Azərbaycan
koronavirusla mübarizədə nümunə göstərir
İlham
ƏLİYEV: "Bizim əsas vəzifəmiz insanları bu xəstəlikdən
qorumaqdır, onların həyatını xilas etməkdir”
Bir
neçə aydır bütün ölkələrdə ciddi
təhdid mənbəyinə çevrilən koronavirus
pandemiyası hər gün on minlərlə insanın həyatını
təhlükə altına atır. Təsadüfi deyil ki, son
statistikaya görə, dünyada bu virusa yoluxanların sayı
7,3 milyon, ölənlərin sayı isə 413 min nəfəri
ötüb. Ən inkişaf etmiş ölkələr belə
bu təhlükənin qarşısında aciz durumda qalıb.
Bütün
tədbirlərin mərkəzində məhz vətəndaşların
sağlamlığı dayanır
Bu
müddətdə xəstəliklə mübarizə tədbirləri
təsdiq etdi ki, yoluxuculuq forması yüksək olan virusdan
qorunmağın ən yaxşı yollarından biri sosial
izolyasiya, insanlar arasında ünsiyyətin məhdudlaşdırılması,
karantin rejiminin tətbiqidir. Bu xüsusda müvafiq addımlar
atan, qabaqlayıcı tədbirlər görən ölkələrdə
virusun tüğyan etməsinin qarşısı alınıb
və itkilər digər dövlətlərlə müqayisədə
xeyli az olub.
Bunun
ən real nümunəsi qismində çıxış edən
ölkələrdən biri də Azərbaycandır. Təsadüfi
deyil ki, bu gün koronavirusa qarşı ən effektiv
mübarizə aparan ölkələrdən söz
açdıqda Azərbaycanın adı birincilər cərgəsində
gəlir. Bu da təsadüfi deyil. Çünki fevralın
sonlarında respublikamızda virusa ilk yoluxma halı qeydə
alınandan sonra dərhal, operativ şəkildə
qabaqlayıcı tədbirlərin həyata keçirilməsinə
başlanıldı. Virusun qonşu ölkələrdən gəlməsi
nəzərə alınaraq yük avtomobillərinin hərəkəti
istisna olmaqla, bütün sərhədlərimiz
bağlanıldı və yalnız Azərbaycan vətəndaşlarının
vətənə qayıtmalarına imkan yaradıldı. O
cümlədən bütün istiqamətlərə təyyarə
uçuşları dayandırıldı.
Qlobal
pandemiya ilə mübarizə məsələsi ilk gündən
Prezident İlham Əliyevin diqqət mərkəzində oldu.
Mart, aprel, may və iyun aylarında dövlət
başçısının fəaliyyəti, keçirdiyi
görüşlər, verdiyi qərarlar bunu təsdiq edir.
Koronavirusla mübarizə bu gün dövlət siyasətinin
prioritetlərindən biridir. Bu istiqamətdə ən vacib məsələ
isə ilk növbədə vətəndaşların
sağlamlığıdır. İyunun 9-da modul tipli xəstəxanaların
açılışı zamanı Prezident İlham Əliyev
bir daha bildirdi ki, görülmüş bütün tədbirlərin
mərkəzində məhz Azərbaycan vətəndaşlarının
sağlamlığı dayanmışdır.
Modul
xəstəxanalardan dördü hazırdır
Virusun
yayılmağa başladığı dövrdən dövlət
başçısının tapşırığına əsasən
zəruri qabaqlayıcı, profilaktik və təxirəsalınmaz
tədbirlər görüldü. Bu istiqamətdə
görülən kompleks işlər çərçivəsində
Prezident İlham Əliyevin təşəbbüsü ilə
modul tipli xəstəxanaların tikintisinin xüsusi əhəmiyyəti
var. Bu, tətbiq olunan xüsusi karantin rejimi dövründə
ölkənin səhiyyə sisteminin indiyədək
görünməmiş bu qlobal çağırışa və
arta biləcək xəstə sayına tab gətirməsi
üçün mövcud xəstəxanaların infeksion
çarpayı fondunun artırılması baxımından
müstəsna rol oynayır. Belə ki, modul tipli xəstəxanaların
quraşdırılması ilə ölkənin səhiyyə
sisteminin əlavə 2000 çarpayılıq ehtiyat yeri
yaranır. Eyni zamanda bu xəstəxanaların
yaradılmasında əsas məqsədlərdən biri də
koronavirus xəstələrinin lazımi tibbi xidmətlərlə
əhatə olunması üçün vahid idarəetməni
və tibbi əlaqələndirməni təmin etməkdir.
