Fədakar qanun keşikçiləri

Azərbaycan polisi layiqli işi ilə koronavirusla mübarizədə də ön sıradadır

"Əziz vətəndaşlar!

Xüsusi karantin rejiminin sərtləşdirilməsi ilə əlaqədar ötən həftənin şənbə və bazar günlərində sizlərə yaşayış yerini və olduğu yeri tərk etmək qadağan edilmişdir. Sizin sağlamlığınız naminə atılan bu addımları anlayışla qarşıladığınıza görə, xüsusi karantin rejiminin tələblərinə riayət etdiyinizə görə sizə daxili işlər orqanlarının bütün şəxsi heyəti adından təşəkkürümüzü bildiririk!

Siz səbir və təmkinlə iki gün evdə qalmaqla həm özünüzün, həm də yaxınlarınızın sağlamlığını qorumuş oldunuz. İnanırıq ki, gələcəkdə də belə qərar verilərsə, siz yenə də eyni səbir və təmkin nümayiş etdirəcəksiniz.

Bir daha təşəkkür edirik!”

Bu, Daxili İşlər Nazirliyinin vətəndaşlara təşəkkürüdür. Bəli, iki gün davam edən sərt karantin rejimi - küçəyə çıxmaq qadağası zamanı vətəndaşların böyük əksəriyyəti qoyulan tələbləri yerinə yetirdi, qaydalara uyğun olaraq evdə qaldı. Lakin bu dəfə də intimzamsız davranaraq qaydalara məhəl qoymayan, küçədə-yolda gəzənlər, binanın damında domino oynayan, kabab çəkən məsuliyyətsiz insanlar oldu. Onların bəziləri xəbərdarlıq edilərək evlərinə qaytarıldı, bəziləri sərt karantin rejimi qaydalarını pozduqları üçün qanun çərçivəsində məsuliyyətə cəlb edildi, bəziləri isə polislə "qaçdı-tutdu” oynadı.

Bu hadisələri əks etdirən görüntülərin çoxu sosial şəbəkələrdə yayıldı. Kimlərsə videolara baxıb güldü, kimlərsə polisi təhqir etdi. Çoxluq isə polisdən qaçıb gizlənməyə çalışanları tənbeh etdi ki, niyə evdə qalmırsınız? Hər yer bağlı olduğu halda hara gedirsiniz? Məgər iki gün evdə oturub ailənizlə, övladlarınızla birgə vaxt keçirmək bu qədərmi çətindir? Axı evdə qalmağınız məhz sizin, ailənizin, övladlarınızın sağlamlığı, koronavirusa yoluxmaması üçündür. Polis də Nazirlər Kabineti yanında Operativ Qərargahın qəbul etdiyi qərara uyğun olaraq nəzarəti həyata keçirir. Yəni sizi, bizi bu dəhşətli virusa yoluxmaqdan qoruyur.

İkigünlük küçəyə çıxma qadağası yalnız Azərbaycanda tətbiq olunmur. Bu cür karantin rejimi qardaş Türkiyə daxil olmaqla dünyanın bir çox ölkələrində tətbiq edilib və edilməkdədir. Belə zamanlarda xalqın əziyyətini məhz polis çəkir. Bəs bu iki gündə Azərbaycan polisi nə etdi?

Bayılda su kəsildi, polis su maşını gətirib əhalini su ilə təmin etdi.

Yeni Yasamalda polis hamilə qadını xəstəxanaya çatdırdı. Uşaq elə maşında dünyaya gəldi.

Binədə əlini şüşə kəsən qadın qanaxmadan ölə bilərdi, polis onu vaxtında xəstəxanaya çatdırıb həyatını xilas etdi.

Dializ xəstəsinin köməyinə son anda polislər çatdı.

Bacısını itirən yaşlı qadını polis öz maşını ilə yas yerinə apardı.

Küçədə sahibsiz heyvanları yemləyən polislər oldu.

Ahıl qadın küçəyə çıxaraq marketə gedir, görünür, sərt karantin rejimindən xəbəri yoxdur. Polislər ona yaxınlaşıb vəziyyəti öyrənəndən sonra öz yemək paylarını ona verib yola salırlar.

Daxili İşlər Nazirliyinin 102 xidmətinə zəng edən bir ailə çörək istəyir. Dərhal polislər həmin ailəyə çörək çatdırırlar.

