. Qeyri-neft sektorunda, xüsusilə qeyri-neft sənayesində istehsalın artması idxalın azalmasına da səbəb olub. Digər tərəfdən, bu sektorda istehsal olunan məhsulların xarici bazara ixracı ölkəyə əlavə valyuta gətirib.

Prezident İlham Əliyev indiki çətin şəraitdə ölkə iqtisadiyyatının problemlərə sinə gərdiyini bildirərək demişdir: "Mən bildirmişəm ki, keçən ay əldə edilmiş nəticələrdə kiçicik də olsa, artım var - 0,2 faiz. Ancaq təxmin edirəm ki, 5 ayın yekunları artıq tənəzzülü əks etdirəcək, belə də oldu. Mənə verilən məlumata görə, ümumi daxili məhsul beş ayda 1,7 faiz aşağı düşüb. Ancaq yenə də bir çox inkişaf etmiş ölkələrlə müqayisədə bizdəki tənəzzül çox kiçik həcmlidir. Bununla parallel olaraq bildirməliyəm ki, sənaye istehsalı bir qədər artıb. Amma qeyri-neft sektorunda sənaye 14 faiz artıb. Kənd təsərrüfatında 3,6 faiz artıb. İnsanların orta əməkhaqqı 740 manata yaxınlaşıb. Bu, təqribən 430 dollardan çoxdur. İnfilyasiya 3 faizdən aşağıdır, proqnozlaşdırılmış səviyyədədir”.

Bütün bunlar onu göstərir ki, Prezidentin apardığı sosial-iqtisadi siyasət nəticəsiz qalmamışdır. Məlum olduğu kimi, dünyanın 150-dən çox ölkəsi böhrandan çıxmaq, əhalinin sosial müdafiəsini təmin etmək üçün borc almaqdan ötrü Dünya Bankına müraciət etmişdir. Amma belə bir şəraitdə dünyanın nəhəng maliyyə qurumları Azərbaycana sərmayə qoymaq üçün Prezident İlham Əliyevə müraciət edirlər. Bu isə o deməkdir ki, Azərbaycan etibarlı tərəfdaş olmaqla bərabər, həm də sərmayə üçün münbit şəraiti olan ölkədir.

Rüstəm KAMAL

Azərbaycan.-2020.- 25 iyul.- S.1-4.