Modul
tipli xəstəxanaların yaradılması Prezident İlham
Əliyevin "Koronavirus pandemiyası ilə mübarizənin
gücləndirilməsi sahəsində əlavə tədbirlər
haqqında” 7 aprel 2020-ci il tarixli sərəncamı ilə həyata
keçirilir.
Bunun
üçün dövlət büdcəsindən 14,8 milyon
manat ayrılıb. İlk belə xəstəxana mayın 7-də
paytaxtda istifadəyə verilib. Növbəti 3 xəstəxana
isə paytaxtın Bilgəh qəsəbəsində,
Sumqayıt şəhərində və Abşeron rayonunun
Saray qəsəbəsində quraşdırılıb.
Mühüm məsələlərdən biri də odur ki, 10
modul xəstəxananın 4-nü özəl sektor öz vəsaiti
hesabına inşa edəcək. Bununla da dövlətin üzərinə
düşən yük bir qədər azalır. Bu barədə
danışan Prezident İlham Əliyev özəl sektora və
vətəndaşlara təşəkkür edərək
deyib: "Özəl sektorun nümayəndələrinə və
eyni zamanda, adi vətəndaşlara koronavirus dövründə
göstərdikləri maliyyə dəstəyinə görə
təşəkkürümü bildirmək istəyirəm”.
Vətəndaşların
və beynəlxalq təşkilatların təqdir etdiyi fəaliyyət
Ümumiyyətlə,
Prezident İlham Əliyevin koronavirusla mübarizə təşəbbüsləri
çoxşaxəlidir. Bu zaman vətəndaşlarımız
və beynəlxalq təşkilatlar tərəfindən təqdir
olunan əsas məsələ Prezident İlham Əliyevin
problemin həllində nümayiş etdirdiyi nümunəvi
mövqeyidir. İlham Əliyevin fərman və sərəncamları
ilə məqsədi koronavirus infeksiyasının Azərbaycanda
yayılmasının qarşısını almaqdan və həyata
keçirilən tədbirlərə maliyyə dəstəyini
təmin etməkdən ibarət olan Koronavirusla Mübarizəyə
Dəstək Fondu yaradılması və buraya Prezidentin Ehtiyat
Fondundan ilkin olaraq 20 milyon manatın ayrılması, koronavirus
xəstələrinə xidmət göstərən həkimlərin
maaşının artırılması, koronavirusla əlaqədar
yaşına və səhhətinə görə xüsusi
qayğıya ehtiyac duyan yaşı 65-dən yuxarı olan 176
məhkumun əfv edilməsi virusla mübarizənin ilkin mərhələsində
atılan mühüm addımlar oldu.
Eyni
zamanda 575 çarpayıdan ibarət olan, ölkəmizin ən
müasir və "Yeni klinika” adlanan xəstəxanasının
açılışından sonra virusa yoluxan xəstələrin
müalicəsi üçün onların ixtiyarına verilməsi,
yeni laboratoriyaların alınması, Sumqayıtda qoruyucu tibbi
maska istehsalı müəssisələrinin fəaliyyətə
başlaması vətəndaşların
sağlamlığı naminə həyata keçirilən
dövlət siyasətinin uğurlu nümunələri oldu.
Minlərlə
Azərbaycan vətəndaşının müxtəlif
ölkələrdən dövlət hesabına təşkil
olunmuş çarter reysləri vasitəsilə ölkəmizə
təxliyə edilməsi isə İlham Əliyevin hər bir
məsələdə öz xalqının yanında
olduğunu, vətəndaşının taleyinə son dərəcə
diqqətlə yanaşdığını növbəti dəfə
təsdiq etdi.