Bir ailə də polisə zəng edərək xəstə övladının yeməyinin bitdiyini deyir. Nərimanov Rayon Polis İdarəsinin əməkdaşlarından biri aptek və marketlər bağlı olduğu üçün evinə gedərək öz uşağının yeməyini gətirib həmin ailəyə verərək daha bir insanlıq nümunəsi göstərir.

Himnimiz səslənən zaman xidməti maşından düşərək farağat duran polislərimizi də görüb fəxr etdik.

Belə faktlar onlarladır və əksəriyyəti də vətəndaşlar tərəfindən çəkilərək yayılıb. Ona görə də polisi hədəfə alanda şəhid, qazi polisləri, ekstremal vəziyyətlərdə vətəndaşa yardım edənləri, milli-mənəvi dəyərlərimizi, dövlət atributlarımızı uca tutan polisləri unutmamalıyıq.

Amma əfsuslar olsun ki, bu günlərdə icazəsiz küçəyə çıxıb qanunu pozduğu bəs deyilmiş kimi, polisə tabe olmayaraq qaçmağa cəhd edənlər də oldu. Polisə müqavimət göstərən şəxsin saxlanılması zamanı həmin binada yaşayan bəzi sakinlərin eyvan və pəncərələrdən zibil atması, polisləri fitə basması isə yanlış və yolverilməz hərəkət idi. Videonun əvvəlində aydın şəkildə görünür ki, polislər vətəndaşla söhbət aparırlar. Lakin vətəndaş qəfildən qaçıb polisə müqavimət göstərir. Polisin birini itələyib yerə yıxır. Ayağını dirəyərək polis maşınına oturmaq istəmir. Binanın bəzi sakinləri isə qanunu pozan, məsuliyyətsizik edən vətəndaşı qınamaq əvəzinə üzərində dövlət atributlarını gəzdirən, vətəni qorumaq üçün şərəfinə and içən, vəzifə başında olan polisin başına zibil tökür. Bu hərəkət, sadəcə, ayıb və tərbiyəsizlik idi. Lakin polis əməkdaşları buna təmkin nümayiş etdirir və karantin rejimini pozan həmin şəxs barəsində inzibati tədbir görür.

Məgər bunu anlamaq çətindir ki, polisin "evdə otur” tələbi bizim sağlamlığımız üçündür?! Küçəyə çıxıb virusa yoluxmamağımız üçündür... Bir müddət sonra sağlam şəkildə küçədə, parkda rahat gəzə bilməyimiz üçündür...

Sərt karantin günlərində koronavirusa yoluxma təhlükəsi olan sağlam vətəndaşlarımızın keşiyində məhz Azərbaycan polisi dayandı. Biz sağlam olaq, koronavirusa yoluxmamaq üçün evdə qalaq deyə, onlar öz canlarını təhlükəyə ataraq küçələrə çıxdılar. Fədakarlıq nümayiş etdirdilər, gecə-gündüz yollarda, postlarda, parklarda qoruyucumuza çevrildilər. Yaşlı, tənha, kimsəsiz insanların köməyinə tələsdilər, sovqat apardılar. Sosial məsafə saxlamağımızı, maska taxmağımızı, karantin qaydalarına əməl etməyimizi, yəni özümüzü qorumağımızı tələb və təmin etdilər. Məhz polislərimiz fədakarlığı, layiqli işi ilə koronavirusla mübarizədə ön sıralarda ayıq, sayıq şəkildə durdular.

Polisin karantin dövründə xidmətləri danılmazdır, bunu görməmək mümkün deyil. Prezident İlham Əliyev də onların xidmətinə yüksək qiymət verib. Dövlət başçısı bildirib ki, polislər, Daxili Qoşunların əməkdaşları gecə-gündüz küçələrdədir, həyatlarını risk altına atırlar, insanları başa salmağa çalışırlar. Onların əməyini yerə vurmamalıyıq.