Atılan
addımlar, verilən qərarlar həm də iqtisadi
dayanıqlığın qorunması və vətəndaşların
sosial rifahı kimi məsələləri əhatə etdi.
Yüz minlərlə vətəndaşın və
mikrosahibkarlıq subyektlərinin əməkhaqlarının
böyük hissəsi dövlət tərəfindən ödənildi.
Aztəminatlı, işsiz və qeyri-rəsmi
çalışan vətəndaşa minimal meyara uyğun
olaraq ödənişlər edildi. Prezident İlham Əliyevin
təşəbbüsü ilə ödənişli ictimai
iş yerlərinin sayı 2 dəfə artırılaraq 90 minə
çatdırılıb. Aprelin 1-dən həm də
ünvanlı sosial yardımı alan ailələrin sayı
12 min artırılıb.
Azərbaycan
Prezidenti koronavirusla mübarizədə qlobal səyləri
birləşdirir
Məhz
həyata keçirilən uğurlu dövlət siyasəti nəticəsində
Azərbaycanda koronavirus pandemiyasının ağır fəsadları,
Avropa ölkələrində olduğu kimi, çoxlu sayda
insan itkisi baş vermədi. Bu həm də onu göstərir
ki, Azərbaycanda vəziyyət nəzarət
altındadır. Qeyd edək ki, Azərbaycanda virusa
yoluxanların sayı 8 minə qədər olduğu halda, əhalisi
bizdən beş dəfə az olan Ermənistandan yoluxma
sayı 13 mini ötüb. Prezident İlham Əliyev bildirib ki,
xalqla iqtidar arasında birlik olan yerdə nəticə də
yaxşı olur: "Bizim əsas vəzifəmiz insanları
bu xəstəlikdən qorumaqdır, onların həyatını
xilas etməkdir. Əlbəttə ki, itkilərimiz də olub,
amma bəzi ölkələrlə müqayisədə Azərbaycandakı
vəziyyət qat-qat yaxşıdır. Bu, onu göstərir
ki, düşünülmüş siyasət, xalqla iqtidar
arasında birlik, dövlətin addımlarına yüksək
inam olan yerdə nəticə də olur”.
Azərbaycan
Prezidentinin təşəbbüsləri ilə koronavirusla
mübarizə məsələləri yalnız ölkə
daxilini əhatə etmir. Respublikamızın Türkdilli
Dövlətlərin Əməkdaşlıq Şurasına və
Qoşulmama Hərəkatına sədrliyindən irəli gələrək
Prezident İlham Əliyevin təşəbbüsləri ilə
bir müddət əvvəl Türkdilli Dövlətlərin
Əməkdaşlıq Şurasının və Qoşulmama
Hərəkatının Zirvə görüşləri
keçirilib. Bununla da Azərbaycan Prezidenti koronavirusla
mübarizədə qlobal səyləri birləşdirib.
İlham Əliyevin qeyd etdiyi kimi, bizim onsuz da yüksək səviyyədə
olan beynəlxalq imicimizə də bu, növbəti bir töhfədir.
Azərbaycanın
Ümumdünya Səhiyyə Təşkilatına fərdi
qaydada iki dəfə ianə verməsi və beləliklə də,
29 ölkəyə humanitar yardım göstərməsi, fərdi
qaydada isə 14 ölkəyə humanitar yardım etməsi də
Azərbaycanın qlobal səviyyədə koronavirusla
mübarizəyə verdiyi töhfələrdir. Bütün
bunlar beynəlxalq ictimaiyyət, o cümlədən ÜST tərəfindən
yüksək qiymətləndirilib.
Ən
böyük qiyməti isə Azərbaycan xalqı verir. Bu
günlərdə xalqımızın İlham Əliyevin ətrafında
sıx birləşməsi ölkəmizdəki milli həmrəyliyin
təcəssümüdür. Bu baxımdan bir çox
sınaqlardan layiqincə çıxmış Azərbaycanın
koronavirusla mübarizədən qalib ayrılacağı da
şübhəsizdir.
Rəşad CƏFƏRLİ
Azərbaycan.-2020.- 11 iyun.- S.1;6.