"Hesab edirəm ki, bizim hələlik tam razı ola bilmədiyimiz yeganə məsələ məsuliyyətdir. Çünki bəzi insanlar özlərini məsuliyyətsiz aparırlar. Bəzi insanlar qəbul edilmiş qaydaları pozmağa çalışırlar. Beləliklə, həm özlərini, həm yaxınlarını, həm də ki, tanımadığı insanları risk altına qoyurlar. Bunu etmək olmaz. Bu qadağalar ona görə qəbul edilib ki, yoluxma halları məhdudlaşdırılsın. Yaşı 65-dən yuxarı olan insanlar küçəyə çıxa bilməzlər. Bunu onlar başa düşməlidirlər. Bizim polis işçiləri onları çox mülayim formada başa salmağa çalışırlar. Siz indi yaxşı bilirsiniz ki, bəzi ölkələrdə polis nümayəndələri necə davranırlar. Televizorda görürük, heç iki-üç sual da vermir, dərhal hərəkətə keçir. Bizim polisimiz insanları qoruyur. İndi onların üzərinə böyük yük, böyük məsuliyyət düşür. Onlar da öz sağlamlıqlarını risk altına atırlar. Gecə-gündüz küçələrdə onu başa sal, bunu başa sal. Biz nə etməliyik?! Qaydaların pozulmasına imkan verə bilmərik. Biri deyir ki, mənə heç nə olmaz, biri deyir ki, mən qorxmuram. Söhbət ondan getmir ki, sənə heç nə olmaz, yoxsa olar. Birincisi, sənə bir şey olarsa, gərək ən azı 10 həkim sənə qulluq etsin, 10 həkim öz həyatını, sağlamlığını, yaxınlarının sağlamlığını risk altına atsın bir məsuliyyətsiz adama görə. Bu, tamamilə qəbuledilməz bir fikirdir ki, "mən qorxmuram, mənə bir şey olmaz”. Hesab edirəm ki, belə adamlar məsuliyyətə cəlb edilməlidir”, - deyə Prezident qeyd edib.

Unutmayaq ki, karantin dövründə ən çox səbrli olan elə polislərdir. Amma onları da anlamaq lazımdır. Onlar da insandır, əsəbləri gərgin, yorğun anları olur. Biz evdə oturduğumuz zaman onlar soyuq, isti bilmədən yollarda xidmət aparırlar, həyatımızın keşiyində dururlar. Elə bilirsiniz polisə xoşdur yayın istisində, istirahət günündə gün başına döyə-döyə ac, susuz xidmət çəkmək? Polis evindən, ailəsindən kənarda qalıb başqalarını qorumaq üçün xidmətdədir. Onlar öz vəzifəsini icra edirlər. Onlar qanun, asayiş, sabitlik keşikçisidirlər. O keşikçilər ki, başına pis bir iş gələn vətəndaş birinci növbədə elə ondan kömək istəyir, ona sığınır. O keşikçilər ki, pandemiya günlərində gecə-gündüzləri küçədə keçdi. Maska taxmayana irad tutdular ki, gedib ailəsini yoluxdurar. Qocalarla mədəni danışdılar, kobudluq göstərmədilər. Metrostansiyalarda qatarlara daxil oldular ki, adamlar maskanı çıxarmasınlar, sosial məsafəni gözləsinlər. Çox vaxt cərimə yazmayıb, mədəni şəkildə xəbərdarlıq etdilər. Biz karantin günlərində evimizdə rahat oturanda onlar xəstəliyə yoluxma riskini gözə almadan fasiləsiz fəaliyyət göstərdilər. Bəzi insanların təhlükədən qorunması, məsuliyyətsiz davranışların qarşısının alınması üçün səfərbər oldular. Bu gün isə o polis təhqir edilir, başına zibil atılır. Elə o zibil atan və qanunu pozan insanların düşüncə tərzi, məsuliyyətsizliyi ucbatından kiminsə bacısı, qardaşı, övladı virusa yoluxur, kiminsə valideyni bu xəstəlikdən həyatını itirir...

Dövlət qərar veribsə, vətəndaş olaraq bizim də borcumuz o qərarı yerinə yetirməkdir. İctimai məsuliyyətini anlayan insan karantin rejimini pozmaz və buna görə məsuliyyətə cəlb olunmaz. Vətəndaşın vəzifəsi qanuna sayğılı əməl etmək, polisin vəzifəsi isə qərara qarşı çıxanları məsuliyyətə cəlb etməkdir. Odur ki, polisi təhqir edənlər bunu nəzərə almalıdırlar. Vətəndaş kimi məsuliyyətimizi dərk etməliyik. Haqsızlığa susmayaq, amma haqsızlıq da etməyək.

Xəyalə MURADLI

Azərbaycan.-2020.- 9 iyun.- S.1;5.